Nu uma fa painri risine ommo e sios ese nupene nale uporo
3
Mi ese ki kirepi pone namo,
sa mi alwone.
Le mana samo wola yire yangke ommo yukaine mana fa yuruye sios,
ommo namo sa sam uporo fa wu ese yangke.
2 Mana yire yemei wasman wu ese samo yupene nale uporo nro,
sa nu uma ese fei napu ompla wongke fafaile laip woneni.
Wu e yem pin wokera nro ka re wu e samo wai ka samo yuru ommo e wone yire yangkeye.
Wu e sam yuruye wone ka yupene nale uporo nro ka nu uma ese nereri noula woneni.
Ompla wongke re,
wu e yangke nale uporo nu uma e noloni mow wunini ka wu e namale rokoi fa yopro yukule nu pinuma.
3 Wu e fi yaikowo mii kero ka ira eni ka pai yakle nu uma nopu.
Wu e samo waiye ka yakle nu uma nemplekuru mi e rokoi uporo.
Ka re wu e fi wolaye romaula ka yuru rona romaula sa ommo wamo e laip woneni.
4 Wu e yauno ka yaukiri pinkongkom woneni ka yangke nu kongkom e wone e samo namale mi e wu ka nupene.
5 Ka mana fina e fei samo yauno ka yaukiri pinkongkom e wone namo,
sa ese fei yangke ompla namo ese yopane ka yaukiri sios e God.
6 Kristen keklepe ese fei yangke ommo namo fa pai risiye sios.
Le wu yangke ompla namo,
wolfafaire ese yemei wu ka wu ese yereri noula woneni ka waraiye fongkrolelye ka God ese kotim wu yukaine e isi wu kotim Satan.
7 Mana e yem ommo fa pai risi sios namo ese yuna noula uporo.
Nu uma e fei naine sios namo re ese nereri noula e wu ka nopro mi alele rona wu sa mana as uporo,
mana namo ese yuna ommo namo e pai risi ommo e sios.
Le mana yuna noula fafaile,
mana namo ese nu nire mi wongkwongkeni e yisiyori wu ka Satan ese yeima wu yukaine misiri fa yunaye ommo kuru.
Nu uma e nangke ommo e sios e samo nupene nale uporo
8 Nanrona nro,
nu uma plai e fa nangke ommo e sios e nu nina namo ese nangke ommo e sios,
nu re ese nuna noula uporo sa nu pinuma ese nuru nu sa uma fa nangke nale uporo sa nu ese samo nupu mi nunini.
Nu e fei naikolno mii kero ka forworine ka re nu e fi nampalo ommo ka napu rokoi wongwongkeni ese peki nuꞌpu romaula e nu uma plai.
9 Ka nu ese namale none rona nu sa uporo nama e God.
Nu e samo nuna mi alwone e God isi yame mone uma fa bilipme wu.
10 Pone e kosamo puru nu rona nu seke uma fi fa nangke eni sa pone ese pali ommo e sios pai nu.
11 Nu pinmana e nu re,
e samo nangke nale uporo ka nuna noula uporo nama e nu uma plai.
Nu e fei noko mi wee mi nolo nu uma plai.
Nu e samo saimoro none ka samo nangke ommo e nu nali nu.
12 Uma e fa nangke ommo e sios ese nem pin wokera nro ka wu ese samo yauno kongkom ka uma mingklari e fa nakle naine plau mow e wone.
13 Le nu uma e fa nangke ommo e sios samo nangke ommo,
ese uma mingklari samo nereri noula e nu ka nu ese neri kero ka nu e fi num e nu nire noprongkle nu uma bilip noneni e Krais Jisas.
Nomu e nale e bilip e mone
14 Ki wola kire koloki naminre ka kuru yene,
ka ki wolrufu kore ka wola nanrona ki ese keꞌre mi namo pai yene se.
15 Ka le ki fi wampane koloki,
yene ese resukru e yuru mi nile piprola ese yuku yene nale uporo e mone uma e God ese mupene.
Mu uma e God,
maime yukaine sios e God yuna laip waiye nanrona.
Ka sios namo sa yukaine ilo rinra kero ka roma wamo fa yuna mi alwone e God.
16 Mone mingklari samo namale mi alwone nanrona,
mi namo fa nu uma ese nangke nale uporo nama e God,
sa ompla wamo.
God yuku mone nanrona,
Wu isi yolowi yukaine mana run
ka nu pinuma nuru wu nama noneni,
ka Holi Spirit yuku rona
nale wunini sa uporo wamo,
ka nu ensel re nuru wu nama noneni.
Nu uma isi nuna mi wunini
ka nopro mi mokoi mingklari e pike namo,
ka nu pinuma e pike namo
nupu ka bilipim wu,
ka God yumane wu pari riri
ka waiye mokoi e yuna glori wamo.