Mi wawai fa nuka ira nu pinuma ka nu nupone bilip e none
4
Holi Spirit yopro mi alele rona taim ese ingke noloni plai e nu uma ese nemplesoro ka nupone bilip e none.
E fika,
nu ese nupu mi e spirit fa karnirene ka opola fafaile ka nupene mi e nu.
2 Nu uma fa nuka ira e nu uma e nale fa karnire ese ni ka nopro alele nale fafaire e none pai nu pinuma ese nupu.
Ira e nu wawiri ka nu fei namale nale fafaile e none ka re nu fi sem nale e none nangke namo.
Sam onnele.
3 Nu uma namo ese mi naure nu pinuma ese fi nemnupu ka neinangkru ommo plai nu e fi no.
Ka God yangke ommo e no namo pai mone pinuma e bilip ka namale mi alwone e wu,
ese mem ka mo ka mane tenkyu wu.
4 E fika,
ommo mingklari God yangke sa uporo wamo.
Nanrona fane,
mone e fi meinangkru ompla wongke e God yangke.
Mone ese mem ka mane tenkyu God ommo namo.
5 Mi e God ka mesapu e mone namo fa yangke ommo namo ese nemei holi.
Timoti ese waiye yukaine mana uporo fa yuna ommo e Krais
6 Le yene won nayoproye mi alele pai nu pinuma e fa bilipne mi namo,
yene mana uporo fa yangke ommo e Krais Jisas.
Ka yene ese yem kero mi alwone e mone bilipme namo ka ira uporo e nu uma plai e isi nukune yene ka yene won nayupeneye.
7 Yene e fi yupu wawai mi e nomu onne fa keroyane nale e pike mee.
Yene ese samo kuma yane mi namo ka yupene rokoi uporo fa e yangke yene yeri kero ka yupene nale uporo nama e God.
8 Yene namale,
e mone mire mangke nalpapri moneni waiye kero,
mone fa mangke ommo wongkwongkeni,
ka ommo namo ese mewmew mone pitiri nro.
Le mone mupene nale uporo wamo nama e God,
ommo namo ese samo yangke mone kero ka re ommo namo ese mewmew mone rokoi wongwongkeni e naminre ka ingke re mone ese mem laip e God e isi yuka mi mone.
9 Mi naminre ese ki kirepi pone namo,
sa mi alwone ka mone uma mingklari ese mupu ka bilipim.
10 Mone samo bilipim God fa waiye nanrona nanrona ka wu mana fa yuꞌpu kore pinuma mingklari.
Ka mi namo sa alwone wu ese riryuꞌpuye mone uma e fa bilipme wu nro.
Ka mone mai mori wu fa e samo yangke mone,
nanrona fane mu samo kero wamo mire mangke ommo namo.
11 Yene won ese yali mi namo pai nu pinuma ka won yukuleye nu ese nupene mi namo.
12 Nu ese nuru yene rona yene sa mel efapu,
ka nu e fei wola rona yene sa mana siwole.
Onnele.
Yene ese yangke nale uporo wongkwongkeni ese nu uma e bilip ese namale yene ka nupene yene.
Yene e yopro mi uporo ka yupene nale uporo nro.
Nale uporo e fa wolnane nu uma plai e waiye yene ka yene ese bilipim God ka waiye namkire nama e God.
13 Naminre ka pai plele taim e ki kolokike,
yene ese samo kero yopro yukule mi e God pai nu uma e nupu ka yene e yopro nomu e mi namo ka yopro yukule nu nale e God wolaye.
14 Yene e fi karwaiye,
yene ese yangke ommo namo isi God yawe yene yukaine presen e taim nu uma e sios mew naune yene.
Ka e taim namo,
wongke e nu isi yopro mi profet nanrona God ese yawe yene kero fa e yangke ommo namo.
15 Yene e fi karwaiye,
yene ese samo yangke ommo namo,
sa uma mingklari ese nuru nale ka ommo e yene yangkeye sa uporo ka yemei wamoye.
16 Yene e sam saimo nale e yene ka ommo e yene yangke fa yukuleye nu pinuma namo.
Le yene samo wolyapa ka wol waiye ommo namo e yene yangkeye,
God ese yem yene kore yakle nu uma fa nupu mi e yene.