Ɓaria Cautera mala Bulǝs aban ká aban Amǝ Korinti ka à gilǝì a baku mǝnana dotanni nakam a nre Bulǝs andǝ ikǝlisiya mǝnana a Korinti ka. Aɓalǝ amǝnia yì amǝkwaɗi aɓa nggeala Korinti ka, aɓwana nakam mǝnana à yinǝ munǝo mǝcande bwāng arǝ Bulǝs, sǝ yì ka, nda rǝ lǝmndǝ ama ɓabumi do aɓa alte à nǝ̀ gilǝki nre-rǝarǝu, sǝ nda rǝ lǝmndǝ banɓoarnado yi mǝnana ɓǝ̀ gir nî yi pangŋǝna anggo ka.

A tita mǝnia yì cautera ka, Bulǝs naban na cau amur gir mǝnana kpapia andǝ ikǝlisiya mana a Korinti. Mǝnggi ɓa tǝr gir mǝnana tsǝa sǝ nyesǝ cau hakǝrak amur ɓǝsǝkiban andǝ mgbicau mǝnana aɓa ikǝlisiya ka, sǝ lǝmndǝ banɓoarnado male ama mǝnia yì pekiban hakǝrak ka, yina nǝia aɓa vwaki bu arǝ cauɓikea andǝ pwanzali, andǝ gilǝki nre-rǝarǝu. Pǝlǝa zǝmbǝi ikǝlisiya ɓǝa pabu nǝ bumpwasǝa ace pa gbasha aban amǝkwaɗi aɓa nzali Yahudi mǝnana à nda aɓa tǝle ka. Aban ká masǝlǝata yi Cautera ka, Bulǝs bǝlkuni aban bang ce tunǝban mǝnana Ɓakuli tunǝi yi duk mǝ'mishan ngga. Bǝlkuni, ace lǝmndǝì aɓwana bǝti aɓa Korinti mǝnana à twali ɓamuria ama yia ka amǝ'mishan mǝ mǝsǝcau nì na, sǝ à kǝ na amur Bulǝs ama yì ka, mǝ'mishan mǝ'nyirì na ka, ama à kuti nǝ kǝgir ɗang.