Nu uma ese nangke nale fafaile taim e pike mee yire pekimo
3
Ka yene ese namale nanrona,
ekrene taim e pike mee yire pekimo,
eni mingklari fafaile wamo ese nemei.
2 Nu uma ese samo wolane romaula ka wolpalo none kore.
Nu ese nereri noula noneni kore ka wewelane ka nangkrumo mi ka nire mi fafaile ka kar nakle nu plai nopune.
Nu e fi nupu mi e moka nangka e none ka re nu e fi nire tenkyu nale uporo fa nemei nu.
Nu ese samo kuma nane nale e God.
3 Ka nale uporo e nu fa naine woluporone nu plai namo,
sa onnele.
Ka nu fi fa wolnumaro nale e nu plai fa nangkene nu.
Nu fa naine karnoko mi e nu plai.
Ka nu none fi fa nukaire wolpuna e none e ommo fika e none wolane.
Nu fa naine karnopune ka nisinori nu uma plai ka naine wolpun nenine nale uporo.
4 Nu fa nupene wolpuna fafaile e none,
ka nangke nale fafaile fori noneni e fa nangke nale uporo nu.
Nu sa uma e fa karnangkene ompla ka fi samo wolrufu se.
Nanrona fane nale e nu fa nangkene namo e nane eni pai nu plai.
Nu ese nereri noula e none wamo.
Nu e samo wolane nire nupenene ommo mingklari wongkwongkeni e pike nro ka fi namale nale e fa wolane God ka nupene wu.
5 Nu ese karnangke nanrona nu sa uma e fa nupene nale uporo nama e God.
Ka,
nu fa fi nangke ompla namo plau wolpuna noneni,
nu nangke ompla namo papri riri nro.
Nanrona fane yene ese waiye amone nu uma nananrona.
6 Plai e nu uma namo fa napune rokoi ese painri mow e nu pinmana e ira onne ka nauri mi palo nu ka neingke wolpuna e nu.
Nu pinmana nanrona fa nangke nale fafaile mingklari pai se nu e namale ommo eni mingklari e nu fa nangkene.
Wolpuna e nu fa nemei ka nangke nale fafaile wongkwongkeni.
7 Nu pinmana namo fa samo wola nire nem skul,
ka nu e fi samo namale mi alwone e God.
8 Nu uma namo fai nangkene nale namo,
nu fa wolpun fafairene mi alwone.
Wolpuna nunini sam fafaile pu.
E fika,
wola nunini fai yeingke nu nupene nale fafaile nro ka nu fei samo bilipim God.
Nu nemei yukaine Janes yane Jambres,
wuyane mana isi nangke fafaile Moses.a
9 Ka nale e nu namo e fi pai angkren ka yemei wamo.
Nu uma mingklari ese namale nale fafaile nunini yukaine e isi nu uma namale nale fafaile e Janes yane Jambres.
Pol yopro yukune Timoti e yeri kero miuporo
10 Ka yene isi monkawe maime ka namale nale e ki fa kukuleke nu pinuma nale e God fa wolaye.
Ka yene namale nale e ki fa kupeneke,
ka nomu e nale kinini.
Yene namale nanrona ki mana fa bilipimke God ka ningki kaire ki fa keri kero ka kangke ompla ka ki fa wolkalike nu plai ka keri kero fa kungkam eni.
11 Yene namale nale ka eni fafaile wamo e nu uma e taun Antiok ka Aikoniam ka Listra be isi nangkene ki.
Ka Manawamo isi mewmew ki e eni mingklari namo ka ki kaike uporo.
12 Mi alwone sa nanrona,
nu uma e bilipim Krais Jisas fa samo wola nire nangke nale uporo nama e God,
nu uma ese nangke fafaile wamo nu.
13 Nu uma fafaile nakle nu uma e fa karnirene namo,
ese narnale ka nuka ira nu pinuma mi e none.
Ka Satan re namale fa karyire ka yuka ira ka nale e nu uma e karnirene namo,
ka yangke nale e nu sam fafaile wamo.
14 Ka yene ese yuna mi namo kero e isi yene yem ka bilipye.
E fika,
yene namale pu mu uma e isi mopro mukune yene mi namo.
15 Yene,
namale nanrona isi yene waiye pitiri kom,
yene isi yem mi ka namale buk e God.
Buk namo ese yawe yene ira uporo ka yene e bilipim Krais Jisas ka God ese yem kore yene.
16 Mi mingklari e nilene buk e God,
sa Spirit e God wone ese yangke mi mingklari e nile buk e God namo ese nemei.
Ka mi namo sa uporo wamo fa yukule mone mi alwone.
Ka mi namo ese samo yemplekuru ira e nu pinuma fina ira e fi waiye uporo,
ka ese mewmew mone pinuma fopi e mupone rokoi ka ese molomi kore rokoi e God wone fa woluporoye,
ka mi namo ese samo yukule mone pinuma e nale uporo.
17 Nanrona fane mi namo fa yangke mone pinuma e God ese mem nale uporo ka fa yangke mone ese maime milpeleme fa ese mangke ommo upupu mingklari.