Yene e fi wolyane nu uma plai nro
2
Pone Kristen inomranimpi ka pinefe kinini,
mone uma fa bilipim mana namo fa yuna noula wamo ka namba,
noula wunini Jisas Krais.
Ka e nale poneni fa wolpane plai ka fi fa wolpane nu plai,
anro nale nanrona sa yuku rona pone ro samo bilipim wu wee?
2 Le pone pempoku paipe mow kori ka mana plainrane noloni plele pone paipepe.
Wongke e wuyane sa rana ommo papri uporo ka yana ring e nu nangke gol mew mempi wunini,
ka wongke sa mana e ommo onne wu fa ranaye ommo kinale fafaile wamo.
3 E wuyane noloni plele ka pone puru wuyane,
pone pangke nale uporo mana namo e rana ommo papri uporo ka pone pireni wu nanrona,
“Yene yolowi ka waiye sia uporo mee.”
Ka pone pireni mana e ommo onne nanrona,
“Yene pai ka yeri nanri,”
wee “Waiye funrola ekrene irmarala e ki fa rew kauneke namo.”
4 Le pone pangke nale namo nanrona,
sa yukaine pone fa weikerpuru nu plai wolpuna poneni.
Ka pone fi wola uporo ka kosamo puru nu uma mingklari plai resukru nale nanrona.
Samo onnele.
Pone ke paipe pukaine jas fa kosamo purupe nu uma wolpuna fafaile nro.
5 Pone Kristen inomranimpi ka pinefe uporo kinini,
ki wolkane pone wamo.
Nanrona fane ki kire pone ese pupu mi kinini ka pemplekuru wolapuna ka nale poneni.
Nu uma e ommo onne naine pike namo,
nu uma namo,
sa God yuꞌpu nu pu ese naine uporo nale e fa bilipne.
Isi,
wu yuka mi pu e nu uma fa samo wolane wu namo ese nane wu naine kingdom e wu.
Nanrona fane wu yuꞌpu nu uma e ommo onne nama e nu uma e pike ese nane wu naine plau kingdom e wu.
6 Ka pone isi pangke nu pinuma e ommo onne sem wamo.
Ka fina fa yisyori pone ka yeingke pone polo ka peri nama e kot?
Nu uma e nunari ommo ka romaula mingklari pone fa puru nu nanrona nu sa uporo wamo,
nu uma namo sa fa nane eni wongkwongkeni pone.
7 E isi pone bilipim Jisas namo,
nu uma nouw pone e noula uporo e wu.a
Ka noula namo nro,
uma namo nunari romaula mingklari ka ommo mingklari e pone fa puru nanrona uporo wamo,
fa nisinorine noula namo.
8 Pone ese pukaire lo yukaine God,
King e mone,
yame mone wiye buk God sa yire nanrona,
“Pone ese samo wolpale nu plai yukaine pone fa samo wolpane pone kore.”
Le pone pangke nanrona sa,
pone pangke ompla uporo wamo.
9 La e pone wolpane mana wongke ka samo pangke uporo wu ka fi samo wolpalo wongke ka pone pangke fafaile wu,
namo sa yuku alele wamo nanrona pone fi pupene lo ka pone pangke ommo fafaile wamo nama e God.
10 Le mana yukaire lo mingklari ka samo yupene ka wu koroyane lo plola wongke,
mana namo yire alele wone kore nanrona wu mana fa yekri lo mingklari e God.
11 God namo nro yame mone lo plainrane sa yire nanrona,
“Yene e fi yangke nale pamok,”
ka “Yene e fi yufu mana ri.”
Le yene samo yupene lo ka fi yangke nale pamok,
ka yene yufu mana ri,
sa yene mana fa yekri lo.
12 Nanrona fane e pone popro mi o pangke ompla wongke,
pone ese samo namale rona lo fa yangke mone maime nale engkem namo,
ese samo kotim mone.
13 E fika,
e mone maime kaire e kot wamo e God,
wu ese fei wolpaloye nu uma fopi isi fei wolpalone uma plai.
Ka mana e yukune nale e fa wolpaloye nu uma plai e waiyeye pike mee,
sa ese rikepone kot namo.
Bilip fei yangke nale uporo namo, sa yemei ompla siwolenro
14 Pone Kristen inomranimpi ka pinofe kinini,
la e mana wongke yire nanrona,
“Ki fai bilipimke Krais,”
ka wu ke fei yangke nale uporo nu uma,
bilip wunini namo sa ompla siwolenro.
Ka bilip wunini namo ese yangke ompla fika uporo wunini ese yem kore wu?
Sa onnele fane!
15 Le Kristen inomranimpi wongke wee pinefe poneni ommo amprapi uporo onne ka ommo fa woye re sa onnele.
16 Ka wongke e pone ese yireni wu nanrona,
“Kaire uporo yene ka yene ese yem wolpuna raulo.
Yene ese yufona amprapi ka yaukiri nalpapri yeneni ka yene pai yem ommo wo ka reryane puna yeneni.”
Le pone fi samo namale ommo e wu wolaye ka fi mewmew wu,
mi poneni namo ese mewmew wu rongkele?
17 Nanrona nro bilip ese fi waiye wonkerila.
Le mana fi yuku nale uporo nu uma,
sa bilip wunini namo sa puꞌlo nro na e fi yangke ompla wongke.
18 Ka,
mana wongke yire nanrona,
“Yene yuna bilip ka ki kuna nale fa kangke uporo uma plai.”
Nanrona fane yene yuku ki bilip yeneni e Jisas namo sa fi yuna nale uporo.
Ka ki ese kangke nale uporo ka namo ese yuku yene bilip kinini.
19 Uporo wamo e yene bilip nanrona God wokera nro sa waiye.
Ka,
puru!
Bilip nanrona fi resukru,
nu opola fafaile re fa bilipne ompla namo.
Ka ompla e God wokera nro waiye namo,
fa yangke nu num wamo ka forworine.
20 Kungkumple mana,
yene yire namale nanrona bilip fi yuna nale uporo wunini namo,
fi yangke ompla uporo wee?
Mee,
yupu.
21 Yene samo namale nanrona God isi kosamo yuru nale uporo ka samo namale flili e mone Abraham nanrona,
mana sam uporo wamo e yina auna wunini Aisak wiye alta riri ka yire yangke ofa pari God.
22 Yene namale nanrona,
bilip ka nale e wu fa nemnangkana plau.
Ka nale wunini namo samo yuna bilip wunini.
23 Nanrona fane ompla namo yemei yukaine mi wiye buk e God sa yire nanrona,
“Abraham samo bilipim God ka God wone namale bilip wunini ka wu wone yire alele nanrona Abraham wu sa mana fa yangke nale uporo.”
Ka God youw wu nanrona “Fori uporo kinini.”b
24 Nanrona fane yene ese ro namale rona,
mone e maime uporo nama e God e mone mangke nale uporo uporo e wone wolaye e mone bilipim wu.
E fika,
bilip nro ese fi yangke mone memei uporo nama e God.
25 Nanrona nro,
Rahap pin fa yangke nale pamok namo peki yenru nu uma e Josua isi yawale painri pekinuru taun namo.
Ka ingke Rahap yawane nu painri rokoi wongke ka nu fi painri kore rokoi isi none noloni namo.
Ka God yuru nale e Rahap yangke namo ka youw wu pin uporo.
26 E fika,
bilip e fi yuna nale uporo waiyeye namo,
bilip namo sa puꞌlo nro.
Nanrona fane,
spirit fi waiye nale namo,
nale namo sa laip onne.