Mi kero e nu uma fa nuna ommo mingklari namo, sa ese saimo none
5
Pone uma fa punari ommo mingklari namo,
samo ripi parana mi mee.
Pone ese wolpuna mingklari ka samo piri wamo.
E fika,
ekreneye God ese yawane fafaile ese yolowi ka samo yisiyori pone.
2 Ommo uporo uporo poneni namo,
samo fafaile pu.
Ka ommo papri uporo ka amprapi poneni namo,
nu kokoros naurere ka nisinori pekimo kei.
3 Gol ka silva poneni namo,
kiina samo yufona nu ka samo fafaile kei.
Kiina yufona ommo poneni namo,
ese yuku alele nale fafaile poneni e pike mee yire pekimo.
Ka nale fafaile poneni namo,
sa ese samo yisiyori pone ka pone ese pem rere yukaine niꞌpi yuꞌpo nale poneni.
E fika,
pone isi pempoku ommo samo uporo wamo ese aiyemye pone kore e pike mee yire pekimo.
4 Pupu!
Pone fi pali romaula e nu uma isi nangke nengkre wamfafai poneni.
Fane mee,
romaula pone fi pali namo wona wiri ka youw God ese yape fafaile kore pone fa yupene nale fafaile poneni namo.
Nu uma isi nangke nengkrele poneni namo,
wona niri ka wolpuna fafaile Manawamo Yuna Kero Wamo namo,
ese samo yangke fafaile pone.
Ka namo sa yemei ripi wunini pu.
5 E pone paipe pike,
pone isi wola pire ese samo punari ommo upupu ka pangke ommo fa yape pone aiyem wamo.
Pone po ommo uporo uporo wamo ka yangke pone nale mopolwa wamo yukaine ommo kuru fa naine ka norine kaire e fa nufro nu ka none nu.
Nanrona fane pone re wona poripe nro kaire poneni fa ese pem eni wamo laip poneni.
6 Pone isi pangkom mi palo nu uma fi nangke nale fafaile ka pufro nu rili pu.
Nu fi nangke ompla wongke fa ese nape kore nale fafaile poneni namo.
E eni yolowi mone, ese mone meri kero ka moru Manawamo ese yolowi
7 Nanrona fane,
Kristen inomranimpi ka pinefe kinini,
pone ese pem wolpuna raulo ka pori Manawamo ese yolowi.
Pone ese wolrufu nale e mana fa yangke nengkrele.
Wu fa komafre waiye ka yoriye kaire ka riplea nangke ommo wonyane ese yangke pike yangke ommo neri ka nalelwa nale sam uporo wamo.
8 Nanrona fane pone re ese komafre paipe yukaine nu uma e fa nangke nengkre.
Pone ese kerpane wolpuna poneni.
E fika,
Kaire e Manawamo ese yemei alele namo,
sa yolowi ekrene ekreneye.
9 Nu Kristen inomranimpi ka pinefe kinini,
pone faa wolpuna fafaile pone kore.
La e pone wolpuna neni pone kore,
sa Manawamo ese kotim pone yukaine nu uma e fa nangke nale fafaile nama e God.
Wu sa waiyeye nro ka kampruno ese yolowi kore pike mee fa ese yupu kot mingklari.
10 Nu Kristen inomranimpi ka pinofe kinini,
ompla wongke muru ka mupene namo,
sa nale e nu profet e God isi nangkene.
Nu isi samo komafre naine e eni nemeine nu.
Nu isi nungkam eni namo e fika,
Manawamo isi yali nu mi ka nu nangke fa nopro mi alwone wunini pai nu pinuma fa ese nupu.
Nanrona fane mone re ese komafre maime e traim yire yemei mone
11 Pone ese wolrufupe nu uma namo.
Plai e nu fi num ka fi nupone bilip noneni.
Mu muru nu nanrona nu uma isi neri kero ka nungkam eni ka God blesim nu.
Pone namale mi e Jop.
Wu re isi yeri kero ka yungkam eni mingklari yeye pai se sa,
Manawamo samo yangke wu uporo wamo yakle nu plai.b
Pone namale nanrona Manawamo,
wu mana fa samo wolyaure nu pinuma ka samo wolpalo nu ka wolyali nu wamo ka yangke nale uporo nu.
Mone ese fei keromane mi e mone kore ka karmouw noula e Manawamo riri
12 Nu Kristen inomranimpi ka pinofe kinini,
riri ka rikepone ommo mingklari ki kopro nu namo,
pone e fei pouw noula e heven wee pike ka pouw noula e ommo plai ka pouw noula e Manawamo fa e kerpane mi poneni fa nu uma ese nupu mi poneni.
Le pone pire “yei” sa pone pire “yei” ka mi poneni.
Le pone pire “onne” sa pone ese pire “onne” nro sa ese resukru mi poneni.
Le onnele,
sa God ese yangke ompla yemei pone.
Mi fa nesapune ese keryane nu uma ese naine kero bilip
13 Fina e poneni sa yungkam eni?
La e mana yungkam eni,
wu ese yesapu ka yarine God ese mewmew wu.
Ka fina poneni waiye uporo ka aiyem wamo?
Mana e woluporo namo,
ese yeile rai ka yereri noula e God.
14 Fina e pone yenriye?
Mana e yenriye namo,
ese youw nu uma fa painri risine sios namo,
ese noloni ka nina wel wu noula e Manawamo ka nane wu nesapu.
15 Ka nu ese wolpunwokera plau God ka samo bilip nanrona Manawamo ese samo yupu mi e nu nesapune,
ka Manawamo ese yem kore mana e yenriye namo ka ese yereri wu kore.
La e wu isi yangke nale fafaile plai,
sa Manawamo ese yuꞌpole nale fafaile namo.
16 Nanrona fane pone wokwokera ese samo pire mi alwone ka pire mi alele nale fafaile poneni e nu plai ka pakle nu pesapupe,
sa God ese yemplekuru pone kore.
Mana uporo fa yesapu ka yesapu wunini namo sa kero wamo resukru ese mewmew nu plai.
17 Elaijac wu sa mana yukaine mone.
Wu yesapu kero ka yarine God ese fi yawane riple yolo pike ka riple fi yilo pike resukru kikla plainrikera ka 6pla kari.
18 Pai se wu fa yesapu kore ka riple yilo ka yangke pike ommo nengkre nemei kore.
Mana fi yupene rokoi uporo namo, sa mone ese mem wu yolowi kore
19 Nu Kristen inomranimpi ka pinefe kinini,
wongke e poneni yupone mi alwone e God ka pai rokoi fafaile ka wongke yumane wu yolowi kore rokoi uporo,
20 sa mana namo ese namale nanrona,
e wu yenmaire wongke namo fina e yangke nale fafaile namo,
mana namo sa ese yem kore mana wongke fa wu ese fei samo pekini nale e riline.
Wu ese waiye laip yane God nanrona nanrona.
E fika,
God ese yuꞌpole nale fafaile mingklari e mana namo yangkeye.