Yene ese samo yoproyukule nu pinuma ese nupene nale God wone fa wolaye
2
Ka Taitus,
yene ese yukule nu pinuma ese sam nangke nale uporo fa ese nupene mi alwone e God ro.
2 Yene ese samo yoproyukule nu uma alma namo fa
nu e kosamo nurune nale e none.
Nu ese nangke nale uporo sa ese nem noula uporo.
Nu ese samo nupene ira uporo nro.
Nu ese samo namale ka bilipim God,
ka nangke nale e fa samo wolnanene nu plai,
ka nale e fa neri kero ka nungkam eni e taim e eni nine.
3 Nanrona fane,
yene ese samo yopro nu pinmana alma namo ka yukule nu sa
nu ese samo nupene nale e God fa wolaye.
Ka nu e fi ouwnirene nu plai.
Ka nu e fi ninayane mii kero mingklari konrare wolpuna noneni ka yangke nu naine pinmana siwole fa karnangke ompla e nale namo.
Ka nu e nukule nu plai ese nangke nale uporo nro.
4 Le nu nangke nale nanrona,
sa nu ese resukru e nukule nu pinmana e nuꞌpu uma rokoi e ommo namo sa nanrona,
nale e fa samo wolane impi noneni wokwokera ka kongkom e none plau.
5 Ka nu pinmana e nuꞌpu impi namo ese
nupene ira uporo uporo nro,
ka nu e naine yukaine ommo e namkire nama e God.
Ka nu e sam nopane mow noneni,
ka nangke nale uporo nro e nu uma mingklari.
Ka nu ese nupele none impi wokwokera ka nupune mi e none impi nro.
E nu nupene ommo mingklari e nene riri namo,
se pinuma mingklari e fi ouwnirene mi e God.
Taitus ese yangke nale uporo se nu kongkom efapu namo ese nupene
6 Nanrona nro,
Taitus yene ese yereryali wolpuna e nu efapu sa nu e samo nupene ira uporo nro.
7 Ommo mingklari yene ese yangke,
yene e yangke nale uporo nro fa nu ese nuru ka nupene.
E yene yukuleye nu,
yene e fi karyireye o wewela ka fongkroleye.
Yene e sam yangke ommo alwone ka yopro mi alwone nro.
8 Nale wongke ese yene yangke ka nu plai ese nupene,
sa nanrona,
e yene yukule nu uma,
yene ese yangke mi wonaye nro se nu uma ese fi napu mi wongke e koroyane mi e mone.
Ka le nu iim uma e mone nire fa e napu eni e mi e mone,
sa nomu onnele e nu nire nisnori mi e mone namo,
sa nu ese samo refale wamo.
Nu wokboi ese samo nupene mi e manawamo e none
9 Yene ese yopro yukule nu wokboi siwole nanrona nu e fi numaro manawamo e none.
Nu ese samo nangke ommo nunini sa manawamo e none e woluporo wamo.
Ka nu e fi nire mi rola fafaile manawamo noneni.
10 Ka nu ese fi pekinuꞌpune ommo e manawamo e none.
Ka nu ese samo nupene mi e manawamo noneni ka nale namo nro yangke manawamo e none ese yuru nanrona ommo fikfika e nu fa naline nu nangkene namo,
nu fa samo nangke namkire.
Ka nale namo nro,
sa nu wokboi ese nangke nu uma mingklari ese nane noula wamo pai mi alwone e God,
mana fa e yuꞌpu kore mone.
11 Ki kirewi yene ese yopro yukule nu uma e God e ommo namo se nu uma plai ese ainemne nale e God,
e fika wolpuna e God isi yemei alele nu uma mingklari pu.
Ka wu sa resukru ese yuꞌpu kore mone.
12 Wolpuna e God sa fa yukule mone ese mupone nale e fa momplewame ka kuma maneme God ka nale e fa wolame ommo e pike.
Yukaine mone e maime iplele e nu pinuma e pike mee,
ka wolpalo e God fa yukune mone e mupeneme ira uporo nro,
ka mangke nale uporo ka re mupeneme nale uporo nama e God.
13 Ka mone ese bilip kero ka maime aimeme ka morime Jisas Krais ese wi sa mone ese muru.
Wu God kero wamo ka wu mana fa yuꞌpu kore mone ese yolowi plau glori wamo e wone.
14 Wu e yupone laip woneni ka ri fa ese yuꞌpu kore mone ka yuꞌpole nale fafaile mingklari e mone.
Wu yangke rona fa ese yangke mone ese maime namkire nama e wu ka re ese maime uma woneni nro.
Ka mone ese maime mangke nale uporo nro.
Ka mone ese samo maime ka ilpeleme nro ka mangke ommo uporo.
15 Yene ese singke yali noula wamo e yene yunaye namo fa ese mi kero nu pinuma fa e yereryali ira e nu se nu ese nupene.
Ka yene re e yali mi kero nu pinuma fopi e fa samo kuma nane mi namo sa nu ese saimoro nale nunini.
Ka yene ese fi yimaine nu uma ese numanralo mi yeneni.