Mi mingklari niye piparola mee fei samo yopro mi alele fina sa isi yeꞌre piparola mee. Ka mi mingklari e histri e Kristen sios sa nopro nanrona piparola mee sa e yolowi Jon. Ka Jon wu aposel namo fina isi waiye ekreneye Jisas. Mi mingklari e niye piparola mee sa yukaine mi nilene Miuporo e Jon Yeꞌre. E Jon yeꞌre piprola mee, nu aposel mingklari e Jisas sa isi rili pu ka mingklari e nu tikse e fa karnirene namo isi nemei ka nemplemaire nu Kristen ese nupele wolpuna wongkeni e Jisas. Nanrona fane piprola mee fai ese keryali nu uma Kristen ese nupene nale uporo e God ka mi fika ese samo yire Jisas wu sa fina.

Ka wolpuna wongke e Jon sa nanrona, wu yire nanrona nu Kristen pinuma ese fei ninayane nu uma e kureli namo, ese karnire ka neingke nu nupone God. Nu “uma e kureli” namo fai nire nanrona, ommo e naine pike mee, sa fei samo uporo. Ka nu re fai nire nanrona, Jisas wu sa Auna e God, nanrona fane wu ese fei yemei yukaine manale ka e fi yuna ommo e pike mee yukaine mone pinuma fai mangkeme namo. Mi wongke nu fai nirene sa nanrona, mana e yire samo waiye nama e God, wu e fi wolaye ommo e pike mee. Nu re fai nire nanrona, nale uporo ka nale e fa samo wolane nu plai namo re sa ompla e pike nro. Nanrona fane, mone pinuma e fi wola mire mupene nale namo. Ka e piprola e Jon namo, Jon wu wone samo wola nanrona, mone Kristen pinuma ese fi mupu ka bilipim mi e nu namo.

E piparola mee, Jon yire keryane mi alwone nanrona Jisas e yemei manale ka nu pinuma e bilipim Jisas namo, ese nupene nale e Jisas fai samo wolaye God ka nu ese samo wolnali nu pinuma plai plau. God wone isi emen plau wolaye mone ka yina Spirit woneni waiye puna e mone uma fai bilipimme wu. Ka wu wone fai keryali nu uma e bilipimne wu namo, e samo naine fori uporo plau God ka nupene nale e Jisas ka mi alwone e God plau.