Timoti ese waiye yukaine iimmana uporo e Krais Jisas
2
Auna kinini,
yene ese yem wolpalo e Krais Jisas ese keryawe yene yeye nanrona.
2 Mi mingklari isi yene yupu ki koproke nama e uma mingklari namo,
mi namo yene ese yina pai mew e nu uma fa nuna kero mi e God ka nu ese nukule nu uma plai e mi namo.
3 Yene ese waiye yukaine iimmana uporo e Krais Jisas ka ese yame mu mungkam eni e ommo namo.
4 Yene namale ommo nu iimuma fa nangkene.
Nu fi fa nangkene ommo plai e nu nangke ommo noneni yukaine iimuma.
Nu fa samo nangke ommo yukaine iimuma nro,
sa opisa noneni ese samo aiyem nu.
5 Nanrona nro,
le mana yempriri resis ka fi yupene lo e resis,
wu ese fi yem prais wongke.
6 Mana e yangke ommo wamo nengkrele wunini sa ese yem ommo e nengkrele wunini risi nu uma plai.
7 Le yene yuna mi mingklari e ki kirewi yene yeye wolpuna yeneni,
sa Manawamo ese yangke yene namale ommo mingklari namo.
8 Ningki kaire yene ese wolrufu Jisas Krais nanrona,
wu sa yemei uma e king Devit ka wu isi ri ka God yangke wu yemei kore ka wu waiye laip.
Miuporo namo ki fa kopro nu uma mingklari fa nupune.
9 Rokoi e fa nopro miuporo e God namo,
namo sa won nomu wola nu uma ke nuru ki yukaine mana fafaile ka yake ki eni mingklari wamo ka nu nina ki kalabus.
Ka mi e God namo,
sa ompla namo nu ese fi nuna ka nina wu kalabus.
10 Nanrona fane ki fa keri kero ka kungkam eni mingklari namo ese saimoro nu pinuma e God isi yuꞌpuye namo ese samo naine nanrona nanrona plau Krais Jisas e glori e wu.
11 Mi ese ingke wi namo,
sa won alwone fane uma mingklari ese samo bilipim:
Le mone ri plau wu
sa mone ese maime laip plau wu.
12 Le mone meri kero ka mungkam eni mingklari,
mone ese mane wu maime yukaine king.
Le mone samo mum wu ka mire nanrona mone seke uma wunini,
sa wu re ese samo yum mone ka yire mone re seke uma wunini.
13 Le mone muka mi mire mupene wu ka mone fi mupene mi e isi mone muka namo,
sa wu ese yupene mi woneni e ompla wu yire yangke.
Wu ese fi raryane wone kore.
Timoti ese samo yeri kero sa ese yungkam ommo e God
14 Nu uma yeneni sa namale mi namo pu,
ka yene won e yopro yukuleye nu ningki kaire sa nu ese samo namale.
E nama e God,
yene ese samo yirengkle nu ese fi mi nemnopu nomu e mi.
Nale namo sa ese fi yangke ompla wongke uporo ka fa yangke fafaile laip e nu uma fa nupune.
15 Yene ese sam amparpunu yangke ommo yukaine mana uporo nama e God,
sa wu ese samo wolyane ommo e yene yangkeye.
La e yene samo yopro miuporo wunini,
sa,
yene ese fi sem.
16 Yene ese fi waiye ekrene nu uma e fa nopro mi fafaile koroyane ira ka wolpuna e God.
E fika,
nu uma e fa nopro mi fafaile namo,
ese painri fafaile wamo ka ese fi naine ekrene God.
17 Mi fafaile e nu uma namo,
sa ese yukaine muꞌku wamo e yoko rinra e mana ka ese pai fafaile wamo.
Mana plainrane e fa nangke nale namo,
sa Himeneus yane Filetus.
18 Wuyane nupone rokoi e mi uporo pu,
e fika,
wuyane fa nire nanrona,
“E isi mone bilipim Jisas ka mone mem baptais,
sa yukaine mone isi maime pike pula ka mone memei kore pu.
Nanrona fane mone ese fi memei taim wongke kore.”
E mi namo nro,
wuyane fa nangke bilip e nu pinuma plai fafaile.
19 Ka God raile roma kero pu fa e yeꞌre siosa woneni ka roma namo kero wamo na yeye.
Wu yeꞌre mi wiye roma namo ka yire nanrona,
“Manawamo samo namale nu pinuma woneni.”
Ka wu yeꞌre mi rola wongke kore nanrona,
“Uma mingklari e nem noula e Manawamo,
sa ese kuma nane nale fei uporo nama e God.”
20 Mow wamo wongke sa yuna dis.
Dis namo,
plai sa,
nu nem gol ka silva wola nangke.
Ka plai sa nu nem ilo ka nangke ka plai sa nu nem pike wola nangke.
Dis namo,
plai e nu sa fa nangke ommo uporo ka plai sa fa nangke ommo fafaile.
21 Nanrona fane,
le mana wongke yupone nale fafaile e wone fa yunaye laip woneni ka waiye uporo nama e God,
sa mana namo ese yemei yukaine dis e fa nangke ommo uporo.
Mana namo ese samo waiye uporo ka holi.
Ka Manawamo ese yuru wu yukaine mana e waiye yilpeleye nro fa ese yangke ommo mingklari uporo e wu.
22 Nanrona fane ningki kaire yene ese samo kuma yane wolpuna fafaile fa yemei wolpuna e nu kongkom efapu ka pin mangkrama.
Yene ese samo yangke ommo fa ese yem nale uporo,
ka nale e fa samo bilipne God,
ka nale e fa wolane nu uma plai,
ka nale e fa wolpuna raulo.
Ka pone mingklari ese samo pangke nale namo.
Yene yakle nu uma e samo wolpuna numplewa nale fafaile nama e God namo,
e posipane ka pesapu Manawamo.
23 Yene ese fi waiye plau mi fafaile wongkwongkeni e nu uma ira nunini e yimerwa ommo fafaile namo.
Yene namale nanrona,
mi fafaile wongkwongkeni namo fa yisiyori nu uma ka yangke nu naine nemnopu mi ka nopune nro.
24 Mana e yangke ommo e Manawamo ese fi yangke nale fafaile nu uma o yakle nu nemnopu mi.
Wu ese samo yangke nale uporo nro uma mingklari.
Le nu uma wewela ka fi nupu mi wunini,
wu ese wolpun rauloye nro ka yapu rokoi wongkwongkeni fa ese yopro yukule nu pinuma nale e God wone wola yire nu ese nupene.
25 Wu ese komafre nu uma e fi fa nupu mi ese namale ommo uporo nu ese nangke.
Le wu yangke nanrona,
ki fi namale,
anro God ese mewmew nu ka nu ese nemplesoro ka nupone ommo e none fa nangkene ka nem ira uporo mi alwone e God.
26 Satan yuꞌpu nu naine net wunini pu fa wu ese yangke nu nupene mi wunini.
Ka,
e nu namale mi alwone e God,
sa ira ka wolpuna uporo ese yemei nu kore ka nu ese nulpanri ka nupone net e Satan ka ese kosamo nai.