Ramnggi ɓoro ace aɓwana mala Ɓakuli
16
Amur cau mala ramnggi ɓoro ace bwali aɓwana mala Ɓakuli mǝnana a Urǝshalima ka:
Wu pa kǝla mǝnana ǝn kania a'ikǝlisiya mǝnana a Galati ka.a
2 A tita pwari mala koya nre-limo ka,
koyan ata wun ngga,
ɓǝ̀ san nkanggari boalo mǝnana kumo sǝ kārǝa arǝ kume male ka ɓǝ̀ ci.
Wu kǝa kúndǝo ama she mǝ yina ka sǝ wu nǝ̀ yia ramnggi a kun-bu wun ɗang.
3 Ɓǝ̀ ǝn yina ka,
mǝ nǝ yia gilǝ acautera amur aɓwana mǝnana wu earnǝia ama ɓǝa kyan nǝ ɓoro ma'wun a Urǝshalima ka.
4 Sǝ ɓǝ̀ yi dumǝna ama ɓoaro male ka mǝ kyan ngga,
sǝm nǝ̀ ongsǝ sǝnǝia.
Kànì mǝnana a ɓabum Bulǝs ace gya male ka
5 Mǝ nǝ ká a makka wun kun,
anzǝm mǝnana ɓǝn karna aɓa nzali Masǝdoniya ka.
Acemǝnana kànì mem ngga,
nda mǝnana ama mǝ nǝ pǝlǝa aɓa Masǝdoniya.b
6 Earka mǝ nǝ duk zuku aban wun,
ko yakǝla mǝ nǝ mal mbulo kat aban wun,
anzǝm man ngga sǝ wu nǝ̀ pusǝkwar-muram aban lidǝmbǝa nǝ gya mem.
7 Eare mem ngga,
nǝma pa mǝ nǝ sǝn wun a murkuli ɗang,
nǝma ɓǝ̀ banem sauwa aban wun,
ɓǝ̀ Mǝtalabangŋo ear ka.
8 Sǝ ado ka,
mǝ nǝ ngga duk zuku a Afisu she ɓǝ̀ Lamsan Pentikos karǝna ka.c
9 Anjar mala pakki aturo na pas kani,
sǝa ma aɓibura gbal ka,
à cambam kingging.
10 Ɓǝ̀ Timoti yina ka,
wu é nǝ banɓoarnado.
Yì ka,
turo mala Mǝtalabangŋo na pakkiyi,
kǝla mǝnana ǝn pakkiyi ka.d
11 Wu kǝa eare ɓǝ̀ kǝɓwa nyesǝi ɓà ɗang.
Ɓǝ̀ nǝ̀ nyare aban yiu abanam ngga,
wu pusǝbǝri pepe.
Mǝ nda aban kundǝmuri andǝ amǝ'eamrǝarǝu.
12 Mala mǝ'eam sǝm kǝla Apolo ka,
ǝn camarǝ ne wi nǝma yì andǝ aɓea amǝ'eamrǝarǝu ka,
ɓǝa kya ban wun.
Sǝ ado ka,
kǝ ear ama nǝ̀ ká ɗang.
Nǝ̀ ká nǝ nzǝmo ɓǝ̀ kumǝna dǝmbǝu ka.
13 Wu tsǝk kir wun.
Wu tamsǝkusǝ wun kàngkàng aɓa paɓamuru.
Wu pak aburana.
Wu dum nǝ rǝcandǝa.
14 Ko man wu nǝ̀ pak ka wu pe aɓa earcearǝu.
15 Wu sǝlǝna ama Sǝtifanas andǝ ɓala male ka,
à nda ka amǝdǝmbǝa ak cau mala Ɓakuli a nzali Akaya,
sǝ à pana ɓamuria arǝ turo ace aɓwana mala Ɓakuli.
Ən nggǝ zǝmbǝa wun,
wun amǝ'eambǝam,
16 wu okia aɓwana kǝla amǝnia,
andǝ koya ɓwa na mǝnana kǝ pak turo,
sǝ kǝ pa rǝcandǝa aɓa kpapi ata turo ka.
17 Banɓoaram nǝ yiu mala Sǝtifanas,
sǝ Fotunatus,
sǝ Akaikus.
À yì lumsǝna kun turo mǝnana nongŋo acemǝnana wu pa kani raka.
18 Yia ka,
à nongsǝam ɓabumam andǝ ɓabum wun gbal.
Aɓwana mǝnana à kǝ pak turo mǝ'mǝsǝcau nì kǝla amǝnia ka,
ɓalǝ wun ɓǝ̀ kǝa lorǝia ɗang.
Masǝlǝata makkun mala Bulǝs
19 A'ikǝlisiya mǝnana a bu-nzali Asiya ka,
à kǝ makka wun kun.
Akila andǝ Pǝrisǝla,
andǝ ikǝlisiya mǝnana kpapiyi a ɓala malea ka,
à kǝ makka wun kun,
nǝ earcearǝu mala Mǝtalabangŋo.
20 Amǝ'eamrǝarǝu mǝnana a kani kat ka,
à kǝ makka wun kun.
Wu makki arǝ wun kun kat nǝ earcearǝu mǝfele mala amǝkwaɗi.
21 Mim Bulǝs,
mǝ nda ǝn gilǝa wun mǝnia yì makkun ngga nǝ buam.
22 Ɓǝ̀ kǝɓwa kǝ earce Mǝtalabangŋo raka,
ɓǝ̀ suban sulǝo amur ɓwe!
Marana tha - Mǝtala sǝm,
yiu!
23 Ɓǝ̀ ɓwamuru mala Mǝtalabangŋo Yesu,
do ata wun.
24 Ən nggǝ makka wun kun nǝ earcearǝu aɓa lullǝ Kǝrǝsti Yesu.
Amin.