“Janejare'e rõmõ'ĩte poromosã'ãga mã'ẽ”, e'i mã'ẽ
4
Ajawyi ore Kiristu remĩgwai rõmõ tè oroiko. Janejare'e ayvu mojenuarà kõ rõmõ tè oroiko. Janejare'e nomojikuwaive maekwerà tè oromojenu oroiko ky'y. 2 Kee e'i tõvijã kõ wemĩgwai kõ pè ipi: “Eayvu rupi kõrijõ tè ikõ tapeiko nẽ”, e'i ijupe kõ kupa ipi. [Ãwĩvo ve erõvijã kee e'i ije: “Eayvu kõrijõ tè ikõ teremojenu ipi nẽ”, e'i ije. Ajawyi ijayvukwerà rupi tè aiko ipi. Erõvijã morya rè aja'a ipi. A'e kõrijõ tè e'i kuwa ije.] 3 Ajawyi pejẽ emosã'ãga pekupa remẽ, nimanyvoi ãmẽ eupe. Nikasi peayvu emosã'ãga pekupa remẽ eupe. Ãwĩvo ve tekokuwa kuwaparà emosã'ãga remẽ, nimanyvoi teve eupe. Ije ve najimosã'ãga'ãi ipi. 4 Kee rewarà mõ aepo a'e. Ije nakuwai eaiwererà mõ epy'a pè ainõ gatu mã'ẽ mõ. Ajamã'ẽ kee na'e'ãi: “Ivo tè aiko, erõvijã remimota rupi katu”, na'e'ãi. Erõvijã ywete kõrijõ tè epy'a pewarà okuwa ipi. A'e kõrijõ tè, “Ivo tè neiko”, e'i kuwa ije. Ajawyi ijayvu rè kõrijõ tè aja'a aiko ipi.5 Kãramõ Janerõvijã ywete uu tarà mijẽ. Ãmẽ si jane kõ jipy'amogetaa omojikuwaokatà ky'y. Pirujẽ jane kõ jipy'amogetaa kõ omojikuwaokatà. Tyvija rupi poromovyvyrai iko mã'ẽ ve omojikuwaokatà. Janejare'e tè, “Ikatuay wete neposikoawerà”, e'ità jane, aje ywete ikatuay remẽ. Ajawyi, “Nivoi iposikoa”, tapejẽ tite e'ã amãtejẽ emĩgwai kõ pewarà mõ ipi, a'e pejẽ.
6 Eretãrãgwerà kõ, tapejimotekokuwa aepo a'e maekwerà rè. Janejare'e ayvu rupi katu kõrijõ tapeiko. Ãmẽ tè napejimoe'e tite'ãi. Kee napejẽ tite'ãi ãmẽ ky'y: “Pauru koty rewarà tè ije”, napejẽ tite'ãi ãmẽ ky'y. Ãmõ, “Aporu koty rewarà tè ije”, napejẽ tite teve'ãi ãmẽ ky'y. 7 Ajawyi ava jẽ rõwã pemoẽoka ãmõ kõ 'arà kyty tapeiko ipi. Ãwĩvo ve ava jẽ rõwã pemotekokuwa ãmõ kõ wyi. Janejare'e kõrijõ tè penemikuwa ome'ẽ pejẽ. Ajawyi tapejimoe'e tite e'ã ikõ penemikuwa rè peiko nẽ, a'e pejẽ. Toporoerõarõ e'ã teve ikõ peiko nẽ.
8 Ha! “Orojimotekokuwapa!” pejẽ tite sipõ peiko? “Oreremikuwa kõ iteetejẽ!” pejẽ tite sipõ peiko? “Jõvijã kõ rõmõ oroiko!” pejẽ tite sipõ? Aje ywete sõ jõvijã kõ rõmõ peiko remẽ, ore ve jõvijã kõ rõmõ oroo kuwa peneve ãmẽ mijã.
“Temirõarõ rõmõ oroiko”, e'i mã'ẽ
9 Kee pejẽ tite orererõarõ ipi: “Orevo rupi teve ore oroiko, Jesu remimonokwerà kõ wyi”, pejẽ tite orererõarõ ipi. Aje, pevo rupi teve orewyi. Agyvo oroiko. Temijatarà rã tè ore. Oremomorijau 'a tè orerereko kupa. Pirujẽ jane kõ rovake tẽ tesõ oremomorijau 'a tè kupa. Ãmõ, yvapewarà kõ rovake teve. Janejare'e remimota rupi tè maevo a'evo orerereko kupa. 10 Kiristu rekoa rupi oroiko rewarà mõ, kee e'i oreupe kupa: “Notekokuwai 'ete ãwĩ kõ”, e'i kupa. Peupe ãmẽ, “Otekokuwavay mã'ẽ tè ãwĩ kõ”, e'i peupewarà mõ kupa ipi. “Ijayvukasiay mã'ẽ ãwĩ kõ”, e'i teve peupe kupa. Oreupe ãmẽ, “Nijayvukasi ãwĩ kõ”, e'i kupa ipi. A'evo orererõarõ kupa ipi. Ajamã'ẽ pemoe'e tite kupa ipi.
11 Aje, age'e remẽ pejẽ pevo rupi teve orewyi. Amyay oroporara oroiko ipi. Yy warà teve oroporara teve oroiko ipi. Orekamisa kekeipa teve oroiko ipi. Ãmõ, noerovija tari mãe kõ oremojaiwe orerereko kupa ipi. Oreretã e'ãte oroiko. Ãwĩvo orerekoa ipi. 12 Orojimi'utà remẽ, oroposiko ywete rã'ĩ a'evoa repy rõmõ ipi. Ava mõ ijayvu ai orekoty ipe remẽ, “Tereporijauesa kõ jẽ”, oro'e kõrijõ Janejare'e pè ipi. Ãmõ, oremomorijauvay ipe kupa remẽ, orojimokasi jẽ Kiristu kasia rupi oroiko ipi.a 13 Oreayvumoai epe kupa remẽ, oroporegeta katu jẽ ijupe kõ ipi. Noreayvu teitetei epe ijupe kõ ipi. Ajamã'ẽ norepotai iko kupa ipi. Ojikõ'õ jẽ orere kupa. Orererõarõ teve iko kupa.
“Eãkarãgwerà kõ vo 'ejẽ poroereko ipi”, e'i mã'ẽ
14 Poromosĩoka rõmõ rõwã aepo a'e aporegeta pejẽ. Pemotekokuwa rõmõ tè aepo a'e pejẽ. Poroauvay wyi tè aepo a'e pejẽ. Eãkarãgwerà vo 'ejẽ poroereko ipi. Ajawyi tè aepo a'e pejẽ. 15 Ije ypy itõkõ ajo pemotekokuwa rõmõ, Janejare'e ayvu e'eay Kiristu rewarà tapekuwa. [Peenu katu itõkõ peiko ãmẽ. Ajaire itõkõ pejirovija katu ee peiko ky'y. Ajawyi Janejare'e pyri peiko karuarutà peiko ky'y.] Ajaire tè itõkõ ãmõ kõ oo pekoty erekovijarerà rõmõ pemotekokuwa. Mõa'ãrõwã oo oo pekoty kupa ky'y. Eayvu 'aryvo tè pemotekokuwavay Kiristu ayvu rè penereko kupa ky'y. Aja paire tè itõkõ pejimokasi sa'u ãmẽ peiko ky'y. Ajamã'ẽ ije tè Kiristu rè poromotekokuwa ypy mã'ẽ rõmõ aiko. Ajawyi ije kõrijõ tè penuu vo mã'ẽ rõmõ aiko. 16 Ajawyi ereruparà mõ tapeiko, Jesu koty rewarà kõ rõmõ, a'e pejẽ. Ãwĩvoa apota.b 17 A'evoa rõmõ Timoteu amonookatà pekoty. Era'yry vo 'ejẽ Timoteu. Erauvay mã'ẽ tè a'e. Janerõvijã ywete rekoa rupi katu ekoi mã'ẽ tè Timoteu. A'e tè amonookatà pekoty. A'e manyvo aiko Kiristu Jesu revejẽ aiko mã'ẽ rõmõ mã'ẽ rè pemoja'aokatà penereko. Eayvu Kiristu Jesu rè poromotekokuwa maekwerà rè pemoja'aokatà penereko. Ãwĩvoa ve amojenu jenu erokwa ipi, taa kõ rupi Jesu koty rewarà kõ motekokuwa aa aiko remẽ ipi.
18 Mokope ãmõgwerà pepytery pewarà ojimoe'e ywe'e tite iko kupa. Ojimoãtãre'ã iko kupa. Kee e'i tite oupe iko kupa: “Pauru nonu'ãi ky'y. Ije tè ajimojõvijãtà ajupa”, e'i tite oupe iko kupa. 19 Ajamã'ẽ Janerõvijã ywete emonooka pekoty remẽ, aje py'awarà mõ avãetà a'e pè. Ãmẽ tè aporegeta kasità ãmẽ ojimoe'e tite mãe kõ pè imosã'ãga kõ ky'y. Akuwatà aje ywete oporegeta kupa remẽ. Akuwa tary ve aje ywete Janejare'e 'Ãg kasia rupi oporegeta kupa remẽ. 20 Janejare'e okuwa ava põ aje ywete omoẽoka o'arà kyty mã'ẽ. Janeporegetaa rupi rõwã janekuwa. Ikasia rupi jaiko mã'ẽ rè omã'ẽ. A'evoa rupi janekuwa ipi. 21 [Ajawyi Janejare'e ayvu rupi katu ikõ tapeiko ipi nẽ. A'e rè tapejirovija katu ipi. Ajawyi kee a'e pejẽ.] Pejẽ tè tapekuwa amãtejẽ manyvo pepota poroereko ajo pekoty remẽ. Ererõarõ ywe'e tite pekupa remẽ, aatà eayvukasia mõ pemotekokuwa rõmõ, a'e. Ajamã'ẽ pemorya ywesõ ikatuay wete maevo peupe. Eayvu ikõ taperovija amãtejẽ ãmẽ nẽ. Aporegeta katu kõrijõtà pepyri aiko remẽ ãmẽ. Ãwitõ tuu wa'yry wemiauvay pè oporegeta ikatusa rupi ipi, ãwĩvo ve aporegetatà peupe ãmẽ.