Timoti ese yuru nu pinuma yukaine nu ori oikenra woneni
5
Yene fa yenreleye nu uma alma sa nenrape.
Yene ese saimoro nu mi aplai,
yukaine yene fa yangkeye yene nangka.
Ka e nu kongkom efapu re,
yene ese yangke nale narona yukaine yene fa yangkeye inomranipi yeneni.
2 Yene ese sam saimoro nu pinalma mi aplai yukaine e yene fa yangkeye yene moka.
Ka nu uma pin mangkrama re,
yene e yangke nale nanrona yukaine e yene fa yangkeye yene pinefe.
Nale namo sa uporo wamo nama e God.
Fina ese yuruye pinmana e impi rili pu?
3 Yene e samo yuru ka yangke nale uporo nu pinmana fopi e impi rili nupone nu ka none nro nainene.
4 Le pin e ini woneni ri yupone wu namo,
yuꞌpu kongkom ka anfife naine plau,
sa yene ese mewmew nu samo namale rona ommo ese nu nangke risi nama e God sa ommo e fa samo nurune none ori oikenra.
Nanrona fane nu ese nurune mampa namo.
Ka nale namo,
nu ese nangke pai none mokapi ka nangkapi,
e isi naunone none.
Ka nale namo sa uporo wamo nama e God.
5 Le pin wongke ini e wu ri yupone wu ka wu wonekere nro waiye ka mana onne fa ese saimoro wu.
Wu ese samo bilipim God ka yesapu ningki kaire ka yarine God e mewmew wu.
6 Ka,
pin ini e wu ri ka waiye ka wolyaure ommo e pike namo,
ke yire rona wu waiye laip,
alwone wu sa waiye yukaine mana e ri pu.
7 Nanrona fane yene e samo yirengkle nu pinmana e impi rili pu namo e nupene nale fa nesapune God sa nu ese nangke nale uporo nro ka nu pinuma plai e fi napu nale fafaile e nu.
8 Nu uma fi fa nurune nu oikenra noneni ka nu uma plai e fa nakle naine plau mow noneni namo,
nu sa nupone bilip noneni pu fane nu sam fafaile wamo ke rikepone nu haiden e fai nangke nale fafaile.
9 Yene ese yeꞌre noula e nu pinmana impi e nu rili pu namo fa sios ese mewmew nu.
Ka yene ese yeꞌre noula e nu pinmana kikla e nu rikepone 60pla ka nu e isi nem mana wokera nro.
10 Pin namo ese yuna noula uporo ka wu ese waiye ka yangke ommo uporo uporo.
Ommo rona,
wu fa sam yauno kongkom e nu ka yuꞌpu ommo e fa none ka yali nu uma e mokoi plai e noloni ka samo woluporo wamo nu uma fa bilipne God e noloni mow e wu ka naklele rew e nu.
Ka ompla wongke kore,
wu ese mewmew nu pinuma e taim nu nem eni ka wu pin fa yangke ommo plai uporo.
Yene ese yeꞌre noula e nu pinmana rona.
11 Yene e fi karyeꞌre noula e nu umpin mangkrama e impi nunini rili pu,
e fika wola e nu ese nemei ka nuꞌpu uma kore.
Ommo namo ese yangke nu e kuma nane ommo e Krais.
12 Le ommo namo nemei,
sa nu pinmana namo nangke fafaire laip e none e nu fi nupene promisa e isi nu nangkene namo.
13 Ompla wongke sa,
nu ese num ka nem nale fa naraine mow e nu uma plai.
Ka nu e fi nangke nale namo,
nu ese naraine napu mi e ommo nu uma plai e nangke ka nu ese painri ka nangke ira fafaile e none ka noko mi nu uma plai.
Nanrona fane nu noprole mi mingklari fei uporo ese mone mopro.
14 Ki wola nanrona ese uporo le nu umpin mangkrama namo impi e nu rili pu namo,
e nuꞌpu uma kore ka nuꞌpu kongkom ka samo nopane mow e none.
Ka le nu nangke rona ese iim moneni namo,
e fi yapu rokoi ese yisiyori noula e nu pinuma e fa bilipne.
15 Yuru!
Ompla fika e isi nemei plai e nu umpin mangkrama impi e nu rili pu namo,
plai e nu nemplesoro ka nupone rokoi uporo ka nupene Satan.
16 Ka le pin wongke fa bilipimye Krais yunaye pinmana plai e impi rili pu,
sa wu es yuruye nu ka mewmewye nu.
Ka ommo namo ese yangke sios e fei nal rangkuwa e yuruye nu.
Sios ese yuruye nu pinmana plai impi e nu rili pu ka nu uma fi fa nurune nu namo.
Mone ese sam muru nu uma e fa painri risi sios ka nangke ommo uporo
17 Nu uma e fa painri risi ka nopane ommo e sios fa nangke ommo e nu namo,
sios ese yereri noula e nu ka nali romaula nu risi nu plai.
Ka nu uma e fa samo nangke ommo e nu e nukule nu uma ka nopro mi e God namo,
sios ese woluporo nu rikepone nu plai.
18 E fika mone muru mi e wile buk e God yire nanrona,
“Pone e fi pangke bulmakau miruru e taim wu yangke ommo fa rew yariri rais papri.”b
Pone namale mi wongke yire nanrona,
“Nu uma e fa nangke ommo namo,
ese nem romaula e ompla e nu fa nangkene.”
Ka nu uma fai painri risine sios sa yukaine.
Nu uma e sios ese nuꞌpu nu e nangke ommo e sios.
19 Yene e fi yupu mi e mana wongke e mi nolo nu uma e painri risi fa nopanene sios,
e nangke fafaile.
Le plainrane o plainrikera e nire mi nanrona nu e nuru wu e yangke ommo namo,
sa yene yupu.
20 Ka le wongke e nu uma e fa nangke ommo e sios na yangkeye nale faifaile,
sa yene ese yopro mi alele e wu nama e nu uma e sios.
Yene ese samo yopro mi e nale wunini,
sa nu plai re ese num,
ka ese fei nangke rona.
Timoti ese kosamo yuruye nale e wone
21 E nama e God ka Krais Jisas ka nu ensel e God,
ki sam kirewi yene nanrona yene ese sam yuruye ommo mingklari yukaine e ki kirewi yene namo.
Yene ese yangke nale nanrona nro e uma mingklari.
Yene ese fei yangke nale uporo nu uma e yene fa woluporoye nu nro.
22 Yene e fi wolforwo ka wampane mew raune nu uma ka yirengkle nu painri risi ka nangke ommo e God.
Le yene yangke nanrona,
sa God ese yuru yene rona yene re,
mana fa yeri plau ommo fafaile e nu uma ese nangke.
Nanrona fane yene ese samo yuruye yene ese yene waiye namkire nama e God.
23 Yene ese yupone nale e yene fa karyaikowo mii siwolenro.
Ese uporo le yene yaikowo wain pitiri e mewmew puna e yene ka yemplekuru nale yene fa yenriye namo.
24 Ommo fafaile nu uma fa nangkene namo ese wampane nemei alele ka ese wampane pai kot se nu uma fa nangke ommo fafaile namo e noloni kot.
Ka nu uma plai fa sam peki naine ka pai se nale fafaile e nu ese nemei alele.
25 Nanrona fane,
nale uporo uporo ese waiye alele.
Ka le nale uporo plai fei nemei alele wampane nro,
sa nu e fi peki naine.