3
Puru!
Aina God namo,
fa youw mone nanrona kongkom woneni.
Nanrona fane mone namale,
wu fa samo wolyane mone wamo.
Mi namo,
sa mi alwone.
Ka nu uma e pike namo fi samo namale nanrona mone sa kongkom e God.
E fika,
God re nu fi namale wu.
2 Pone Kristen inomranimpi ka pinefe uporo kinini,
mee mone maime yukaine kongkom e God.
Ka ingke mone ese maime rongkele,
ompla namo sa nu fi samo nire alele mone fa mone ese namale.
Ka mu namale pu nanrona,
e Krais yemei alele,
mone ese samo muru wu nama moneni,
nanrona fane mone ese memei mukaine wu wone.
3 Uma mingklari norine wu namo,
nemplekuru none kore ese naine namkire wamo nama e God yukaine Krais wone sa waiye namkire wamo.
4 E nu uma nangke nale fafaile,
nu samo nuku alele nanrona nu uma fa nangkrumone lo e God.
E fika nale fafaile sa yuku alele nale e fa nangkrumone lo.
5 Pone namale pu nanrona,
Krais yolowi fa yuꞌpole nale fafaile.
Ka nale e fa nangke nale fafaile namo,
fi waiye laip wunini.
6 Nu uma e naine fori uporo wamo nane Krais namo,
fa samo nupone nale mingklari e nale fafaile.
Nu uma e fa nainene nale e nangke nale fafaile namo,
sa nu uma fopi e fi nuru wu ka fi samo namale wu.
7 Pone kongkom uporo kinini,
pone faa mewpimane nu uma nuka ira poneni.
Mana fina e yupene nale uporo namo,
sa uporo wamo nama e God yukaine Krais wone sa uporo nama e God.
8 Nu uma e nangke nale fafaile namo,
sa furempi e Satan.a
E fika,
Satan wone sa nomu e fa yangke nale fafaile e taim God yangke pike namo ka yolowi plele mee.
Nomu e Auna e God yolowi namo,
wu ese yisyori ommo mingklari e Satan.
9 Nu uma naine yukaine kongkom e God namo,
fi fa nuna kero nale fafaile e laip noneni.
E fika,
laip uporo e God namo,
waiye nu.
Nanrona fane nu samo wolnumaro nale fafaile ka ese fi painri kore nale fafaile namo.
10 E rokoi namo nro,
mone ese resukru namale rona fopi sa kongkom e God ka fopi sa kongkom e Satan.
Mana e fi fa wolyane nu Kristen plai,
wee fi fa yangke ommo uporo nama e God namo,
sa fi mela e God.
Mone ese samo wolmane nu uma plai e mone
11 E isi,
nu samo nopro mi alele pone mi fa samo wolane nu uma plai e mone.
12 Pone ese fei pupene nale e Kein,
Satan furem e yufu ino woneni ri.
E fika ka wu yufu ino woneni namo ri?
Wu yufu ino woneni ri e fika,
ino woneni namo,
fai yangke nale uporo nama e God ka Kein wone namo,
wu sa mana e Satan.
13 Pone inomranimpi ka pinefe kinini,
pone ese fi wolnipanri e nu uma e pike namo fa iim pone.
14 Mone namale rona mone mupone rokoi e ri ka maime rokoi e laip fa waiye nanrona nanrona.
Mone namale ompla namo e fika,
mone fa samo wolmaneme nu Kristen inomranimpi ka pinefe plai.
Nu uma fi fa samo wolane nu Kristen plai namo nanaine rokoi e ri.
15 Mana e fi samo wolyane inomranimpi wee pinefe plai woneni namo,
sa yukaine mana fa yufu nu uma plai rili.
Pone namale pu nanrona nu uma fa nufu nu uma plai rili namo,
laip fa waiye nanrona nanrona namo,
sa fi waiye plau nu,
onne.
16 Rokoi namo nro fane mone namale nale fa samo wolmaneme nu plai,
sa yukaine Jisas isi yane laip woneni fa mewmew mone.
Nanrona fane mone re ese samo mane laip moneni fa mewmew nu Kristen plai plau.
17 Le mana wongke fa yuna ommo mingklari e pike mee ka fi wolpalo ka mewmew inomranimpi ka pinefe plai fopi e ommo onnele namo,
mu namale rona nale e God fa samo wolyane mone namo,
fi waiye mana namo.
18 Pone kongkom uporo kinini,
e mone mire nanrona mone muna nale fa wolmaneme uma plai,
mone ese fi menrume reꞌfa moneni ka karmire.
Mone ese samo mane wolpuna moneni fa mangke nale wona nro fa mewmew nu plai.
19 Ommo e mone fa mangkeme namo,
ese yuku nanrona mone mamplo renro nale e mi alwone.
Ka ompla namo nro ese yame mone wolpuna raulo ka kero e mone meri nama e God.
20 Le wolpuna moneni samo wolyoko mimiyen e ompla wongke,
mone ese maime wolpuna raulo nama e God.
E fika,
God wone namale ommo mingklari,
ka ira wunini samo rikepone ira waiye wolpuna moneni.
21 Pone Kristen inomranimpi ka pinefe uporo kinini,
e wolpuna moneni fi wolyoko mimiyen wolpuna e mone,
mone namale rona mone maime uporo nama e God.
Ka mone ese molomi ka meri nama wunini ka e fi mum.
22 Ka mone resukru ese mem ompla fika yukaine mone fa marime.
E fika,
mone fa mupu mi wunini ka mupene lo e wu fa wolaye.
23 Wu yina lo kero mone ese samo bilipim noula e Auna wunini Jisas Krais ka samo wolmale nu plai yukaine isi wone yireni mone ese mangke.
24 Nu uma e nupu mi wunini ka nupene namo,
naine fori uporo wunini wamo ka wu yem koii ka waiye laip nunini.
Ka ompla namo fa yangke mone namale nanrona God waiye laip mone.
Wu yawane Holi Spirit waiye laip moneni pu.
Ka ommo namo nro fa yangke mone e namale rona God waiye fori uporo wamo moneni.