Janejare'e remimonokwerà kõ posikoa rewarà
3
Eretãrãgwerà kõ, Kiristu rè pejirovija ypy remẽ itõkõ Janejare'e 'Ãg noerekoi mãe kõ vo tè peiko ipi mijã. Kiristu rekoa rupi napeikoi ipi mijã. Ãwitõ ja'y sakyrerà notekokuwaive, ãwĩvo 'ejẽ pejẽ peiko mijã. Napetekokuwaive Janejare'e rekoa rè peiko mijã. 2 Ãwitõ ja'y sakyrerà pè susury kõrijõ tè jame'ẽ to'u ipi, o'okwerà no'uive remẽ. Ãwĩvo 'ejẽ pejẽ peiko. Poromo'e ypy tè Janejare'e rekoa rè tapekuwa ypy. Pejimotekokuwavay kuwasi peiko age'e remẽ mijã. Ajamã'ẽ aekwery vo jẽ tè peiko.a 3 Pemã'ẽ. “Ije kuwasi mijã”, pejẽ ojee pemãjã ipi. Peporegeta teitete jẽ teve ojikoty peiko ipi. Ãwĩvo peiko remẽ, Kiristu rè nojirovijai mãe kõ vo 'ejẽ pejẽ peiko. 4 Pepytery pewarà kõ mõ kee e'i tite: “Pauru koty rewarà tè ije”, e'i. “A'e ywesõ ijayvukasi mã'ẽ rõmõ ekoi”, e'i tite kupa. Ãmõ kõ: “Aporu koty rewarà tè ije. A'e ywesõ ijayvukasi mã'ẽ rõmõ ekoi”, e'i tite kupa. Ãwĩvo peporegeta tite remẽ, aje noerovijai mãe kõ vo 'ejẽ peiko ipi!b5 Ije ywesõ rõwã eayvukasi mã'ẽ rõmõ aiko. Ãwĩvo ve Aporu ywesõ rõwã teve ijayvukasi iko. Janejare'e rõmõ'ĩte ijayvukasi mã'ẽ rõmõ ekoi. A'e remĩgwai kõ tè ore oroiko, Aporu reve. A'e rè tè pejirovija ijayvu oromojenu pejẽ remẽ. Emĩgwai kõ tè ore, ojevo jẽ, Aporu reve.
6-7 Koo rè tè poromosã'ãgatà pemotekokuwaa rõmõ. Janejare'e koo pewarà temitãgwerà kõ vo 'ejẽ pejẽ peiko. Ore ãmẽ koo rè oroposiko mãe kõ vo oroiko, pepytery pè oroposiko remẽ. Ojimitã gatu mã'ẽ vo ije, ije ypy Janejare'e ayvu amojenu pejẽ rewarà mõ. Ajaire Aporu pemotekokuwa jẽ penereko. Ãwitõ temitãgwerà rè omoãkã mã'ẽ vo Aporu ekoi pene. Janejare'e rõmõ'ĩte temitãgwerà omoryoka kuwa ipi ajamã'ẽ. Ãwĩvo ve a'e rõmõ'ĩte ojirovijaoka pejẽ, upi tapeiko ky'y.c 8 Pemã'ẽ. Iteetejẽ koo jarà remĩgwai kõ posikoa. Ãmõ, jimitãa rè oposiko. Ãmõ, temitãgwerà mokatua rè oposiko. Imoãkãa rè oposiko teve. Ojevo jẽ ikatuay wete iposikoa kõ. Ãwĩvo ve ikatuay wete iteetejẽ oreposikoa kõ, ojevo jẽ Janejare'e pè oroposiko remẽ ipi. A'e oreposikoa omosã'ãgatà oroposiko katu remẽ esa. A'e teve oremoepytà. 9 Ãwĩvo ve ojevo jẽ Janejare'e rekoa mojenua rè oroposiko pepytery pè ipi. Ije, Aporu reve. Pejẽ ãmẽ Janejare'e posikoa rena vo peiko, ikoo vo. Emĩgwai kõ rõmõ oroposiko ipi, a'evoa rupi Janejare'e toposiko pepy'a kõ pupe.
Tetã reinõa rè tè poromosã'ãgatà teve pemotekokuwa rõmõ. Tetã Janejare'e oinõ mã'ẽ vo 'ejẽ pejẽ peiko. 10 [Ore ãmẽ emĩgwai kõ rõmõ oroposiko tetã rè mã'ẽ vo ore oroiko ãmẽ. Ãmõ ypy oposiko. Ajaire ãmõ oposiko mijẽ rõnõ. Ajaire ãmõ oposiko mijẽ rõnõ. Ajaate tetã oinõma kupa. A'evo oreposikoa pepytery pè oroiko ipi remẽ.] Ije ypy aposiko pepyterà rupi aiko. A'evoa rõmõ Janejare'e epyteporo taiko. Ijayvu nojenui 'ete itõkõ pejẽ mijã. Ije tè katu amojenu pejẽ, Janejare'e ayvukwerà. Ajawyi tè ajaire pejirovija ypy ee ky'y. Ajaire tè Aporu uu erapyky rupi pemotekokuwa jẽ Janejare'e ayvu rè iko, ije ypy poromotekokuwa ee mã'ẽ rè. A'e rupi tè itõkõ pejimotekokuwa sa'u Janejare'e rekoa rè peiko ky'y. Kee oro'e Janejare'e pè: “Tajavy e'ã ikõ Janejare'e rekoa poromotekokuwaa rè nẽ”, oro'e Janejare'e pè oroposiko remẽ ipi. 11 Jesu Kiristu rè kõrijõ tè poromotekokuwa. A'e tè janemojimo'ypa wee. Ãwitõ yvyra ypy ikasiay mã'ẽ kõrijõ tè tetã omokasi ipi, ãwĩvo ve Jesu Kiristu rõmõ'ĩte ikasi mã'ẽ jane'y rõmõ ekoi. A'e rè kõrijõ tè itõkõ poromotekokuwa Janejare'e remimota rupi poroereko. Naikoi ãmõ rè poromotekokuwa mã'ẽ mõ.
12 Kee a'e teve pejẽ. Ãwitõ ava mõ tetã oinõtà remẽ, yvyra ãtã mã'ẽ tè oinõ wetã mõ ipi. Ajawyi oiko pukutà tetã ãmẽ upa. Ãwĩvo ve Jesu Kiristu ayvu rupi katu jaiko remẽ, aje katu jamotekokuwa jane kõ ekoa rè ipi remẽ. Ojimokasità ee ojirovija ãmẽ kupa ipi ky'y. Ajamã'ẽ ijayvu rupi nijaiko ywe'ei remẽ, ãmõ, ni'ei jamotekokuwa remẽ, nikasi'ãi kupa. Ãwitõ ava mõ yvyra nãtãi mã'ẽgà weru imõ'ã wetã ypy rõmõ remẽ. Py'awarà mõ ijupa tetã ypy rõmõ ãmẽ. Ajawyi py'awarà mõ okei ajaire o'a. A'evo ojikuwatà tetã nãtãi mã'ẽ rõmõ. 13 A'evo 'ejẽ kuwa nivoi oroposiko pepyri oroiko remẽ. A'evo 'ejẽ kuwa teve poromo'e rã'ãga remẽ. Ajawyi oropota ivo katu oroposiko pemotekokuwaarà rõmõ oroiko ipi. Kiristu uu mijẽ remẽ, omojikuwaokatà janeposikoawerà ãmẽ. A'evo ekoi remẽ, oropota kee e'i Kiristu oreposikoa rè omãjã, “Aje ywete põ ivo katu peposiko Korĩtu wãnà kõ pyterà rupi”, te'i oreupe pene omãjã. Tetã okaipa mã'ẽ rè tè poromosã'ãgatà. Ãwitõ tetã nãtãi mã'ẽ okai remẽ, aje okaipatà ãmẽ ky'y. [Pasi'y, oviro, tupamy, yvyra, pirujẽ okaipa jimo'yjẽtà ãmẽ.] Ãwĩvo ve ava mõ sõ nikatui poromo'e Jesu Kiristu rekoa rè remẽ, notekokuwa'ãi emimo'ekwerà kõ aje ywete mã'ẽ rè. Ajawyi ajaire jimomorijaua 'arà okwa remẽ, nojirovija'ãi ee kupa ky'y. Opoità iwyi kupa ky'y. Oposiko pãnẽmusu imo'earerà rewarà mõ a'evotà ekoi ãmẽ kupa.d 14 Ajamã'ẽ ivo katu poromo'earerà remẽ, na'evo'ãi ãmẽ kupa ky'y. Noposiko pãnẽ'ãi ãmẽ imo'earerà. Emimo'ekwerà kõ ory jẽtà iko kupa, Jesu rekoa rè. Ojirovija karuarutà ee ãmẽ kupa ky'y. Ãmẽ sõsi Janejare'e omoe'età imotekokuwaarerà ivo katu oposiko rewarà mõ. 15 A'evo nikasi sõ Jesu rekoa rè poromotekokuwaa remẽ, nikatu'ãi ãmẽ ky'y. Kee mã'ẽ votà ãmẽ. Ãwitõ yvyra nãtãi mã'ẽ okaipa remẽ. Ajamã'ẽ inõgarerà uve jẽ iko. Ãwĩvo ve oposiko pãnẽ mã'ẽ ekoi. Janejare'e omoigo karuaru jẽtà opyri ereko. Ajamã'ẽ nomoe'e'ãi, nikatui iposikoawerà kõ rewarà mõ.
16 Pekuwa aje ywete Janejare'e 'Ãg tè pepy'a pupe ekoi. Ajawyi Janejare'e rena vo mã'ẽ tè pejẽ.e 17 Janejare'e opota ikatuay wete tijaiko ena kõ mõ mã'ẽ. Ajawyi okãte'ã janere. Ajawyi kee a'e pejẽ. Ava mõ sõ aje ywete rõwã mã'ẽ rè tè pemotekokuwa remẽ, pepy'amoaità ãmẽ apijarerà. A'evo Janejare'e 'Ãg rena omoai tètà. Ajawyi apijarerà Janejare'e omomatà kãramõ.
“Tapejimoe'e tite e'ã peiko”, e'i mã'ẽ
18 Ãmõ, kee a'e pejẽ. Tapejimoripeoka e'ã ikõ peiko nẽ. Kee tapejẽ tite e'ã ikõ ojiupe nẽ: “Ije ywesõ Janejare'e ayvu akuwa”, tapejẽ e'ã ikõ ojiupe nẽ. Nivo'ãi ãmẽ peiko. Jane kõ notekokuwai mãe kõ tè aepo e'i ipi. Tapepoi ikõ aepo rapijarerà kõ wyi nẽ. Jane kõ tekokuwaa rã'ãga wyi pepoi remẽ, ãmõ kõ kee e'i titetà peupewarà mõ: “Notekokuwai 'eteay mã'ẽ tè ãwĩ”, e'i titetà peupewarà mõ ãmẽ kupa. Ajamã'ẽ Janejare'e kee e'ità: “Otekokuwavay mã'ẽ ãwĩ”, e'ità peupewarà mõ ãmẽ. 19 Jane kõ nomãrãkuwai 'ete Janejare'e kotyre ipi. A'evoa rè kee e'i ojikusiwa karamoe remeve: “Ava mõ, ‘Atekokuwavay ije’, e'i tite sõ oupe remẽ, Janejare'e omoane'e jẽtà kõrijõ tojimoripe iko”, e'i.f 20 Kee e'i teve ojikusiwapa: “Janejare'e okuwa katu janejipy'amogetaa kõ ipi. Ajawyi jane kõ, ‘Akuwa katu’, e'i tite remẽ, kee e'i Janejare'e ijupe kõ: ‘Manyvo rã rõmõ rõwã ojipy'amogeta kupa’, e'i ãmẽ Janejare'e ijupe kõ”, e'ipa amãtejẽ.g Aepo e'i Janejare'e wayvu kusiwaoka karamoe remeve. 21-22 Ajawyi tapejimoe'e tite e'ã ikenẽ, a'e pejẽ. Ekoty rewarà kõ rõwã pejẽ. Aporu koty rewarà kõ rõwã teve pejẽ. Peturu koty rewarà kõ rõwã teve pejẽ. Ore tè penemĩgwai kõ vo 'ejẽ oroiko. Janejare'e remime'ẽgwerà kõ vo 'ejẽ ore peupewarà mõ oroiko. Ãmõ, aã yvy peupewarà tè. Ãmõ, penekoa peupewarà tè. Mãnõa teve peupewarà teve. Age'e remẽwarà peupewarà teve. Kãramõwarà rã peupewarà teve. Pirujẽ weminõgwerà Janejare'e ome'ẽ peupewarà mõ. 23 Kiristu pewarà mõ tè a'evo peiko. A'e ãmẽ Janejare'e pewarà mõ tè ekoi.