Mone ese mesapu ka marine God ese mewmew pinuma mingklari
2
Ompla wongke ki wola kire emen yene ese yangke sa nanrona,
yene ese yirengkle pinuma mingklari ese nesapu God ka nire tenkyu wu ka narine wu ese mewmew pinuma mingklari.
2 Nu ese nesapu ka narine wu ese mewmew nu king ka nu uma e gapman.
Rokoi namo sa mone mingklari ese mem wolraulo ka maime uporo.
Ka mone re ese samo mupene nale uporo nama e nu pinuma ka e God.
3 Rokoi e fa nesapune namo sa uporo fa yangke God,
mana e yuꞌpu kore mone,
ese yem wolpuna uporo ka aiyem wamo.
4 Wu yire yuꞌpu kore pinuma mingklari sa nu ese namale nomu e mi alwone.
5 Mi namo sa nanrona God wokera nro fa waiye,
ka mana wongke fa waiye iplele e God ka mone pinuma.
Mana namo sa Krais Jisas.
6 Wu yane laip woneni fa yuꞌpu kore mone pinuma mingklari.
Ka ompla namo Jisas yangke e taim God wone yina.
Wu yangke nanrona sa yuku mone nanrona wu samo wolpalo mone pinuma mingklari ka wu ese yuꞌpu kore mone.
7 E nomu namo nro ka God yina ki kaike yukaine aposel fa kopro mi e wu.
Mi namo sa won alwone ki fi karkire pone.
Wu yake ki ommo ese kukule nu pinuma e fi Juda sa nu ese bilipim Krais ka namale mi alwone namo.
8 Nanrona fane ki wola nanrona nu uma e mokoi mingklari ese nereri mew pari riri ka nesapu.
Ki samo wola nanrona nu ese nali laip noneni pai God ka naine holi ka nupone nale e fa nopu mi ka wolpuna nenine.
Ka nu ese nupene nale e fa nesapune namo.
Nale e fa nangke ommo uporo namo, sa ommo uporo nu pinmanangkle
9 Nale namo nro,
ki wola nanrona nu pinmana re ese naile ommo uporo resukru nale e none ka ese fi yereriyali wolpuna e uma mingklari.
Nu e fi samo nemplekuru ka mewpanrole ira para noneni ka nemplekuru nalpapri noneni plau gol ka ommo kikinalale wongkwongkeni ka naile ommo papri e nu fa nuꞌpune romaula wamfafai.
10 Ka nu ese nangke ommo uporuporo ese nukule nanrona nu samo wola nire nupene mi e God.
Ommo e nu nangke namo sa yukaine ommo papri none fa nailene.
11 Nu ese kosamo nai ka nem mi e God ka fi fa nereri none.
12 Ki seke kirengkle nu pinmana ese painri risi nu uma alma ka nopro nukule nu mi e God.
Nu ese kosamo naine ka nupune nro.
13 E fika,
God isi yangke Adam pai risi se sa Iv.
14 Ka Satan fi yauri mi palo ka yemaire wolpuna e Adam.
Wu isi yemaire wolpuna e Iv ka yauri mi palo wu ka wu yangke nale fafaire.
15 Ka nu pinmana ese nangke ommo noneni fa nuꞌpu kongkom.
Le nu samo bilipim Krais,
sa God ese yuꞌpu nu kore.
Nanrona fane nu ese nupene rokoi e fa wolnale uma plai,
ka nu ese naine holi ka nupene nale uporo.