Piprola emen Pol yeꞌre pai
Timoti
1
Ki Pol,
aposel e Krais Jisas keꞌre piprola mee.
Mana Jisas namo,
mone samo namale wu wamo ka maime milpeleleme mire muru ommo yukaine e isi wu yuka mi ese ingke nemei namo.
God,
wu sa mana fina e isi yuꞌpu kore mone pu yane Krais Jisas isi nem ki ese kaike yukaine aposel wongke wunini.
2 Timoti,
yene fa bilipye Krais Jisas ka nale namo nro sa yangke yene waiye yukaine auna ki koneni.
Ki keꞌre piprola mee pai yene e fika,
Aina God yane Manawamo e mone Krais Jisas ese wolpalo yene wamo ka wolnane yene ka nangke yene waiye wolraulo.
Mone e mupene mi alwone nro
3 E ki kupone yene mokoi namo ka kire kaiki provins Masedonia,
ki isi kirewi yene pu yene ese waiye taun Efesus ka yire mi kero nu uma ese fi karnoprone mi wongwongkeni e nu nire nopro nukule nu pinuma mi e God.
4 Nu ese samo nupone ka wolnumaro nale e fa karnirene mi fafaile ka nopro mi ewlangkren noula e nu flili e isi.
Mi namo,
yangke nu uma wolpuna neni ka poinpain nopune ka fi saimoro nu uma ese bilipim God ka nangke ommo e isi God yali nu ese nangke.
5 Ka,
nomu e mi kero namo ki kape pone sa rona,
pone ese samo wolpale nu pinuma plai.
Nale namo fa yemeiye wolpuna e mana fina e wola yire wu ese fi yangke nale fafaile,
ka wu namale nanrona,
wu sa fei fa yangke nale fafaile nama e God,
ka re wu wola nanrona wu ese samo bilipim Krais Jisas wokera nro.
6 Uma plai,
e nupone rokoi uporo namo ka mee nu nupene rokoi fa karnaraine noprolene mi e ommo fafaile e nomu onne.
7 Nu fa samo wola nire naine yukaine nu tikse e lo isi God yane Moses.
Ka nu fi namale mi nomu e none noprone namo.
Nu neri ka kerone mi noneni ka nire none namale mi namo.
Ka nu none fi namale mi nomu e none fa noprone namo.
8 Mone namale,
le mone minamane lo yangke ompla e God isi yina woneni,
lo sa uporo.
9 Mone re namale nanrona God fei yina lo fa kotim nu uma fa nupene nale uporo.
Onnele.
Rokoi e lo namo ko saimoro nale e pinuma fi fa nupene lo.
Ka nu uma fa wewelane ka fongkrolene,
ka nu uma fi fa nupene nale uporo nama e God.
Lo namo,
sa fa kotim nu uma e fa nangke nale fafaile ka nu uma fa nupene ommo e pikeni ka fi fa nupene nale e God wolaye.
Ka rokoi e lo re fa kotim nu uma fa nufro mokanangka ka nu uma plai rili.
10 Ka fa kotim nu pinuma e fa nangke nale pamok ka nu uma mana fa nemnangkle none kore.
Nu uma e fa pekinuꞌpune uma ka nenru uma plai nuꞌpu nu ka nangke nu naine yukaine nu uma siwolenro fa nangke ommo e nu,
lo re ese kotim nu.
Ka nu uma e fa karnirene e taim nu nire mi alwone riri.
Ka nu fi fa nangke ommo yukaine none fa nuka mi nire nangke.
Ka nu fa nangke ommo plai fa ese nuku nanrona nu fi wolane mi uporo e God yukaine mone fa moprome namo.
11 Miuporo namo,
sa mi alwone ese yire mi alele nanrona,
God e mone namo wu yuna kero woneni ka yuna ali wamo.
Ka wu yem ki ka yake ki mi mee ese kopro.
God namo yuna noula wamo ka wu sa nomu e nale e fa ainemne.
Pol yire tenkyu God e isi wolpalo wu
12 Ki kane tenkyu Krais Jisas Manawamo e mone,
e yake ki kero ka wu namale nanrona ki ese keri kero ka kangke ommo wunini.
Nanrona fane wu yem ki fa ese kangke ommo namo.
13 Isi,
ki mana fa ouwkireke ka minrikaneke Manawamo ka nu uma wunini re ki fa kangke fafaile nu.
Ki mana fa kangke nale fafaile wamo ka karkufro kekrike nu pinuma e fa bilipne.
Ka wu wolyaure ki wamo e fika,
e ki kone kangke ommo namo,
ki fi namale wu ka ki fi bilipim wu.
14 Manawamo moneni Krais Jisas namo e wolyane ki wamo ka yangke ki bilipim wu ka kane wolpuna kinini pai nu plai.
15 Mi ki ese kirepi pone namee,
sa mi alwone ese mone mingklari ese mem ka bilipim.
Krais Jisas isi yolo pike mee ese yuꞌpu kore nu pinuma fa nangke ommo fafaile.
Ki re wongke e nu uma fa nangke ommo fafaile namo,
ka ki sa sam fafaile wamo rikepone nu plai fa nangkene ommo fafaile.
16 Ka,
yene ese yuru nanrona ki mana wokera nro sa sam fafaile wamo ka Krais Jisas sam wolyaure ki wamo.
Ka ommo namo fa e yuku nu pinuma mingklari ese namale nanrona wu fa wolpun neniye,
ka wolpuna neni e wu fi fa wampaneye e nu nangke ommo fafaile nama e wu.
La e nu nuru ommo isi wu yangke namo e wu samo wolpalo ki e fika ki mana fafaile wamo isi kaiki risi nale e sin namo.
Ommo namo ese nangke nu namale ka nu ese samo bilipim wu ka nu ese nem laip fa waiye nanrona nanrona.
17 Ki samo wola kire mone pinuma mingklari ese mereri noula e God ka mane noula wamo wu e ewerme ka ingke ka nanrona nanrona.
E fika wu wokera nro sa God.
Wu sa King ka mone e fi muru wu nama e mone.
Wu e fi ri,
wu ese waiye nanrona nanrona.
Amen.
Timoti ese yeri kero fa ese yaukiri rokoi e nale fafaile e fi nemei
18 Auna ki koneni Timoti,
ki na koproke fa e kerkane yene e ommo ki kawe yene ese yangke,
nanrona sa yene ese sam wolrufu mi isi nu profet nirewi yene namo,
ka yene ese samo yeri kero ka yangke ommo fa ese yopro miuporo e God.
Ka e nu uma ouwnire mi yeneni,
yene ese yeri kero mi alwone namo yukaine nu iimuma fa neri kero ka nopune.
19 E yene yeri kero,
yene e samo bilipim Jisas ka namale nanrona yene sa uporo nama e God.
Uma plai namale nanrona nu nangke ommo plai fafaile,
ka nu fi nina God pai risi nu ka yukuleye nu rokoi uporo fa nu ese nupene.
Nanrona fane nu nangke bilip nunini fafaile yukaine sip wongke e pai pari rip ka pikpikre kei.
20 Mana plainrane e nu uma fa nangke nanrona,
sa Himeneus yane Aleksanda.
Ki kina mana plainrane namo pai mew e Satana ese wuyane namale nanrona wuyane ese fi ownire God kore.