Mana fa samo wolaye nale e pike mee sa waiye yukaine iim e God
4
Ommo fika sa fa yereryaneye pone Kristen popu mi ka pempopupe pone kore?
Anro ommo wongkwongkeni e fa wolpun yemeiye namo fa yereyaneye wolpuna poneni ka ommo namo fa samo nopu iplele nalpapri poneni ka nale namo nro fa yeingke pone paipe pempopupe pone namo,
wee?
2 Pone fa samo wola pire puꞌpu ommo wongkwongkeni,
ka pone fi fa puꞌpupe.
Nale e pone fa nampalope ommo wongkwongkeni namo,
fa yangke pone popu mi ka karpopupe ka pufro nu uma riline.
Ka pone ese fi puꞌpu ommo namo e pone wola pire pone ese puꞌpu.
Pone fi fa puꞌpu ommo namo e fika,
pone isi fi parine God fa ese puꞌpu ommo namo.
3 E pone fa parine ompla ka pone fi pem,
sa nanrona,
pone fa parine plau wolpuna fafaile mingklari.
Ka e pone parine,
pone fa wola nanrona le pone pem sa pone ese saimopane pone ese fi samo ponsa rokoi rongkele sa uporo fa ese pangke.
4 Pone sa yukaine nu pinmana fafaile fa nupole impi nonengkle ka painri nangke nale pamok.
Pone fi namale nanrona nale e fa samo wolane ompla e pike mee,
fa yangke yene ese waiye iim e God?
Nanrona fane le mana yire yemei fori uporo plau ommo e pike mee,
wu ese yangke wu wone yemei iim e God.
God fa samo wolyane nu uma fa numaro none
5 Buk e God yire nanrona,
“Spirit namo e God yina waiye mone namo,
sa God samo wola wu ese waiye ruwe wu wokera nro.”
Pone pire mi e God mee sa mi siwole wee?
6 Ka wolyane e God sa uporo wamo ka fa mewmewye mone.
Nanrona fane mi wiye buk e God yire nanrona,
“God fa yisiyori ka yumanralo noula e nu uma fa nererine noula noneni namo samo panro,
ka wu fa samo wolyane nu uma fa numaro noula noneni.”
7 Nanrona fane pone ese pumanralo pone ka paipe ruwe kero e God.
Pone ese samo kuma pane Satan ka pupene wolpuna wunini.
Le pone pangke nanrona,
sa wu ese yulpalo ka yupone pone.
8 Pone ese samo wola pane God ka paipi ekrene wu.
Le pone pangke nanrona sa wu wone plau e yolowi ka samo waiye ekrene pone.
Pone uma fa pangke nale fafaile namo re ese namale ka pangke pone paipe namkire nama e God yukaine mana e samo yaklele mew woneni samo namkire.
Ka pone uma e fa wolpuna plainrane ka fa puru kero pike mee pire pupene God,
ese samo pangke pone ese paipe namkire nama e God,
ka pupene wu wokera nro.
9 Ommo fafaile pone isi pangke namo,
ese yangke pone wolpaure ka piripe nro ka paipe.
Ka pone uma e samo wolapeni fa pupope namo,
ese pupone nale e fa nupone ka pone ese samo piri wamo.
Ka pone uma fa aipempe ommo namo,
ese samo wolpaure wamo ka piripe nro ka paipe.
10 Pone ese pumanralo pone ka paipe ruwe e Manawamo.
Le pone pangke nanrona,
sa wu wone ese yuꞌpu pone ka yangke pone paipe aiyem wamo.
Mone ese fi maku mi palo nu plai
11 Nu Kristen inomranimpi ka pinefe kinini,
pone e fi ouwpire nu pinuma e God.
Ka le pone ouwpire wee paku mi palo nu,
sa yukaine pone fi samo wolpane lo e God yire mone samo wolmane nu plai,
nanrona fane pone wona paku mi paloye lo namo.
Ka le yene yaku mi palo lo e God,
sa yuku nanrona yene waiye jas e lo namo.
12 God nro isi yangke lo namo ka wu wokera nro sa waiye jas e lo namo ka pinuma mingklari.
Wu nro sa mana fa yisiyoriye nu pinuma wee yuꞌpu kore nu pinuma.
Nanrona fane yene yire yene fina ka yangkom mi palo nu plai ka ouwyireye nu?
Mone faa wolmuma God ka mupene wolpuna moneni nro e ommo e ningkinama
13 Pone uma e fa puna wolpuna nanrona,
“Anro naminrele wee ningkinama mu ese maimpi taun wongke ka mu ese mangke ommo bisnis ese resukru kikla wokera.
Ka ommo namo ese yangke mu memei romaula mana.”
14 Pone fi namale ompla fika ese yemei ningkinama.
Laip poneni namo,
sa yemei yukaine ruru fa yemeiye mii wori ka pari riri ka fa wampane palo.
15 Ese uporo wamo pone ese pire nanrona,
“Ka le Manawamo wone wolyire mu ese maime,
sa mu ese mangke ommo namo e mu wolame.”
16 Ka pone fi fa pire nanrona,
pone fa pangke ompla ese nu plai nuru pone ka wola nanrona pone samo rikepone uma mingklari ka pone pire mi alele ommo wamfafai pone pire pangke.
Ka nale namo sa fafaile nama e God.
17 Pone ese namale ompla namo.
Ka le pone namale nale uporo wongke e pone ese pangke ka pone fi pangke,
sa pone pangke nale fafaile nama e God.