Piprola wongke Pol yeꞌre pai
Timoti
1
Ki Pol,
aposel e Krais Jisas.
Namo sa wolpuna e God wone fane wu yem ki ese kangke ommo wunini yukaine aposel fa ese kirengkle nu pinuma mi e laip wu isi yuka mi pu ese yali nu pinuma fopi e bilipimne Krais Jisas.
2 Timoti,
yene mana ki fa wola yene wamo ka kuru yene sa yukaine auna ki koneni,
nanrona fane ki keꞌre piprola mee pai yene.
Ki kesapu Aina God yane Manawamo e mone,
Jisas Krais ese wolpalo ka wolane yene ka nane wolpuna raulo yene.
Mone ese fi wolpukrole miuporo
3 Ki kire tenkyu God,
mana ki fa kangke ommo wunini.
Ki fa kupene nale uporo e ki kangke ommo wunini yukaine flili kinini isi nangkene.
Wolpuna kinini,
ki namale rona ki sa uporo nama e God.
Ka ki fi wolyumaro yene,
nanrona fane ki fa kire tenkyu God ka kesapuke yene ningki kaire.
4 Ki fa wolrufuke e yene isi wiriye namo ka namaa kuru yeneni yoloye,
ka ki kire samo kuru yene.
Ka namo ese yangke ki aiyem ka ki kem wolpuna woluporo wamo.
5 Ki namale rona yene fa samo bilipim Krais Jisas wokera nro yukaine isi yene mampa Lois yane yene moka Yunis re isi bilipim wu.
Ka ki namale nanrona bilip namo re nawai yene.
6 Nomu namo nro,
fane ki kire samo kererkane wolpuna yeneni ka kangke yene ese samo keryane ompla namo e laip yeneni yukaine mana e fa namale yompo niꞌpi ka niꞌpi fa samo ali wamo.
7 Yene ese namale nanrona Spirit e God yame mone ese fi yangke mone mum.
Wu yane Spirit fa yame kero mone,
ese yangke mone samo wolmale nu plai,
ka fa mewmew mone ese samo mopane laip moneni.
8 Nanrona fane e yene yopro mi e Manawamo yene ese fi sem ka e ki re yene ese fi sem ki,
e fika,
ki kaike kalabus noula wunini.
Yene yem kero e God ka yenkawe e mungkam eni e fa mopro miuporo e God.
9 Isi God yem mone kore ka youw mone maime pinuma woneni.
Wu fei wola nale uporo mone mangke ka wu youw mone.
Onne.
Oii isi wu wolpalo mone ka yangke mone maime pinuma woneni.
10 Naimele Krais Jisas,
mana e fa yuꞌpu kore mone namo,
e yemei alele pu.
Ka ommo e wu yangkeye namo,
ke yangke wolpalo e God re yemei alele.
Krais Jisas samo yisiyori ka yumanralo kero e fa riline ka miuporo wunini yangke mone pinuma mingklari namale laip e fa samo naine nanrona nanrona.
11 God isi yem ki ese kaiki mokoi mingklari yukaine aposel wongke ka kaike yukaine tikse fa ese kopro miuporo namo ka kukuleke nu uma mi wunini sa nu ese nupu.
12 Ki fa kangke ommo namo,
ka nomu namo,
ki fa kungkam eni namo ka fi sem eni e ki kungkamke mee.
E fika,
ki samo namale mana e ki fa bilipke,
ka ki namale nanrona wu ese yane kero ka wu wone ese pai risi ommo mingklari namo wone yina mewwola e ki pai plele e taim wu ese yolo kore.
13 E yene yopro mi yene ese yopro yukaine isi ki kopro kukuneke yene namo,
ka yene samo yuna kero bilip yeneni ka samo wolyali nu uma plai.
Nale plainrane namo,
Krais Jisas wu wone fa yereryaneye wolpuna e mone ka mone fa mangkeme.
14 Yene samo yopane ka yaukiri miuporo e God yina pai mew yeneni namo.
Holi Spirit e God waiye mone namo,
sa ese mewmew yene fa ese yopane ka samo yaukiri ompla uporo namo.
15 Yene namale nanrona uma mingklari e provins Esia e nupone ki pu.
Plainren e nu uma namo sa,
Figelus yane Hermogenes.
16 Ki kesapu nanrona Manawamo ese wolpalo ka yangke uporo Onesiforus yakle uma mingklari e mow woneni.
Ningki kaire wu fa saimoroye wolpuna kinini ka wolpuna kinini fa uporoye ka wu fi fa semye ki e ki kaike kalabus.
Sam onne.
17 E wu yolowi taunwamo Rom,
wu samo amparpunu yapu ki pai la e wu wane ki.
18 Ki wona kesapuke Manawamo ese wolpalo ka yangke uporo wu e taim wu yupu kot e mone uma mingklari.
Yene won sam namale ommo mingklari uporo pu Onesiforus isi yangkeye yire mewmew ki e isi ki kaike taun Efesus.