Yene ese yangke nale uporo nro
3
Nu bilip pinuma e isi nupu mi namo pu,
mee yene won e yireliye nu mi namo kore se nu sam nupu.
Mi namo sa nanrona,
ningki kaire nu ese naine mewwola e nu king ka gapman e none,
ka nupu mi nunini ka naine saimorone e nangke nale uporo nro.
Ka ningki kaire,
nu ese samo nai ka nangke ommo uporo nro.
2 Nu e fi minrine nu plai o nakle nemnopu mi.
Nu ese numanralo none ka samo nai ka nuꞌpu uma mingklari yukaine fori noneni ka naine nangke nale uporo nro pai nu.
3 Yene ese samo yirengkle nu pinuma e fa bilipne ese nangke nale uporo namo nu gavman ka nu uma plai,
e fika isi mone re,
fi kosamo maime muru ka mangke nale fafaile namo:
Isi mone maime nale fa mangkrumo mi,
aikongkeleme ka maime yukaine uma e fa kungkumpleme ka mupeneme nu uma fa karnire mi ka refalane mi.
Ka e taim namo,
mone isi maime yukaine mana e kalabusye nale e fa wolpun yemeiye ommo ka nale e fa nampalolene ommo e pike.
Ka e taim namo re,
mone isi mamplo renro nale e fa karwolpun nenine ka noko mi nu uma plai.
Ka ommo wongkwongkeni namo isi yangke nu plai naine yukaine iim moneni ka mone re isi maime yukaine iim nunini.
4 Ka God,
mana fa yuꞌpu kore mone namo,
yuku nale uporo woneni fa wolyaure ka samo wolyane mone pinuma e pike ka yangke nale woneni namo yemei alele,
5 ka yuꞌpu kore mone pu.
Wu seke yangke nale namo e ommo uporo isi mone mangkeme.
Onnele!
Wu wone isi sam wolpalo mone ka yangke ompla namo ese yuꞌpu kore mone.
Wu yuꞌpole ommo fafaile mingklari isi nene mone.
Ka Holi Spirit e wu wone ese yame laip keklepe ka mone ese memei kongkom keklepe woneni.
6 E nale uporo e God wone,
wu yangke Jisas Krais mana fa yuꞌpu kore mone,
God kiryaiku Holi Spirit woneni wamo mone.
7 Ka nale uporo woneni fa wolyaliye mone namo,
ese yangke mone maime yukaine pinuma uporo nama e God.
E namo nro ka God yaure mone pu e maime yukaine kongkom woneni,
ka morume wu nro ese yame mone laip fa waiye nanrona nanrona.
8 Mi namo sa alwone ka mone ese samo bilipim.
Ki wola kire yene ese samo yopro mi alele e mi mingklari namo fa nu pinuma e bilipne God ese neri kero ningki kaire samo nurune rokoi fa ilpelene ka nangke nale uporo nro.
Nale namo,
sa uporo wamo ka ese samo saimoro nu pinuma mingklari.
9 Ka,
yene e fi ripi yaranaye irkaparmi e nu uma fa karwolpuna neni wamo nu uma plai,
o nu uma fopi e fa karnirene ka nopro mi mingklari euwlankren noula e nu flili e isi,a
o nu uma fa nemnopu mi ka karwolpun nenine mi e nenene lo e Moses.
Mi namo,
sa engkemmule ka e fi samo saimoro laip moneni.
10 Le mana wongke yire mi rola yem yangkrupu uma ka pone paipi ka pinanpai,
nam mee sa yene ese samo yane mi kero wu ese yemaire nale wunini.
Ka le wu fi yupu mi yeneni ka yangkeye nale namo,
sa yene e sam yane mi kero namo kore wu.
Le wu fi yupu mi yeneni ka na yangkeye nale namo,
sa yene mewyimaine wu ka kuma yane wu.
11 Yene namale pu nu uma nanrona,
e nupone rokoi uporo pu ka panro renro rokoi e nale fafaile.
Nu uma nanrona,
fa nangke ommo fafaile nama e God.
Ka ommo fafaile e nu nangkene nama e God namo,
e kotim nu uma namo pu.
Mi rolpitiri Taitusni ese pai yuru Pol
12 Ki ese kawane Artemas wee Tikikus pai yem koii e yene namo.
Ka e yene yuru wongke e wuyane sa yene ese wampane yolowi yuru ki taun Nikopolis.
Ki isi wola kina kire kaiki kaike taun namo,
e fika ekreneye ese taim e riple ka koii ese samo raulo ka ki wola kire kaiki kaike namo.
13 Apolos yane mana e namale lo noula Senas,
ese painri rokoi.
Nanrona fane yene ese samo yuruye wuyane ommo fika fa ese mewmew wuyane e wuyane ommo onne.
14 Nu Kristen pinuma moneni e ailan Krit namo e fi karnai,
nu re ese samo nem ira yukaine yene e nale uporo fa mewmewne nu uma fopi e ommo onne.
Yene ese fi mewyimaine nu Kristen karnai ka fi nupene nale uporo e God sa ommo e nu nangke namo e fi nemei wamo.
15 Pinuma mingklari e ki kakle maimeme mee nire kaire uporo e nu pai yene.
Ka yene re ese yali kairuporo e mu pai nu pinuma fopi e fa bilipne Jisas ka fa samo wolane mu ka nane yene naine namo.
Wolpuna e God ese waiye plau pone.