Piprola e
Jon emen yeꞌre
Mi e laip namo sam yemei alele
1
Mi mee e mu meꞌre pai pone namo,
sa mi e ompla oiy isi waiye se God yangke ommo mingklari,
ka ompla namo na yeye yolowi plele naminre.
Mu mupu mi namo,
ka mu muru wu nama munini,
ka mew moku wu mew munini.
Ka mi mingklari namo sa pai Mi e God sa resukru ese yali laip alwone pai mone pinuma e pike.
2 Ompla namo isi waiye pu ka wi plele mee,
wu wone sa laip,
se sa God yangke wu yemei alele ese nu pinuma nuru wu.
Mu muru wu pu ka naimee mu wona moprome mi alele pone mi alwone wunini namo.
Mu mire mi alwone pone nanrona ompla namo,
wu wone sa laip waiye nanrona nanrona.
Ka e isi,
wu isi yane Aina God naine.
Ka mee God yangke wu wi mu alele wamo sa mu ese resukru e muru wu.
3 Naminrele mu mopro pone mi e ommo e mu mone isi muru ka mupu namo,
ese pone re e paipe wolpunwokera ommo mingklari namo.
Ka mone mingklari ese samo maime wolpunwokera ka bilipim Aina God ka Auna wunini Jisas Krais.
4 Mu meꞌre piprola mee pai pone sa nale e fa ainemne namo ese samo yimeri ka yeye nanrona mone pinuma mingklari.
Mone ese maime ali
5 Mi namo Jisas Krais isi yopro mu ka mu namee mopro pone re ese pupu:
God wu sa ali ka kureli rola pitiri fei yangkana wu.
6 Le mone fa mire nanrona mone maime wolpunwokera plau God ka mone ke maraimeme nale e ningkiyolo,
sa mone uma fa karmireme ka fi fa mangke nale uporo mi alwone e God.
7 Ka le mone fa mupeneme nale e ali yukaine God wone fa waiye aliye namo,
sa nale namo nro fa yangke mone e maime wolpunwokera makle pinuma mingklari e God.
Ka ori e Auna wunini Jisas namo,
fa yuꞌpole nale fafaile mingklari e mone ka mone maime namkire nama e God.
8 Le mone fa mire nanrona mone uma fi fa mangke nale fafaile,
mone sa uma fa samo karmireme mone kore ka mi alwone sa fi waiye wolpuna e mone.
9 Ka le mone mire alele wu nale fafaile e mone,
wu ese yangke nanrona isi wu yuka mi ese yangke.
Wu ese yangke nale uporo fa ese yem ommo mingklari mone mangke fi uporo,
ka wu ese yuꞌpole ka yangke mone maime namkire wamo.
10 Le mone fa karmireme ka mire nanrona mone isi fi mangke nale fafaile,
sa mone mouw God nanrona mana fa karyire,
ka re,
mi wunini fi waiye wolpuna e mone.