Kaire uporo pone mingklari.

Piprola e ki keꞌre mee,

sa e pone uma e bilippe e paipe 12pla ori oinkenra e Israel isi pupone mokoi e mone ka paipi paipe mokoi plai e pike namo.

2 Pone Kristen inomranimpi ka pinefe kinini,^a

e ommo wongkwongkeni faifaile nemei pone,

sa pone ese woluporope wamo.

3 E fika,

pone namale nanrona,

ommo fafaire wongkwongkeni ese nemei fa e neingkari bilip poneni,

sa ommo namo fa noloni ese keryane bilip e pone.

4 Pone ese peri kero bilip poneni.

Le pone pangke nanrona sa,

ese mewmew pone peri kero ka pone ese fi pupone nale wongke e God wolaye.

Samo onne!

Nale poneni ese samo uporo ka alwone wamo.

5 Le wongke poneni fei yuna ikakro uporo wee ira uporo,

wu e as yesapu ka yarine God ese yane ikakro uporo wee ira uporo e wu onnele namo.

God e mone namo,

wu mana fa yaliye nro ka wu fi fa yenre mana e yariye.

Samo onne!

Wu fa yali nro mana fina e yariye wu.

6 Ka e mana yarine God ese yane wu ira uporo wee ikakro uporo,

wu ese fi wolpuna plainrane e wu yarine God yane ommo wu.

Wu ese waiye wolpun wokera ka bilip rona God ese samo yireni kore mi e wu yariye namo.

Ka wu e fi wolplainrane God e ompla namo.

E fika,

le wu wolplainrane mi e wu yariye wu namo,

sa ese yukaine rapu fa yenyuye furu ka furu yemei ka pikariye.

7 Mana nanrona,

wu namale nanrona Manawamo e fi resukru ese yane ompla wongke wu.

8 Mana nanrona,

wolpuna wunini fa pikari plol plainre.

Nanrona fane,

e ommo mingklari wu fa yangkeye,

ikakro wunini fa wawiri mingklari ka ira uporo onnele e rokoi pei sa uporo wu ese yupene.

9 Le Kristen wongke inomranimpi wee pinefe waiye yaimari,

mana namo o pin namo aiyem kei,

e fika,

e nama e God wu yuna noula wamo.

10 Ka nu uma nunari ommo mingklari namo,

ese ainem e God yumanralo nu.

E fika,

nu ese firipanro ka nupone laip noneni yukaine ommo ula fa rouwlini ka plelerine.

11 E fika,

e kaire yeri yeꞌri riri,

wu fa ali kero wamo ka wori wunini fa yekri kiprela ka rouwlini kei.

Ka ula uporo nunini namo,

fi fa wampane rouwlinine ka ingke pleleri.

Nale nanrona ese nemei nu uma e nunari ommo mingklari namo.

Nu re ese rili e nu na naine ka nangke ommo noneni.

12 Pone uma fopi fa peri kero ka wolpane God e ommo wongkwongkeni fa noloni nengkarine pone namo,

ki kirepi pone nanrona,

God fa blesim pone wamo.

E fika,

pone fai peri kero yolowi plele e pekimo e ommo wongkwongkeni nengkarine pone ka pone fa peri kero e wolpanepe God,

God wone isi yuka mi pone pu fai wu ese yali aiyem uporo wamo pone.

Aiyem uporo namo,

sa laip namo fa waiye nanrona nanrona.

Wu ese yali ompla namo yukaine wu wone isi yuka mi pu ese yali nu uma fopi fa wolnane wu wamo.

13 Le ompla wongke yeingkari mana wongke ka wu yire yangke nale fafaile,

sa mana namo ese fi yire nanrona,

“God nro e yeingke ki kangke ompla fafaile namo.”

Mone namale nanrona,

God fi fa yinayane nale fafaile ese yeingke wu fa yangke nale fafaile.

Ka re,

God fi fa yeingke nu uma ese nangke nale fafaile.

14 Ka rokoi e nale fafaire fa yeingkariye nu uma namo,

fa yolowiye nu uma e wolpuna noneni fa samo nemeine ommo fafaile.

Nanrona fane wolpuna e mana wone fa samo yeingke wu ese yangke nale fafaile.

Ka mana wone fa samo wolyane ompla fika fa yeingkeye wu namo.

15 E wolpuna e mana yemei yire yangke nale fafaile namo sa pai resukru ese nalelwa nale wunini.

Ka nale wunini namo,

sa nale fai yangke nale fafaile.

Namo sa yukaine pin e mela plau ka yem mela woneni.

Ka e nale fafaile yemei wamo pu,

namo re nalelwa nale wunini.

Nale e wu yangke yemei namo,

sa nale fai ese ri kore.

16 Ki kirepi pone Kristen inomranimpi ka pinefe uporo kinini,

ki fa wolkape pone wamo.

Ki kire kirepi pone nanrona,

pone ese fi ira wawiri rokoi fa nupene fafaile ka rokoi e mi fi alwone namo.

17 Ommo mingklari uporo mone fa mem ka ommo e uporo wamo namo,

fa naine heven riri ka nolone mone.

Ommo namo sa noloni God wu sa Aina e kaire,

kari ka kikla fa aline nemi riri.

Fa waiye nanrona.

Wu fi yukaine malma e ommo kaire yekriye nu ka yangke malma nunini fa pai wamo se sa yolowi pitiri.

18 E wolpuna e woneni nro,

wu yemei Aina moneni.

Wu yangke mone,

wu e yame mi alwone woneni mone se sa mone bilipim wu ka mee mone maime yukaine nu uma e fa painri risine nu pinuma mingklari ka ommo mingklari wu ese yangke nemei keklepe kore.

19 Pone Kristen inomranimpi ka pinefe uporo kinini,

ki fa wolkane pone wamo.

Pone samo puna mi mee:

ripi poneni samo ikoiyi ka pilpele ese faflai pem mi e God.

Ka pone e fi faflai penrume reꞌfa ka pire mi wongke.

Ka re pone e fi wampane wolpuna neni.

20 E fika,

e mana wolpuna neniye,

namo fi fa yangke nale uporo e God wolaye.

21 Nanrona fane pone ese puꞌpole ommo mingklari fa pangke pone paipe kiina nama e God ka nale fafaile wamo e pone na pangkepe namo.

Pone e samo pumaralo pone ka pem mi yukaine God isi yoku wiye wolpuna poneni namo.

E fika,

mi namo sa kero ese yuꞌpu kore pone.

22 Pone faa pupu mi namo ripi nro,

pone ese samo puna ka won pupenepe.

Le pone karpupupe nro,

sa pone karpangke pone kore.

23 Le e mana yupu mi namo ka fi fa yupene mi namo,

sa wu yukaine mana fa yuru ungklama woneni kore e glas fa nurune ungklama.

24 E wu yuru ka namale wone kore ka laip keklepe woneni e wu yupu mi Godni,

se wu pai,

wampane nro wu wolyumaro ungklama woneni se waiye yukaine man rongkele.

25 Ka lo namo sam uporo wamo fa yekri kero e nale fafaile ka yangke mone maime nale engkem.

Le yene kosamo ronsaroye lo namo ka waiye yangkeye ompla namo nanrona ka waiye yangke ompla yukaine e lo yireye ka fi wolyumaro mi isi yene yupuye,

God ese blesim yene e ompla fika e yene yangkeye.

26 Le mana wongke yire nanrona wu fa yupene wola e God ka fi saimoro mireꞌfa woneni,

sa mana namo fa karyire wonekore.

Ka nale lotu ka bilip woneni namo,

sa onnele.

27 Nale e Kristen waiye uporo wamo ka eni onne nama e Aina God e mone sa nanrona,

mone samo mopane kongkom e moka nangka noneni rili pu ka nu pinmana e impi rili ka nupone nu pu e eni nine nu.

Ka re,

mone samo murume nale e mone ka nale e pike namo ese fi yeingke mone ka yangke mone maime kiina nama e God.