Pone ese poinsaro spirit namo, e noloni God, wee onne
4
Pone Kristen inomranimpi ka pinefe uporo kinini,
pone e fi bilipim uma mingklari fopi e noloni pone ka nireni pone nanrona,
“Spirit e God yake ki mi nanrona.”
Pone ese poinsaro nu spirit namo ka samo puru nu nanrona,
nu sa Spirit e God wee onne.
Nu profet mingklari fa karnirene,
namee naine mokoi mingklari e pike namo pu.
2 Pone ese samo pupene rokoi namo ese pone namale Spirit e God:
le mana wongke yire,
“Jisas Krais yolowi yukaine mana runu” sa,
pone ese namale nanrona Spirit e God sa waiye mana namo.
3 Ka nu uma fi nopro alele mi namo e Jisas,
sa spirit nunini namo fi Godni.
Spirit namo sa mana fina fa iimye Krais.
Iim e Jisas namo,
isi pone pupu mi e wu ese yolowi namo,
namee yolowi pu ka waiye pike mee.
4 Pone kongkom uporo kinini namo,
pone sa Godni ka mi poneni sa samo rikepone mi e nu profet fa karnirene namo pu.
E fika,
Holi Spirit,
mana e yuna kero wamo namo,
sa yem koii ka waiye laip poneni ka wu rikepone Satan,
fina e pai risi pike namo.
5 Nu uma namo,
fa samo wolane ommo e pike namo.
Nanrona fane nu fa nopro mi mingklari ommo e pike namo.
Ka nu uma e pike namo fa ainem wamo nire nupu mi nunini.
6 Mone uma e God,
nanrona fane nu uma e namale God namo,
fa nupu mi moneni.
Ka nu uma e fi Godni namo,
fi fa nupu mi moneni.
Ka e rokoi namo nro,
mone resukru ese namale Spirit e mi alwone ka spirit fa yeingkeye ka kapyuka ira e nu uma.
Mana fa samo wolyane God ese samo wolyane nu plai plau
7 Pone Kristen inomranimpi ka pinefe uporo kinini,
mone ese samo wolmale nu plai moneni e fika God wone,
sa nomu e nale e fa wolyaliye pinuma.
Nu uma e nuna nale fa wolnanene pinuma namo samo namale God ka nu naine yukaine kongkom e God.
8 Fina e fi yuna nale e fa samo wolnalene nu plai namo,
fi namale God.
E fika,
God wu wone sa nomu e nale fa samo wolane nu plai.
9 God yawane Auna wokera nro woneni namo yolo pike fa mone ese mem laip fa waiye nanrona nanrona e ommo isi wu yangke mone.
Ka nale namo sa yukune mone alele nanrona God fa samo wolaye mone.
10 Nale e fa samo wolane,
sa nale e God.
Isi mu fi mangke nale namo wu.
Onnele!
Wu isi yangke nale fa samo wolyane mone se sa wu yuku nale namo e wu yawane Auna wokera nro woneni namo yolo pike yukaine ofa fa yuꞌpole nale fafaile moneni.
11 Pone Kristen inomranimpi ka pinefe uporo kinini,
e nale namo,
God yukune mone nanrona,
wu samo wolyane mone wamo.
Nanrona fane mone re ese samo wolmale nu plai.
12 Mana wongke fi yuru God nama woneni,
samo onnele.
Ka le mone samo wolmale nu plai,
rokoi namo nro,
ese God yem koii ka waiye laip mone ka nale wunini fa samo wolaye mone namo,
ese waiye kero mone.
13 Mone namale nanrona mone maime fori uporo wamo plau God ka wu re yem koii ka waiye laip e mone.
E fika,
wu yane Spirit woneni fa waiye laip e mone pinuma mingklari fopi e naine yukaine foruma alwone e God.
14 Ka mu muru ompla Aina God yangke e yawane Auna wunini yolowi fa yuꞌpu kore nu pinuma e pike namo.
Nanrona fane mu fa moprome mi e ompla e mu muru namo.
15 Le mana wongke yire nanrona,
“Jisas wu sa Auna e God,”
God yem koii ka waiye laip wunini ka wu waiye fori alwone e God.
16 Nanrona fane,
mone samo namale wu wamo nanrona,
God fa samo wolaye mone.
Ka mone fa mane mone pai nale wunini namo.
God wu sa nomu e nale fa wolane nu plai.
Ka uma e nuna nale fa samo wolane nu plai namo,
e samo naine fori uporo e God ka God yem koii ka waiye laip nunini.
17 Le mone samo wolmaneme nu plai,
ka maime renro nale e Krais isi yangke e wu waiye pike mee,
nale namo ese waiye kei mone.
E mone maimeme pike mee,
mone maime yukaine Krais wone pu.
Nanrona fane mone ese fi maime ka wola mingklari ka mum kaire e kot wamo e God ese yemei pike mee.
18 Mone fi fa karmum God.
E fika wu fa samo wolaye mone,
namo sa yangke mone maime renro nale fa samo wolmaneme nu plai.
Ka nale e fa samo wolane nu plai,
sa fa samo yuꞌpole nale e fa karnumne God.
Le mone karmume God,
sa yuku rona mone mum ompla fika fafaile wamo ese God yangke yemei mone.
19 Mone fa mangke nale fa samo wolmale nu plai e fika God wone mana isi risi fa samo wolyame mone.
20 Le mana wongke yire nanrona,
“Ki fa samo wolkane God,”
ka wu fa wolpun kire wee fi fa wolyali nu Kristen inomranimpi ka pinefe plai,
mana namo sa mana fa karyireye.
Le mone fi samo wolame nu fopi e mone fa muru nu nama moneni namo,
ese mone wolmane God rongkele,
fina e mone fi muru wu nama moneni namo?
21 Mi kero isi Krais yame mone sa nanrona:
Nu uma fa wolnane God namo,
ese samo wolnane nu Kristen inomranimpi ka pinefe plai plau.