Krais wu fa mewmewye mone
2
Pone kongkom uporo kinini,
ki keꞌre mi mee ese mewmew pone sa pone ese fi pangke nale fafaile nama e God.
Le mana wongke yangke nale fafaile nama e God,
sa wu wone resukru ese yuꞌpole nale fafaile e mana namo.
E fika,
Mana Fa Yeri Risi Mone Mi namo,
fa yarineye Aina God ese yuꞌpole nale fafaile e mone.
Ka mana namo fa yangke nale uporo wamo nama e God ka noula wunini sa Jisas Krais.
2 Wu mana fina e isi yem koii e mone,
e yangke wu wone yemei yukaine ofa uporo,
e yuna worum uporo wamo fa yuꞌpole nale fafaile e mone.
Wu seke yangke ommo namo e mone pinuma isi bilipme namo nro,
wu yangke ommo namo ese mewmew pinuma mingklari e pike mee.
Mana e namale God fa samo yupene lo mingklari wunini
3 Le mone mupene lo e God,
sa mone ese namale nanrona mone samo namale wu.
4 Le mana wongke yire nanrona,
“Ki namale God,”
ka wu ke fi samo yupene lo mingklari e wu,
sa wu mana fa karyire ka mi alwone e God fi waiye wolpuna wunini.
5 Ka le mana yupu mi e God ka samo yupene,
mana namo samo yina wolpuna woneni waiye God ka samo wolyane wu.
Ka e rokoi namo nro,
mone ese namale nanrona mone maime fori uma uporo wamo e God.
6 Mana fina fa yire nanrona wu waiye fori alwone e God namo,
ese samo yupene rew koii e Jisas.
7 Pone Kristen inomranimpi ka pinefe uporo kinini,
ki fi keꞌre lo keklepe wongke pone.
Sam onne!
Lo namo isi pone pem pu ka samo namale pu,
ka yeye wi plele mee.
8 Ki won keꞌre kore lo namo pone.
Laip ka nale uporo e Jisas pekeuwle laip ka nale uporo e pone mee,
sa nukune mone nanrona lo namo sa ompla keklepe kore.
E fika,
ningkiyolo sa peper pai ekreneye le pekimo ka ali runu yemei ka yem koii pu ka waiye mee.
9 Mana fa karyire nanrona wu sa waiye ali,
ka wu sa mana fa wolpuna fafaile nu Kristen inomranimpi ka pinefe plai,
mana nanrona sa na waiye kureli.
10 Mana fa samo wolyaliye nu Kristen plai namo,
waiye ali ka ompla wongke e fi yaukiri rokoi wunini ese wu paryolo ka samo firpalo.
11 Ka mana fa wolpuna fafaile ka fi wolyane Kristen inomranimpi wee pinefe wongke,
wu waiye kureli wamo ka waraiye pouwpare kureli.
E fika,
kureli yuforo nama wunini ka wu fi namale koii pei sa wu e pai.
12 Kongkom uporo kinini,
ki wona keꞌreke piprola mee pai pone
e fika,
pone uma fa bilippe Jisas Krais.
Nanrona fane God yuꞌpole nale fafaile mingklari poneni pu.
13 Ki na keꞌreke piprola mee pai pone uma e samo peri kero bilip poneni e Jisas Krais kikla mingklari yolowi plele mee,
pone sa yukaine pone nangkape rinri kero wamo,
e fika pone samo namale Jisas Krais,
wu mana fina oiy isi waiye pu se sa God yangke ommo mingklari nainene namo,
yolowi plele naminre.
Piparola e ki keꞌreke mee,
pai pone uma e puna bilip kero wamo yukaile kongkom efapu fa nuna kero wamo.
E fika,
pone rikepone Satan,
mana e fa pai risiye nale fafaile.
14 Kongkom uporo kinini,
ki keꞌre piparola namo pai pone pu
e fika,
pone namale Aina God.
Piprola e ki keꞌre namo,
pai pone uma e bilip kerope Jisas Krais kikla mingklari namo wi plele mee.
E fika pone samo namale Jisas Krais,
fina oiy isi waiye se sa ommo mingklari e nainene namo,
wi plele naminre.
Ki keꞌre piprola namo pu pai pone uma e puna bilip kero wamo yukaile nu kongkom efapu fa nuna kero wamo.
E fika,
pone samo bilipim Krais ka mi e God waiye kero wamo wolpuna poneni,
ka pone rikepone Satan,
mana fa pai risiye nale fafaile.
Mone e fi samo wola yapa ommo e pike namo
15 Pone e fi samo wolpapa nale fafaile ka ommo mingklari wongkwongkeni e pike namo.
Fina e samo wolaye ommo e pike namo,
fi fa wolyapa Aina.
16 Ommo mingklari e pike namo fa yeingke mone mangke nale fafaile yukaine nale e fa:
wolpun yemeiye,
nama paloye ommo,
ka nale e fa nererine none.
Nale fafaile wongkwongkeni e pike namo fa yeingke mone mangke nale fafaile.
Ka Aina God namo,
fi yire mone ese mangke nale nanrona.
17 Pike mee yire pekimo ka ommo mingklari wongkwongkeni e pikeni fa neingke mone uma mingklari namo,
pekimoye,
ka mana fa yupeneye wolpuna e God namo,
wu ese waiye nanrona nanrona.
Mana e fa wolpun fafaireye Krais yemei pu
18 Kongkom uporo kinini,
mone molomi ekrene pu e pike namo yire pekimo.a
Isi pone pupu mi e iim namo e Krais ese wi.
Namee,
iim mingklari e Krais namo nemei alele pu.
Ompla namo sa yuku nanrona mone mi ekrene pu e pike namo yire pekimo.
19 Nu uma namo isi nane mone maime pu se sa nu nupone mone ka panro moile.
Namo sa yukune mone alele wamo nanrona,
nu fi naine uma alwone e mone.
Le nu uma moneni,
sa nu ese nakle mone maimeme.
20 Ka e pone sa,
Krais yape Holi Spirit pone pu.
Ka pone namale mi alwone e God pu.
21 Ki seke keꞌre mi namo e yuku pone nanrona pone fi namale mi alwone.
Onnele!
Ki namale nanrona pone namale mi alwone pu,
ka wawaimi wongkwongkeni e pone pupupe namo,
sa fi yolowi mi alwone e God.
22 Mana fa karyire ka samo kapyuka ira nu pinuma namo,
wu sa fina?
Mana fina fa yire nanrona,
“Jisas wu seke mana isi God yina fa yuꞌpu kore nu pinuma woneni.”
Mana e yire mi nanrona,
wu sa iim e Krais ka wu samo kuma yane Aina God ka Auna wunini.
23 Mana e kuma yane Auna e God namo,
sa kuma yane Aina wunini plau.
Mana e bilip ka yire alele nanrona,
“Jisas namo,
wu sa mana e God yina wu e waiye yukaine mana fa yuꞌpu pinuma mingklari e wone,”
waiye yukaine fori uporo Auna e God yane Aina God.
Holi Spirit fa yukule mone mi alwone
24 Pone samo puna kero ka pupene mi namo isi pone pupu pu.
Le pone puna kero mi namo ka pupene sa,
pone samo paipe fori uporo e Auna e God ka Aina God plau.
25 Ka wu yuka mi mone pu ese yame mone laip fa waiye nanrona nanrona.
26 Ki keꞌre mi namo pai pone ese kirepi pone nu uma nire neingkari ese kapnuka pone ira namo.
27 Ka e pone,
Krais yape Holi Spirit pone pu ka wu yem koii ka waiye laip e pone.
Nanrona fane pone e fi pupu nu uma plai e raryale pone ka nukule pone wawaimi wongke e mi alwone namo.
Ka kero e Holi Spirit fa yukuleye pone ommo mingklari yukaine mi alwone e pone pem pu,
ka pone namale mi alwone e wu pu ka wu fi karyire.
Nanrona fane pone won e paipe fori uporo wamo e God.
Kongkom e God
28 Kongkom uporo kinini,
pone samo pangkana ka samo paipe fori uporo plau God.
Ka e wu yolowi alele,
mone nameri kero ka fi sem wu e wu wi.
29 Le pone namale nanrona Krais wu sa mana uporo wamo e God,
wola pone re namale pu nanrona uma mingklari e nangke nale uporo nama e God,
naine yukaine nu kongkom woneni.