“Jesu Kiristu kasia rupi tè poromotekokuwa aiko”, e'i mã'ẽ
2
1-2 Eretãrãgwerà kõ, jypy remẽ aa pekoty remẽ, kee a'e ajipy'amogeta: “Jesu Kiristu yvyra jipokana rè ojijukaoka takatu janerekovijarerà rõmõ mã'ẽ kõrijõ tè amojenutà”, a'e eupe. Ajawyi a'evo aiko. Janejare'e ayvu omojikuwaoka mã'ẽ kõrijõ tè amojenu pejẽ aiko ipi. Najimoe'ei tite aiko ipi. Etekokuwaa rõwã amojenu aiko pejẽ ipi. Janejare'e tekokuwaa kõrijõ tè amojenu peupe. 3 Ajimonyijay pepyri aiko remẽ mijã. Atyty tesõ teve ajimonyi rõmõ aiko. [“Na'e katui imojenu maevo”, a'e ajipy'amogeta. “Noenu'ãi kupa!” a'e tite ajimonyi rõmõ.]a 4 Eayvukasia rupi rõwã aporegeta aiko ipi. Etekokuwaa rupi rõwã teve aiko. Ajamã'ẽ ijayvu amojenu remẽ, Janejare'e 'Ãg okasia rupi tè omojikuwaoka aje ywete eremimojenuwerà peupe ipi. 5 Ajawyi pekuwa Janejare'e 'Ãg kasia rupi jajirovija ee mã'ẽ. Janetekokuwaa rupi rõwã jaiko.“Janejare'e o'Ãg rupi poromotekokuwa ipi”, e'i mã'ẽ
6 Janejare'e tekokuwaa oromojenu ekoa rè ojimotekokuwa mãe kõ pè. Ajamã'ẽ age'ewarà jane kõ tekokuwaa rupi rõwã oromotekokuwa oroiko ipi. Jane kõ rõvijã tekokuwaa rupi rõwã teve oroiko. Kãramõ opa mãerã tè jane kõ tekokuwaa ky'y. 7 Ajawyi Janejare'e tekokuwaa rupi kõrijõ tè oromojenu oroiko ipi. Janereko e'ãve Janejare'e kee e'ipa amãtejẽ karamoe remeve oupe: “Õ'õ aje, kãramõ jane kõ Era'yry rè ojirovija katu remẽ, areko katu kõtà epyri toiko karuaru kupa”, e'ipa janeupewarà mõ. A'evo janemoe'ea rã rè oja'a amãtejẽ. Ajamã'ẽ aepo jaa nojikuwaive jane kõ pè mijã. A'e tè omojikuwaoka oreupe ky'y, toromojenu jenu erokwa ky'y. 8 Pirujẽ age'ewarà jõvijãgwerà kõ aepo jaa rè notekokuwai. Otekokuwa sõ ee kupa remẽ, Janerõvijã ywete nojukaoka'ãi kuwa yvyra jipokana rè ãmẽ kupa mijã, ãwisõ a'e ywesõ ikatuay wete mã'ẽ rõmõ ekoi. Ajamã'ẽ notekokuwai ijukatarà kõ. 9 A'evoa rã rè itõkõ kee e'i ikusiwaoka amãtejẽ karamoe remeve:
“Janejare'e e'ipa manyvo wauparà rã kõ werekotà kãramõ.
Ikatuay wete wereko kõtà.
A'evoa rã nomojisaokaive jane kõ pè.
Ajawyi nijamã'ẽive a'evoa rã rè. Nijaenuive teve.
Jajipy'amogeta ipe a'evoa rã rè. Nijatekokuwaive ee”, e'ipa amãtejẽ karamoe remẽ.b
10 A'evoa rã omojikuwaokapa janeupe age'e remẽ ky'y. Okatuaya omojikuwaokapa teve janeupe ky'y. O'Ãg tẽ tesõ ome'ẽ janeupe ky'y. A'e rupi omojikuwaokapa janeupe ky'y.
Otekokuwavay Janejare'e 'Ãg. Ajawyi a'e ywesõ Janejare'e jipy'amogetaa tẽ tesõ okuwa. A'e rõmõ'ĩte okuwa. 11 Janevote nijakuwa'ãi kuwa Janejare'e jipy'amogetaa ipi. Ijipy'amogetaa nijakuwai ipi. I'Ãg kõrijõ tè okuwa. Ãwitõ jane'ãg kõrijõ teve jajipy'amogeta mã'ẽ okuwa ipi. Ãmõ kõ ãmẽ nokuwai. A'evo ve Janejare'e rõmõ'ĩte ojipy'amogeta mã'ẽ okuwa. I'Ãg kõrijõ okuwa. Ajawyi nijakuwai ipi mijã. 12 Age'e i'Ãg janepy'a pè tesõ ekoi ky'y. Aã yvy pewarà rõwã janepy'a pè ekoi mã'ẽ. Aje Janejare'e 'Ãg tẽ tesõ. Pirujẽ ojirovija ee mãe kõ py'a kõ pupe tè ekoi. A'e rupi janerereko katua omojikuwaoka janeupe ipi.
13 Ajawyi janevote rõwã janepy'a pupewarà rõwã jamojenu jaiko ipi. Janeremikuwa rupi rõwã jamojenu. Aje, Janejare'e 'Ãg janemotekokuwa wekoa aje ywete mã'ẽ rè. Ajawyi a'evoa oromojenu erokwa ipi. 14 Janejare'e 'Ãg opy'a pè noerekoi mãe kõ “aje” ne'i'ãi oreremimojenuwerà kõ pè iko ipi. “Ayvu poromotekokuwa mã'ẽ rõwã”, e'i ywe'e tite kõrijõ kupa iko ipi. Notekokuwai ee kupa. Janejare'e 'Ãg rupi sõ ekoi kupa remẽ tè kuwa otekokuwa kupa mijã. 15 Janejare'e 'Ãg rupi ekoi mãe kõ ekoa rè otekokuwavay ãmẽ ipi. I'Ãg noerekoi mãe kõ omã'ẽ ywe'e ipe janere, ãwĩvoa rupi jaiko remẽ. Ajamã'ẽ notekokuwai iko kupa. Janejare'e rekoa rupi jaiko mã'ẽ rè notekokuwai kupa omãjã. [Ajawyi janererõarõ ywe'e tite kupa ipi.] 16 Kee e'i itõkõ ojikusiwa maekwerà rupi katu:
“Ava jẽ rõwã Janerõvijã ywete jipy'amogetaa okuwa mã'ẽ.
Nuvei 'ete imotekokuwaarerà”, e'i ojikusiwa.c
Ajamã'ẽ sienu katu Kiristu jipy'amogetaa ky'y, i'Ãg janemotekokuwa ee rewarà mõ.