Samo yopaneye nongkora yeneni
3
Pone Kristen inomranimpi ka pinefe kinini,
seke mone mingklari ese maime yukaine tikse.
E fika,
mu uma fa mukuleme nu pinuma namo,
taim e kot wamo,
God ese samo yonsane ommo mingklari pitpitiri e nene ommo mu isi mangke ese kotim mu.
2 Mone uma mingklari fa mangke ommo wongkwongkeni fa yangke mone fi samo mupene rokoi uporo.
Ka,
nu uma fa samo nopane nongkora noneni namo,
nu uma nanrona,
sa sam uporo wamo ka resukru ese nopane nalpapri noneni plau.
3 E mone mina ain plola hos reꞌfa,
ain plola pitpitiri namo fa yangke hos namo yupene wolpuna e mone ka yangke ompla wola mire wu ese yangke.
4 Pone wolrufu sip.
Sip sa ompla wamo ka fa nempriri kero e rapu kero.
E nu fa nempriri,
stia pitpitiri namo fa yemmaireye sip namo fa paiye koii pei e kepten wola yire sip ese pai.
5 Nanrona fane,
nongkora e mone sa ompla pitiri plola e yeye nale e mone.
Ka nongkora namo fa yangke uku mingklari ka yoproye ommo fa yereriye noula e mone ommo wamo isi mone mangke.
Mone namale,
niꞌpi rola pitiri nro namo ese yangke niꞌpi wamo ka yisiyori ommo mingklari naine ai.
6 Nongkora e mone namo,
wu sa yukaine niꞌpi.
Fa yuna ommo mingklari fa samo yangke nale e mone yemei kiina.
Ka nongkora namo ese samo yisiyori laip moneni yukaine niꞌpi fa yuꞌpo ommo mingklari.
Ka niꞌpi namo,
sa niꞌpi e Hel wone.
7-8 Nomu e ki kire nongkora e mone samo fafaile sa nanrona,
wongke e nu pinuma e pike mee fina resukru ese yopane nongkora woneni.
Mana isi yuꞌpu ommo kuru wongkwongkeni,
yukaine rora,
ka nu ommo wongkwongkeni pitpitiri ka wamfafai e ai,
furu mana yopane nu,
ka re mana wona yuꞌpuye ommo namo ka yuruye nu.
Ka nu pinuma e pike mee wongke sa fi resukru ese samo yopane nongkora woneni.
E fika,
nongkora e mone namo,
sa fa waiye yilpeleye nro ese yopro mi fafaile wamo.
Ka ompla namo nro sa fa samo yisiyori nale moneni yukaine marasin fafaile fa yangke mana riye yimeri waiye reꞌfa moneni
9 Nongkora moneni namo fa mereri noula e Manawamo ka Aina moneni.
Ka mone fa mire mi fa yisiyori nu uma plai e God isi yangke nu yukaine wu wone.
10 Reꞌfa wokera moneni mee nro sa fa yangke ompla plainrane,
wongke fa yereri noula e Manawamo ka wongke fa yisiyori nu uma.
Pone Kristen inomranimpi ka pinefe kinini,
God fi fa mewyimaine mone mupene ommo plainrane e nongkora moneni fa nangkene namo.
11 Nupi yane furu fi fa noloni nemnoku naine mii pulale wokera.
Sa ese onnele.
12 Pone Kristen inomranimpi ka pinefe kinini,
ilo fik ese nalelwa nalale e ilo oliv plau wee onne?
Ka anro ilo wain ese nalelwa nalale e ilo fik plau wee onne?
Nanrona nro,
furu re ese fi yangke mii raulo uporo fa naikonone.
Nanrona fane,
reꞌfa poneni ese samo popro mi uporo nro e ripi e nu pinuma ka God.
Rokoi plainrane e ira uporo
13 Fina e poneni sa yuna ira ka wolpuna uporo waiye wone?
Le mana nanrona waiye sa,
wola uporo ka ira wunini ese yangke wu yumaralo ka waraiye nale uporo sa nu pinuma ese nuru.
14 Le pone fa wolpuna fafaile uma plai ka wolpuna poneni sa yuna nale fa yapu rokoi fa mewmew pone nro,
pone ese fi pereri noula poneni ka ese fi karpirepe ka pumaralo mi alwone.
15 Ira uporo nanrona seke yolo heven ka seke yolo God.
Ira uporo namo sa yemei wolpuna e nu uma nro.
Ka wu sa ompla e pikeni fane,
ka Satan wu sa yangka ira uporo namo.
16 Nomu e ki kire mi mee sa nanrona,
uma fopi fa wolpuna fafaile nu uma plai ka fa napu rokoi wongkwongkeni fa nererine noula noneni namo,
sa ningkikaire ese mone muru nale fa wewelane ka fa samo naine uporo namo sa onnele.
Ka re ese mone muru nale e wongkwongkeni sam faifaile re ese nenene.
17 Ka nu uma e nem wolpuna ka ira uporo yolowi God,
nu uma namo ese nangke nale nanrona:
nale e fa samo naine namkire nama e God,
sa nale e fa wolane nu plai ka samo nemnoku naine plau,
nale e fa wolpalo nu uma plai,
ka nale e fa samo wolpunwokera uma plai,
ka nale wamo e fa wolyane,
ka nale e fa samo wolpalone nu uma plai,
ka nale e fa wolpuna uporo fa yangke nale samo uporo uma plai.
Nale namo nro,
ese mone mangke pai uma mingklari ka ese fi mangke pai uma plai nro.
Ka nale namo,
fa karnirene sa onnele fi waiye wu.
18 Le mone maime wolpunwokera,
namo sa yuku nanrona mone mokle ommo wela.
Ka nale e wolpunwokera namo,
sa nale uporo laip moneni yukaine ommo uporo e nengkrele.