Nale fafaire e nu Farisi namo, pone poo
(Matyu 10.26-33)
12
E taim namo nu pinuma mingklari wamo okoni nemnoku,
fane nu nemnangkaro ka rew numaro none kore.
Ka Jisas yemei ka yirengkle nu disaipol woneni nanrona,
“Pone kosamo puru yisa e nu Farisi.
Yis e nu Farisi sa nale e none fa nuka ira nu uma ka kar nopro mi uporo ka nale nunini fa nangke ommo fafaile.
2 Ommo mingklari e peki nainene ese nemei alele.
3 Nanrona fane ommo fika e pone namale ka pekipenrupe ese nemei alele ka uma mingklari ese namale.
Ka mi fika e pone popro ningki,
kaire nu uma ese neri mow riri ka mi nufu pai nu pinuma.”
Nu uma ese num God wokera nro
(Matyu 10.28-31)
4 Ka Jisas yirengkle nu kore nanrona,
“Ki kire mi alwone pone fori kinini rona,
pone e fi pum nu uma e fa nuꞌfrone nale nro rili,
e fika ingke nu e fi nangke ompla wongke kore.
5 Ki ese kukule pone mana fina ese pone e sam pum wu.
Pone e pum God nro e yuna kero fa yufro uma rili ka yingkirpanro uma panro hel.
Mi alwone!
Ki kirepi pone,
pone ese samo pum wu.
6 Pone namale rona 5pla rora aure e nu nenrune maket,
nu uma nuꞌpu 2toea nro.b
Ka God e fi wolyuma wongke.
7 God namale pu ira para e nene ira poneni.
Nanrona fane pone fa pumpe,
pone sa pumaro rora aure mingklari.
Mone e fi mum, e mone mire nanrona mone e mupene Jisas
(Matyu 10.32-33; 12.23; 10.19-20)
8 “Ki kirepi pone,
mana fina e yireli nu pinuma nanrona,
wu namale ki,
mana namo Auna e Mana wu re ese yireli nu ensel e God noula wunini.
9 Ka mana fina e yirengkle nu pinuma nanrona wu sa fei kinini,
mana namo ki re ese fi kireli nu ensel e God noula wunini.
10 Ka nu uma fopi e nire mi fafaile Auna e Mana,
God ese yuꞌpole ompla namo.
Ka mana fina e ouwyire Holi Spirit,
God ese fei yuꞌpole ompla fafaire namo.
11 “E nu numale pone paipi peri ungklampren e uma wamfafai e mow kori ka uma wamfafai e gapman ka nu uma wamfafai plai e nunari noula wamo,
pone fa wol mingklaripe ka wolape mi rongkele ese pone pirengkle.
12 E fika Holi Spirit wone nro ese yukule pone mi ese pone pire.”
Mi riri e mana yunari ommo mingklari
13 Ka mana wongke e yakle nu pinuma mingklari nerine ka yireni Jisas nanrona,
“Tikse,
yene yireni rani kinini se wu e yepi ommo e Aina kikaneni,
plai wunini ka plai kinini.”
14 Ka Jisas yireni wu nanrona,
“Ai!
Fina yire ki e kaike yukaine mana e fa kepi ommo e yenyane?”
15 Ka wu yirengkle nu pinuma mingklari nanrona,
“Pone poo!
Pone fa nampalope ommo mingklari wamo.
Pone puꞌpu ommo mingklari ka ommo namo ese fei yangke pone paipe uporo.”
16 Ka Jisas yirengkle nu mi riri wongke nanrona,
“Mana wongke yunari ommo ka romaula mingklari,
pike wunini sa ommo nemei uporo.
17 Ka mana namo yire wone kore nanrona,
‘Ki ese kangke rongkele?
Ki koii onnele fa e kenru ommo namo naine.’
18 “Ka wu yire nanrona,
‘Ki ese kangke rona,
ki ese kekrile mow e kone fa kenru ke ommo ka kere as wamo.
Ka e ki kenru ommo upupu ka ommo e nengkrele,
ese resukru.
19 Ka ki ese kire kone kore nanrona,
“Ki kuna ommo upupu mingklari e nene kikla mingklari.
Ki ese kosamo kaike,
koke,
kaikolko ka woluporo kone kore.” ’
20 “Ka God yireni wu nanrona,
‘Yene ikakro onnele!
Naminre ningki yene ri ka ommo e yene yunariye fa yangke yene waiye uporo namo fina ese yuꞌpu.’
21 “Ommo namo ese yemei nu uma e fa nunarine ommo mingklari ka nangke none naine uporone ka nu fa fi nale ommo ka none wolpuna plau paiye God.”
Pone fa pumpe
(Matyu 6.25-33)
22 Ka Jisas yirengkle nu disaipol woneni nanrona,
“Nanrona fane ki kirepi pone,
pone fa wolpaurepe ommo fika ese pone po ka paipe laip,
ka ommo fika ese pone paile nale papri poneni.
23 Laip namo sa fi yukaine ommo fa none,
ka nale sa fi yukaine ommo papri fa nailene.
24 Pone puru rora kotkot,
nu fi fa nokle ommo ka nuꞌpune ommo nengkrele,
ka mow e fa nenrune ommo e fa none sa onnele,
God fa yaliye.
Ka pone pinuma God fa wol yapaye pone wamo,
fi yukaine rora.
25 Fina e pone waiye ka wolyaure ommo namo,
ka ommo namo ese yangke wu as waiye laip kaire plai kore.
Ese onne!
26 Le pone fi pangke ompla pitiri namo,
e fika ka pone ke wolpaurepe ommo mingklari?
27 “Pone puru alfa ula nemeine fa fi nangke ommo wamo ka narku ommo papri e none fa nailene.
Ki kire mi alwone pone nanrona,
isi King Solomon yaile ommo papri upupu woneni,
ka alfa ula,
kala e nu sa yumaro ommo papri e King Solomon.
28 Kiprela e nerine mee,
ningkinama nu naurere ka ningkipanro niꞌpi.
God fa yuruye kiprela pitpitiri namo nro ka saimoyale ommo papri none nailene.
Ka pone uma e puna bilip pitiri,
pone kosamo namale rona God fa yuruye ommo papri e pone pailepe.
29 Pone fa wolape ompla fika ese pone po ka paikopo.
Pone fa paipe wolape ka wolpaurepe.
30 Nu pinuma e fi namale God sa fa wolane ommo namo.
Ka Aina poneni namale pu ommo namo ese nangke pone paipe rona.
31 Nanrona fane pone pina God waiye yukaine king e laip poneni sa wu ese yape pone ommo namo.
Rokoi fa nemnokune ommo
(Matyu 6.19-21)
32 “Pone sipsipc mokplainren,
pone fa pumpe,
e fika Aina poneni yire pu,
wu woluporo ka yape pone kingdom woneni.
33 Pone penru ommo mingklari poneni nu uma nuꞌpu ka romaula e pone puꞌpupe ommo namo pone e pali nu uma e ommo onnele.
Ingke pone ese puꞌpu ompoi e romaula fi peperi,
ka pempoku ommo upupu poneni e heven,
ommo namo ese fi pekimo.
Ommo upupu e pone pempokupe heven namo,
mana wongke e fi pekiyem ka ommo yukaine roklela ese fi nokoro.
34 Koii e ommo upupu poneni nainene,
wolpuna poneni re ese naine koii namo.
Pone poo
(Matyu 24.42-44)
35 “Pone paile ommo papri plolam resukru fa pone e pangke ommo,
ka pesana lam neri aline ka paipe poripe nro.
36 Pone paipe poripe nro yukaine nu uma fa nai norine bos noneni ese yolowi kore,
e pai kola e pin yane mana nemnuꞌpune.
E wu yolowi ka mew raraku rama,
nu e wampane nro nenrume rama.
37 Ese uporo,
e nu uma nai norine bos noneni,
e bos noneni yolowi ka namale rona nu nanaine norine.
Ki kire mi alwone pone,
wu ese raile ommo papri e nu uma fa nampolene ommo ka wu ese yirengkle nu uma naine tebol ka wone ese yali nu ommo fa no.d
38 Le bos noneni yolowi ningki wamo wee rora ninalene,
ka yuru rona nu uma nanaine norine,
sa ese uporo uma namo.
39 “Ka pone sam namale mi namo:
Le mow ripile namale rona e mana fa peki yuꞌpu ommo ese wi kaire namo,
wu e fi waiye yuruye nro mana namo yekri mow woneni.
40 Pone re saimoro ka paipe purupe nro,
e fika Auna e Mana wu re ese yolowi e pone fei wolape,
wu ese wi.”
Mi riri e mana fa yangkeye ommo e mana wongke
(Matyu 24.45-51)
41 Ka Pita yarine Jisas nanrona,
“Manawamo,
yene yire mi riri namo mu nro wee uma mingkla plau?”
42 Ka Manawamo yireni wu rona,
“Mana fa yuruye nu uma e fa nangke ommo e bos noneni,
ka yupene mi e wu ka namale fa yangke ommo uporo,
bos woneni ese youw wu pai ka yepiyali ommo e fa no.
43 Ese uporo wamo e mana namo,
e bos woneni yolowi ka yuru ommo e wu yangkeye sa uporo.
44 Ki kire mi alwone pone rona mana namo bos woneni e yireni wu pai risi ommo mingklari e wone.
45 Ka mana fa yangke ommo e bos yire wone kore nanrona,
‘Bos kinini ese pai kari kikla ka e fi yolowi wampane,’
nanrona fane wu waiye woye ka yaikowo mii kero,
spak ka yufro nu pinuma e fa nane nangkene ommo namo.
46 E bos yolowi,
mana e fa yangke ommo wunini fei namale rona wu ese wi.
Bos ese yaure mana namo plola plainren ka yina plau nu uma fi fa bilipne.
47 “Mana fina fa yangke ommo e bos namale ommo e bos yireni ka wu fi yangke resukru wolpuna e bos woneni,
mana namo ese nu kosamo nufu.
48 Ka mana e fi namale ommo fika e bos woneni wolaye ka yangke ommo fafaire,
mana namo,
nu e fi sam nufu.
Nu uma e nuꞌpu ira uporo e bos,
bos ese yali mi kero fa nurune ommo mingklari woneni.
Ne mana fina,
bos yane ira uporo mingklari,
mana namo nu ese nunarine wu mi mingklari.
Jisas yolowi yangke nu pinuma ese fei nemnoku naine, nu ese ninan nai
(Matyu 10.34-36)
49 “Ki koloki e niꞌpi kina pike mee,
ka niꞌpi yuꞌpo pu sa e uporo.
50 Eni wongke yukaine baptaise ki ese kem,
fane wola kinini fei uporo pai la eni namo pekini se.
51 Pone pire rona ki koloki pike mee e kangke nu uma e nopune,
e fi nopu none kore wee?
Onne!
Ki kire mi alwone pone,
ki an koloki fa kauri nu pinuma e ninan nai none kerila.
52 Naminre ka pai,
uma 5pla fa nemnoku naine mow wokera ese ninanai none kerila.
Plainren ese naine none kerila ka plainrikera ese naine none kerila.
Ka nu uma namo ese wolpuna neni none kore.
53 Nu ese ninanai none kerila nanrona fane nangka ese wolpuna neni auna ka auna re ese wolpuna neni nangka.
Moka ese wolpuna neni nona ka nona re ese wolpuna neni moka,
nanrona fane moka ese wolpuna neni warifle,
ka warifle re ese wolpuna neni moka.”
Nu namale taim
(Matyu 16.2-3)
54 Ka Jisas yirengkle nu pinuma mingklari nanrona,
“E pone puru kupu yuka koii e kaire paloye ka wampane nro pone fa pire nanrona,
‘Riple ese yilo,’
ka riple yilo.
55 Ka e pone puru rapu pririye pone fa pire rona,
‘Mokoi ese worila,’
ka mokoi wori.
56 Pone uma fa karpirepe ka fi namale ommo e pone poprope!
Pone samo namale ommo e pike ka nemi.
E fika ka pone fei namale ommo e nemeine mee?”
Yene yane mana wongke yire kotim yene, yane nopro mi
(Matyu 5.25-26)
57 “E fika ka pone fei puru rokoi uporo ese pone pupene?
58 E rona yene yane mana wongke yire kotim yene,
ka e yenyane paipipe rokoi yene yapu rokoi rongkele ese wu yemei fori yeneni kore.
Le onne,
wu ese yumane yene pai mana e fa yupuye kot ka mana namo ese yirane yene pai mew wola e nu polis ka nu ese nina yene pari kalabus.
59 Ki kirewi yene,
yene e fei yolo moile pai la yene yina romaula e nu nire yene.”