Piprola e Pol yeꞌre pai
Taitus
1
Ki Pol,
mana siwole fa karkangke ommo e God ka re kaike yukaine aposela e Jisas Krais.
Wu yawane ki kaiki fa kerkale nu pinuma e isi wone yaure nu ese naine yukaine nu uma woneni ka kererkali bilip nunini yemei wamo,
ka re nu ese samo namale mi alwone e wone.
Mi alwone namo sa rokoi fa nupene nale uporo yukaine e wone wolaye.
2 Ki kangke ompla namo e mewmew nu ka kerkale bilip e nu pinuma e God sa nu e neri kero,
ka naine ainemne ka norine God ese yali nu laip fa waiye nanrona nanrona.
E God fi yangke ommo wongke yemei alele,
wu isi yuka mi pu ese yame mone laip fa waiye nanrona nanrona.
Ka God namo fi fa karyireye mi wongke.
3 Resukru taim e wu yinaye,
God mana fa yuꞌpu kore mone namo,
wu ese yangke mi e wone yemei alele ka wu yina ommo fa nopro mi wunini yolowi mew kinini.
4 Taitus,
ki keꞌre piparola mee pai yene.
Yene waiye yukaine auna kinini,
ka bilip e yene yunaye namo sa yukaine bilip e ki kunake.
Aina God yane Krais Jisas,
mana fa yuꞌpu kore mone namo,
ese wolnane yene ka ese nane wolraulo yene.
Taitus ese yapu nu uma uporo ka yuꞌpu nu fa e nangke ommo e sios
5 Nomu e ki kupone yene waiyeye ailan Krit namo sa nanrona,
yene ese yangke ommo plola e nenene namo,
ka re yene ese yuꞌpu nu irauma e sios mingklari e naine taun mingklari namo,
yukaine isi ki kirewi yene.
6 Yene ese yuꞌpu uma e nu pinuma fi napu eni wongke e nu nangke.
Nu uma fopi e yene yire yuꞌpu namo ese nuꞌpu pinmana wokera wokera nro ka kongkom e nu fa bilipne Krais.
Ka kongkom e nu namo,
e fi nem noula fafaile yukaine kongkom fa wewela ka aikokene ka nangkrumone mi.
7 Nu uma ese yene yuꞌpu nu namo,
sa ese painri risine ommo e sios ka nopane ommo e God.
Nanrona fane nu ese fei nangke ommo ese nangke nu pinuma e nuru nu nanrona nu uma fa nangke nale fafaile.
Nu e fei wolnire nanrona nu sa neri lida ka nuna noula wamo ka nufro none wolpoku ka nu ese nangke nale fafaile nu pinuma.
Nu e fi naikolno ka forwo ka wolnane romaula ka ommo wongkwongkeni e pike mee.
Nu ese fi faflai wolpuneni,
ka e fi poinpain nopune nu pinuma.
8 Nu ese
nangke nale uporone nu uma fopi e nolonine mow nunini.
Ka nu ese naine yukaine uma fa samo wolnapa ommo uporo e God nro.
Ningki kaire nu ese nupene ira uporo uporo nro,
ningkikaire nu ese nangke nale uporo nu pinuma, ka
nale none pai God fa e samo naraine uporo nama e wu, ka
nu ese samo nurune none sa ommo fafaile e fi nemei wolpuna noneni.
9 Wu ese samo yuna ka samo bilipimye mi alwone e God isi wiyeye ka yolowi plele naimele e mu mukule nu namo.
Nanrona fane nu ese resuku nukule nu pinuma plai mi alwone e God ka nu ese samo bilipim wu.
Ka e rokoi namo nro,
sa nu resukru ese nereri wolpuna e nu uma ese nupene mi alwone namo.
Le uma plai fa wolwongkenine mi alwone namo,
sa nu e mi nuforo se nu e namale ka nem ira uporo e nu wi kore nu.
Ailan Krit namo sa, yuna nu uma e fa karnirene ka pekinumalene nu pinuma sa nu e fi bilip
10 Yene ese samo yuru nu uma uporo ka yuꞌpu nu ese nangke ommo e sios namo.
E fika,
nu uma e fa ikakrinrikerolene ka aikongkene ka fi fa wolane mi alwone,
mingklari e nu sa naine mokoi namo.
Nu wona poipai noprone mi wongkwongkeni ka neinnensorone ka nisnorine wolpuna e nu pinuma.
Ka nu uma mingklari namo,
sa nu uma e Juda ka nu fai nangke nale namo wamo.
Nu uma namo fa neri kerone nale ka ira e fa naurene papri.b
11 Mone ese maukuri rokoi e nu uma namo fa naraine mow e nu uma plai ka karnangklene ka nisinorine ira ka wola e nu uma e bilipne namo.
Nale namo e nu karnirene ka nisinorine ira ka wola e nu ese nangke ommo mone pinuma ese fei mangke.
Nu fa naraine mowmow ka samo nisnori nale uporo e nu uma nainene namo ka re nu nangke pinuma nali romaula e ikaparmi e nu nopro nukule nu pinuma namo.
12 Isi mana wongke e fa samo namaleye mi ka nale e none e ailan Krit namo yire nanrona,
“Nu uma e Krit namo,
nu sa uma e fa karnemprene mi ka nu sa uma fafaile wamo yukaine ommo kuru e mouleni.
Nu fa samo wolnapane ommo e fa nonene ka karnailene fi nangke ommo plai ka nilene nro.”
13-14 Mi namo sa won alwone.
Nanrona fane yene won e yenreleye nu mi kero ese yangke nu e nemplesoro nale e nu sa nu e fi nangke nale fafaile namo kore.
Sa nu e samo bilipim God ka e fi nupene waiwai mi e nemei wolpuna e nu Juda,
ka lo wongkwongkeni e nu uma fa samo kuma nane mi alwone namo.
15 Nu pinuma e naine namkire ommo e God wone yangkeye,
nu ese no ommo wongkwongkeni ka nu ese naine namkirec nama e God.
Ka nu uma fa nangkene nale fafaile wongkwongkeni nama e God ka fi fa bilipimne Krais,
ommo mingklari namo sa fafaile wamo nama e God.
Ka nale fafaile e nu namo ke samo yisyoriye wolpuna nunini wola nu fei namale nale rongkele sa uporo ka nale rongkele sa fafaile.
Ka nale namo fei yangke nu sem ompla wongke.
Sam onne!
16 Nu fa nire nanrona nu sa namale God.
Ka nale e nu sa yeingkyane nu naine alele yukaine nu fi fa wolnane wu wamo ka samo kuma nane wu.
Nale e nu sa samo fafaile wamo,
ka nu fi fa nupune mi.
Ka nu fi sam resukru ese nangke ompla wongke uporo.