Ɓaria cautera mala Bulǝs aban ká aban
AMƏ KORINTI
Makkun pur nǝban Bulǝs
1
Mǝnia yì cautera ka,
pur nǝ bu Bulǝs mǝnana nǝ eare mala Ɓakuli sǝ tàri,
ama ɓǝ̀ duk mǝ'mishan mala Kǝrǝsti Yesu ka,
andǝ mǝ'eam sǝm Timoti.
Sǝm nda ban gilǝì ikǝlisiya mala Ɓakuli mǝnana a Korinti,
andǝ aɓwana mala Ɓakuli kat mǝnana a nzali Akaya ka.a
2 Ɓǝ̀ Tar sǝm Ɓakuli andǝ Mǝtalabangŋo Yesu Kǝrǝsti pa wun ɓwamuru andǝ dorǝpwala.
Ɓakuli ka nda mǝ girikiban
3 Ɓwangsǝban ɓǝ̀ o aban Ɓakuli mǝnana nda Tar Yesu Kǝrǝsti Mǝtala sǝm ngga,
mǝnana nda Tar sǝm mǝ'sǝn mǝsǝswatǝr nî,
andǝ mǝ'pa girikiban kat ka.
4 Kǝ giriki sǝm aɓalǝ atanni ma'sǝm kat,
ace mǝnana ɓǝ̀ sǝm giriki aɓea aɓwana,
mǝnana à nda aɓa tanni ka,
nǝ ulang girikiban mǝ'mwashati mǝnana Ɓakuli girikina sǝm nǝi ka.
5 Sǝ kǝla mǝnana sǝm nggǝ nu tanni kpǝm ata Kǝrǝsti ka,
anggo gbal sǝ sǝm nǝ̀ kum girikiban kpǝm nǝ bu Kǝrǝsti.
6 Ko ɓǝ̀ sǝm kutio aɓalǝ atanni mala do mǝkwane ka,
nda àkǝ̀ ce girikiban andǝ amsǝban ma'wun.
Sǝ ɓǝ̀ sǝm kum girikiban ngga,
nda ace mǝnana ɓe wu kum girikiban andǝ rǝcandǝa mala do nǝ munyi aɓa gandǝrǝu aɓalǝ atanni mǝ'mwashati mǝnana sǝm nggǝ nu ka.
7 Tsǝkɓalǝu ma'sǝm arǝ came ma'wun kàngkàng ngga kǝ dǝurǝ ɗang,
acemǝnana sǝm sǝlǝna ama,
kǝla mǝnana wu kǝ nu tanni ata sǝm ngga,
anggo gbal sǝ wu nǝ̀ kum girikiban ata sǝm.
8 Wun amǝ'eamrǝarǝu,
sǝm nggǝ earce ama,
wu kǝa dum nǝ ɗwanyi sǝlǝe amur tanni mǝnana kum sǝm a nzali Asiya ka ɗang.
Acemǝnana sǝm kutio aɓata parban mala tanni mǝgule mǝnana kuti rǝcandǝa ma'sǝm,
yale kǝla pà sǝm nǝ̀ au ɗang.b
9 Ɓafo ka,
lú nda kǝgir mǝnana sǝm twali ama ueka sǝm ngga.
Sǝa ma mǝno ka pa anggo ace mǝnana ɓǝ̀ sǝm ngga guli arǝ ɓamur rǝ sǝm ɗang,
ɓǝ̀ sǝm guli arǝ Ɓakuli nǝmurǝì,
mǝnana loasǝkiyi alú ka.
10 Amsǝna sǝm aɓalǝ amǝnia yì anggurlú ka,
sǝ nǝ̀ amsǝ sǝm ɗǝm.
Tsǝkɓalǝu ma'sǝm ngga,
nda àkǝ̀ rǝì,
sǝ yì ka,
nǝ̀ lidǝmbǝa nǝ amsǝ sǝm.
11 Wu kǝ bwala sǝm nggam nǝ hiwi,
ace mǝnana ɓǝa aɓwana pas pak yàwá a kunì sǝm ace ɓwamuru mǝnana sǝm kumo nǝ hiwi mala aɓwana pas ka.
Bulǝs bǝl ɓa ce nggaɗi akánì male
12 Nggori ma'sǝm ngga,
nda mǝnana ama,
giu-ɓabum sǝm kǝ bangga sǝm ama aɓa mǝsǝcau ka sǝm dumǝna do ɓanza nǝ ɓabum ɓoarnsari.
Sǝm dumǝna gbal nǝ ɓabum sǝm mwashat mǝnana kǝ pur nǝban Ɓakuli ka,
nggeamurǝmi ka,
mǝnana lǝmndǝa aɓa dotarǝu ma'sǝm sǝnǝa wun ngga.
Sǝ mǝno ka sǝm pè aɓa kpata sǝlǝe mala ɓwapǝndǝa ɗang,
nda nǝ ɓwamuru mala Ɓakuli.
13 Gir mǝnana sǝm gilǝa wun ngga nda kǝ mǝnana wu nǝ̀ gandǝ ɓallè,
wu nǝ̀ bwalte ka.
Sǝ tsǝkɓalǝu mem ngga nda mǝnana ceì nǝ̀ kpaka wun pepe.
14 Sǝ kǝla mǝnana ado ka wu surǝna sǝm bǝti ka,
wu nǝ̀ ngga surǝ sǝm pepe,
ace mǝnana a pwari yiu mala Mǝtala sǝm Yesu ka,
wu nǝ̀ nggori nǝ sǝm,
kǝla mǝnana sǝm nǝ̀ ngga nggori nǝ wun ngga.
15 Acemǝnana mǝ ndanǝ makɓalǝu arǝ mǝno kat ka sǝ ǝn yi kani a ɓabumam ama mǝ nǝ ká aban wun atadǝmbe,
ace mǝnana ɓǝ̀ wu yi kum tsǝkbu kusǝ ɓari.
16 Kànì mem mǝno ka,
nda mǝnana ama anjar aban ká a Masǝdoniya ka,
mǝ nǝ kar aban wun.
Sǝ ɓǝ̀ mǝ nǝ nyari Masǝdoniya ka,
mǝ nǝ kar ɗǝm aban wun,
ace mǝnana ɓǝ̀ wu pusǝkwar-bǝrem ace gya mem aban ká a nzali Yahudi.c
17 Mǝno ka nda ɗenyicau mem.
Sǝ lang ǝn kani mǝ nǝ pa anggo ka,
ǝn do kǝla ǝn panǝ ɗenyicau re?
Ko ǝn nggǝ twal akani mem kǝla pe mala amǝɓanza ace mǝnana mǝ nǝ na ama,
“E,
e” sǝ,
“Awo,
awo” a tarǝia ka le?
18 Kǝla mǝnana Ɓakuli nggaɗikiyi bumi arǝ cau male raka,
cau mem aban wun ngga,
“E” andǝ “Awo” na a tarǝia ɗang.
19 Acemǝnana Yesu Kǝrǝsti Muna mala Ɓakuli,
mǝnana mim sǝnǝ Silas andǝ Timoti,
sǝm hamnǝ cau male aban wun ngga,
“E” na andǝ “Awo” a tarǝia ɗang.
A ɓalǝi ka,
“E” na,
a koya pwari ka.d
20 Acemǝnana apacau mala Ɓakuli kat ka à lumsǝna aɓa Kǝrǝsti nǝ eare ama “E.”
Nda gir mǝnana tsǝa sǝ nǝ ban Yesu Kǝrǝsti sǝ sǝm nggǝ na ama,
“Ɓǝ̀ do anggo” ace gusǝlǝ Ɓakuli ka.
21 Sǝ ado ka,
Ɓakuli na tsǝk sǝm sǝnǝa wun,
ɓǝ̀ sǝm kum kusǝu-came kàngkàng aɓa tārǝù ma'sǝm sǝnǝa Kǝrǝsti.
Kǝ yì nda mǝnana tàr sǝm ngga.
22 Yi canba sǝm nyoulǝa male arǝ sǝm,
mǝnana lǝmndǝ ama sǝm nda ka amale ka.
Sǝ mǝno yì nyoulǝa ka nda Bangŋo male mǝnana tsǝka sǝmi a ɓabum sǝm,
ɓǝ̀ lǝmndǝa aɓa mǝsǝcau ama nǝ nzǝmo ka,
nǝ̀ yia pà sǝm agir kat mǝnana bangŋa ama nǝ̀ pà ka.e
23 Ɓakuli nǝ nakunam ama mǝsǝcau na ǝn banggiyi ka.
Gir mǝnana tsǝa sǝ ǝn nyare a Korinti raka,
nda àkǝ̀ ce mǝnana ama mǝ ngga yiu mǝ kpaki arǝ wun raka.
24 Sǝm pa aban ɓariki ama sǝm nǝ̀ tsǝk wun ɓǝ̀ wu kpata gir mǝnana sǝm earkiyice amur paɓamuru ma'wun ngga ɗang;
a kun mani ka sǝm ndarǝ pak turo sǝnǝa wun ace banɓoarnado ma'wun.
Acemǝnana paɓamuru ma'wun na tsǝa sǝ wu cam kàngkàng ngga.