Wokboi siwole ese nangke nale uporo nro
6
Nu pinuma fa bilipne Jisas ka naine wokboi nro ka fa nangkene ommo e nu uma plai namo,
ese samo numanralo noula noneni ka nereri noula e bosman e none.
Nale namo sa ese yangke nu uma e fi bilip namo,
e fi ownire noula e God ka skul e miuporo e God.
2 Le bosman e nu wokboi namo fa bilipye Jisas,
sa nu wokboi namo e fi wolwongkeni nanrona,
“Bosman namo,
sa kikonkane,”
ka nu ese wewela ka ese fi nupu mi e wu.
Wokboi namo,
ese wola nanrona,
“Mana e ki saimoroke ommo e wu namo,
wu mana fa bilipye fane ki wolkane wu.”
Ka nale namo sa wu ese amparpunu wamo.
Nale fa wolane romaula sa rokoi fafaile fa yangke nale fafaile ese nemei
Namo sa ommo yene ese yukule nu uma ka yereri wola e nu sa nu ese nangke ommo uporo namo.
3 Mu fa mukuleme nu uma mi uporo e Manawamo e mone Jisas Krais ka nale uporo e God wolaye.
Le mana wongke owyire skul e mu ka ke yukuleye nu mi wongke fei yukaine mi e mu fa mukuleme nu uma,
4 mana namo wu fa mew yufu wone wolpoku ka wewela wamo ka kungkuno wamo fi namale ompla wongke.
Wolpuna e wu yimerwa nale fafaile fa yokomi mi ka yemyopuye mi nro.
Wu fa waiye yokomi ka karmiyolo kero nu uma ka owyire noula e nu uma plai ka karyina eni uma ka karyenreleye nu uma ommo pitpitiri.
Ka mi e wu namo fai yangke mana wolpuna fafaile nu uma plai ka yangke nu nemnopu mi ka yisiyori nu mi fafaile.
5 Ningki kaire nu fa naine wolpun nenine nro ka wolpuna e nu sam fafaile wamo ka fi samo namale mi alwone.
Nu wola nire nanrona,
nale e God sa rokoi fa mewmew mone fa muꞌpu ommo.
6 Ka,
mi alwone sa nanrona,
le mone aimem wamo ommo e God fa yame mone,
mone ese namale nanrona rokoi fa nupene nale uporo nama e God sa ese saimoro mone wamo.
7 Mone namale nanrona,
mone isi fi mungkam ompla wongke e ama yuꞌpu mone molo pike mee,
nanrona fane e mone mupone pike mee,
mone ese fi mungkam ompla wongke mampri plau.
8 Le mone muna ommo fa none ka ommo amprapi ka ommo plai fa nailene,
sa mone ese mire nanrona ommo namo,
sa resukru mone.
9 Nu uma fa wola nire nuꞌpu ommo mingklari wamo namo,
fai nempriri painri ka panrinolo ommo fai yemplekareye yukaine misiri fai yunaye ommo kuru.
Ira ka wolpuna e nu fa nangkene ommo fafaile namo nro ka ommo faifaile namo fa yangke eni yemei laip e nu sa nu ese samo fafaile wamo laip ese ingke wi.
10 Nale e fa wolane romaula sa fa yangke nale fafaile wongwongkeni mingklari ese nemei.
Plai e nu uma fa wolane romaula namo,
nupone bilip e none ka ommo namo yinayane eni wongkwongkeni nemei nu yukaine ompla neni samo yoku nu.
Yene ese yempriri kero yem laip waiye nanrona nanrona
11 Ka yene sa mana e God,
nanrona fane yene ese yupone ka waiye amon ommo fafaile namo.
Yene ese amparpunu ka yupene nale namo:
Yene ese yangke nale uporo ka samo yupene nale uporo nama e God,
ka yene ese bilipye God wokera nro,
ka yupene nale e fa samo wolane nu uma plai,
ka yene ese yeri kero ka yungkam eni ka yene ese wol aplaiye nu pinuma.
12 Nale fa bilipne namo,
sa yukaine resis.
Nanrona fane yene ese yempriri kero resis namo sa yene ese yem laip ese waiye nanrona nanrona e God isi yaureni yene ese yem namo.
Yene isi yopro mi e ommo namo nama e nu uma mingklari.
13 Mone namale,
God fa yane laip ommo mingklari,
ka mone re namale nanrona,
e Pontius Pailat yuyari Jisas Krais,
wu isi yire mi alwone kore wu.
Ka naimele,
nama e God yane Krais Jisas,
ki kire mi kero yene nanrona,
14 yene ese samo yupene ommo mingklari yukaine isi yene yemye namo,
ka yene e fi yangke ompla wongke fafaile fa ese yangke nu pinuma e noko yene mi.
Yene ese yangke nanrona nro pai plele taim e pinuma mingklari ese nuru Manawamo e mone Krais Jisas ese wi kore.
15 Ommo namo ese nemei yukaine taim e God wone yina pu.
God wone sa nomu e aiyem ka wu wone wokera nro sa fa pai risi ommo mingklari.
Wu King e nu king mingklari ka Manawamo e nu irauma mingklari.
16 Wu wokera nro sa ese fi ri.
Ka wu fa waiye mokoi e wone yuna ali wamo ka mana wongke ese fi pai ekrene wu.
Mana wongke isi fi yuru God ka mana fi yuru wu.
Onne.
Nanrona fane mone ese mereri wu ka mereri noula ka kero e wu nanrona nanrona.
Won alwone.
Nu uma fa nuna romaula mingklari ese bilipim God ka mewmew nu pinuma
17 Yirengkle nu uma fa nuna romaula mingklari ka ommo uporuporo e pike ese fi neririyen fongkrolene ka nereri noula e none.
Nu ese fei wola kero ommo fa wampane fafaileye namo.
Nu ese bilipim God e fika,
wu mana fa yame mone ommo uporo mingklari fa nangke mone aiyem wamo.
18 Yirengkle nu ese nuna romaula noneni ka nangke ompla uporo nro.
Nu ese fi nuru romaula namo yukaine ompla wongke uporo noneni.
Ommo uporo wamo noneni,
sa nale fa nangke uporo nu uma plai.
Nu ese nangke nale uporo fa mewmew nu uma plai ka nale ommo noneni pai nu uma e ommo sam onne.
19 Le nu nangke nale namo,
nale isi nu nangke ese yemei yukaine ommo kero fa yuna bilip nunini yukaine roma kero e yuna mow wongke ese fei fafaile.
Nanrona fane bilip nunini ese kero ka nu ese nem laip namo laip alwone namo fa waiye nanrona nanrona.
Timoti ese samo yuruye ommo e wone fa yangkeye
20 Timoti,
yene ese samo yuruye ompla namo e God yawe yene namo.
Yene ese kuma yane mi wongkwongkeni e nu uma fa nouw nanrona “irauporo.”a
Irauporo namo,
sa fi alwone fa yeingkariye wola e God.
Nanrona fane yene ese waiye amone nu uma fa nire nanrona none nuna irauporo namo.
21 Plai e nu uma fa bilipne namo ke nupene irauporo namo sa poipainerune bilip noneni pu.
Wolpuna e God sa waiye plau pone.