Timoti ese yire kero ka yopro mi e God
4
Krais Jisas ese kosamo yuruye nale e mone pinuma e maime laip ka nu pinuma e rili pu.
Ki kire mi kero yene nanrona,
Krais Jisas ese yemei alele ka pinuma mingklari ese nuru wu nama noneni ka wu ese waiye king nanrona nanrona.
Narona fane e nama e wu ka nama e God ki na koproke e kererkane yene.
2 Nanrona fane yene e yeri kero ka yopro mi e wu pai nu pinuma.
Ka le nu uma nire nupu mi wee nu numplewa ka fi nire nupu mi e Krais,
sa yene e yali nu mi alwone ese yereryali wolpuna e nu ka re e yangke nu e nemplesoro wolpuna ka nupene nale e God.
Yene ese yopro mi e sam pai nale e nu fa nangkene.
Ka mi namo e mewmew nu ka yaukiri nu e fi nangke nale fafaile kore.
Ka yene ese yereryali wolpuna e nu e neri kero ka nuna mi kero.
Ningki kaire yene ese yoprokle mi komafreye nu ka samo yukuleye nu nale uporo e God fa wolpaloye.
3 E fika,
taim ese wi nu pinuma ese numplewa ka kuma nane mi alwone.
Ripi e nu ese narana mi fa nupene nale e nu fa wolane wamo.
Ka nu ese nouw nu uma e fa nopro nukulene nu e ommo e nu fa samo wolane nire nupu.
4 Nu ese numplewa ka samo kuma nane mi alwone.
Ka wolpuna e nu ese fei samo naine ka nu ese wola uporo wamo e nupu wawai mi nro.
5 Ka ningki kaire yene ese samo yuruye ira ka nale yeneni.
Yene ese waiye nama freingkyane ka e eni wi yene,
yene ese yeri kero ka yongkole.
Yene ese yopro miuporo e God pai nu pinuma.
Ompla fika e Manawamo yawe yene,
sa yene ese samo yangke.
6 Ki kire kerkane yene mi mee,
e fika ekreneye nu ese nufu ki ri ka ori e ki ese okopalo yukaine wain e nu fa nanene God yukaine ofa.
Taim e ki kire kaiki sa yolwi ekreneye.
7 Ki kuna bilip kinini kero ka kangke ompla uporo e miuporo.
Ka ki re keri kero yukaine nu iimuma fa neri kero e taim e fa nopune.
Nanrona fane ki kangke ompla namo pekimo yukaine mana e fa yempreriye resis ka pai plele mak e wu yireye.
8 Naminre prais uporo wamo namo e mana rikepone resis e waiye yoriye ki e kem.
Prais uporo wamo namo sa yukaine,
Manawamo fa yupene nale uporo fa wu e yuruye nu pinuma ka wu ese youw ki yukaine mana uporo nama e wu.
Ka e taim e kot wamo e wu,
wu ese yake ki prais uporo namo e mana rikepone resis.
Ka prais namo,
wu ese fei yake ki wokera nro.
Onnele!
Wu ese yali uma mingklari fopi fa wolane wu wamo ka isi noru nire nuru wu e yemei alele.
Timoti ese wampane pai ka yuru Pol
9 Yene ese yapu rokoi ka yolowi wampane nro ka yuru ki.
10 E fika,
Demas e nampalo ommo e pike mee ka wu pai taun Tesalonaika pu.
Kresens sa pai provins Galesia ka Taitus sa pai distrik Dalmesia.
11 Luk wokera nro sa ki kane maime.
E yene yolowi,
yene ese yumane Mak yane polopi plau.
E fika,
wu mana uporo fa mewmew ki mangke ommo.
12 Ki kawane Tikikus pai pone taun Efesus pu.
13 E yene yire yolowi,
yene ese yem saket kinini e waiye mow e Karpus e taun Troas.
Yene ese yuꞌpu buk e ki plau.
Ka yene e fi wola yuma,
yene ese yem buk e nu nangke papri e ommo kuru.
Ka yene ese wola ka yem ka yuna yolowi ki mee.
14 Aleksanda,
mana namo fa yangke ommo bras namo,
e isi yangke ommo fafaile wamo ki.
Ingke se,
Manawamo wone ese yangke fafaile wu yukaine isi wu yangke ki ommo namo.
15 Poo kosamo yuruye mana namo,
e fika,
wu mana fa wewelaye ka fa kero yangkromo mi munini e mone mire mopro mi.
16 Nambawan taim,
e ki isi kaiki kot,
mana wongke fei yeri plau ki ka yopro mi.
Uma mingklari isi nupone ki.
Ka ki kesapu God ese mew yuplen ommo fafaile e nu.
17 Ka Manawamo e isi waiye plau ki ka yake kero ki.
Nanrona fane ki kuna ommo e wu e kopro miuporo pai uma mingklari e fi Juda e nupu.
Manawamo e mewmew ki fane laiona wamo fei wo ki.
18 Manawamo ese yem ki kore ka wu ese samo yaukiri ki e ommo fafaile e nu uma nire nangke ki.
Ka wu ese samo yauno ki ka wu ese mewmew ki pai la taim wu ese yem ki kari kingdom e wu waiye heven.
Mone ese mereri noula e Manawamo nanrona nanrona.
Amen.
Mi e ki Pol sa wonko rona
19 Yene ese yire kaire uporo e ki pai Prisila yane Akwila ka nu uma e Onesiforus.
20 Erastus sa ro waiyeye taun Korin ka Trofimus e yenri ka ki kupone wu waiye taun Miletus.
21 Yene ese amparpunu yolowi wampane mee,
mokoi mee fa raulo wamo ka rapu kero fa yemeiye.
Yubulus,
Pudens,
Linus ka Klodia ka nu Kristen pinuma plai namo nire kaire uporo pai yene.
22 Manawamo ese waiye plau spirit yeneni ka ese wolpalo pone.