Nu Kristen bilipim God Auna
5
Nu uma e bilip nanrona Jisas wu sa Krais,
sa naine yukaine nu kongkom e God.
Ka uma fopi fa samo wolane aina wokera,
sa fa samo wolane kongkom wunini plau.
2 E mone samo wolmane God ka mupene lo wunini,
sa mone ese namale nanrona mone samo wolmale kongkom wunini plau.
3 Le mone samo wolamane God,
sa mone fa mupene lo wunini.
Ka lo wunini namo,
sa uporo ka ese fi eni wolpuna moneni.
4 Nu uma e naine yukaine kongkom e God namo,
kero e pike mee ese fi yumanralo nu ka yangke nu firpanro.
Jisas e yumanralo iim namo pu.
Mone fa bilipme Jisas ka e rokoi namo nro,
mone fa mumaro nale e fa nopu iim ka mumaro kero e pike namo.
5 Fina fa rikepone ka yumanralo kero e pike mee?
Nu fopi e bilip nanrona Jisas wu sa Auna e God,
nu uma namo nro sa fa rikepone ka numaro kero e pike mee.
Jisas wu sa fina?
6 Jisas Krais namo,
wu mana e isi waiye heven ka yolo pike.
Se Jon ke baptaisim wu mii se sa,
wu ri ka ori wunini oko yolo moile.
Wu fei yolo mii siwole nro,
wu yolo plau mii ka ori.
Holi Spirit wu sa nomu e mi alwone,
ka Holi Spirit namo fa yopro mi e nale e Jisas Krais.
7 Mone muna ommo plainrikera fa nopro mi won wokera nro fa samo nireni mone nanrona Krais wu sa mana e God wone yawane yolowi.
8 Holi Spirit ka mii ka ori namo,
awail nopro mi wokera nro.
9 E nu uma e pike mee fa noprone ommo e none namale namo,
mone fa samo bilipim mi nunini.
Nanrona fane mone ese samo bilipim mi e God fa yame mone.
E fika mi e God fa yame mone namo,
sa mi wamo ka re samo yumanralo mi e nu uma siwole e pike mee.
E fika,
wu seke mana e pike mee,
wu sa God ka mi e wu yame mone namo,
sa mi e Auna woneni.
10 Nu uma e bilipim Auna e God namo,
sa nuna mi yeye wolpuna e nu ka e nopro mi alele.
Le mana fi bilipim mi e God yoproye,
mana namo fa yire nanrona,
God wu fa karyoproye.
E fika,
mana namo fi fa bilipimye mi e God isi yoproye e Auna woneni namo.
11 Ka mi e God isi yoproye namo,
sa nanrona:
God yame mone laip fa waiye nanrona nanrona.
Ka Auna wunini namo,
sa nomu e laip namo.
12 Nu uma e nangkana Auna e God namo,
sa nem laip fa waiye nanrona nanrona.
Ka nu uma fi nangkana Auna e God namo,
laip e fa waiye nanrona nanrona namo sa onne.
Mone namale nanrona mone ese mem laip fa waiye nanrona nanrona
13 Ki keꞌre pu mi namo pai pone uma fa bilippe noula e God Auna,
ese pone namale nanrona pone pem laip fa waiye nanrona nanrona.
14 Mone fi fa mum e mone mesapume God ka marineme ompla.
Namo sa e fika,
mone namale nanrona,
le mone mesapu ompla wongke e God wone wola pu yire mone ese mem sa,
wu ese yupu mi e mone mesapume.
15 Mone namale rona God yupu ommo mingklari e mone mesapu mee ka marime wu.
Nanrona fane ompla fika e mone marineme namo,
mone namale kore nanrona,
mone mem ompla namo pu.
16 Le yene yuru inomranimpi wee pinefe wongke yangke nale fafaile ka nale fafaile namo fi yangke wu samo palo hel,
sa yene ese yesapu God ese yane wu laip fa waiye nanrona nanrona.
Ka nale fafaile plai fa yangke mana ese samo palo ka waiye hel.
Ki seke kire yene ese yesapu God e ompla namo.
17 Nale mingklari e fi uporo namo,
sa fafaile nama e God.
Ka plai e ommo fafaile namo,
e fi nangke mana waiye amon God ka waiye hel reprikera.
18 Mone namale nanrona nu uma e naine yukaine kongkom e God namo,
fi fa nangkanane nale e fa nangke nale fafaile.
E fika,
God Auna fa samo yuruye nu kongkom e God ka fi mewyimane Satan yisiyori nu.
19 Mone namale nanrona mone sa kongkom e God,
ka Satan fa waiye yukaine iramana e nu pinuma e pike mee.
20 Mone namale pu nanrona God Auna e yolowi pu ka wu yangke mone namale ka mem ira uporo e ommo fa ese yangke mone namale God runu namo.
Nanrona fane mee mone maime fori alwone e God ka Auna wunini Jisas Krais.
Wu wone nro sa God runu ka wu wone sa laip fa waiye nanrona nanrona.
21 Pone kongkom kinini,
pone ese samo paipe amon nu god giaman.