Earcearǝu
13
Ɓǝ̀ mǝ gandǝ na cau nǝ
akún mǝnana a ɓanza kat
andǝ akún mala amǝturonjar,
sǝ ǝn panǝ earcearǝu raka,
ǝn dumǝna gonggwang
mǝ loasǝbani,
ko ana raka,
ǝn dumǝna kuli
mala amǝ'ntul.
2 Ɓǝa bangŋa ama,
mǝ ndanǝ ɓoro mala
na ɓabum Ɓakuli,
ko ǝn bwalta acau
ɓa-sǝmbǝrǝa kat,
sǝ ǝn surǝ koya gir ka,
ko mǝ ndanǝ guli arǝ Ɓakuli,
ulang mana nǝ̀ gandǝ
gǝshi ankono,
sǝ ǝn panǝ earcearǝu raka,
mǝ nda kǝgir ɗang.a
3 Ɓǝ̀ mǝ nǝ pe amǝtǝr
agirkuma mem kat,
mǝ nǝ pà nggūrǝam
ɓǝa pisǝì ace nggori,
sǝ ǝn panǝ earcearǝu raka,
mani pà nǝ̀ puram kǝgir ɗang.
4 Earcearǝu ka ndanǝ
munyi,
andǝ pe mǝɓoarne.
Earcearǝu ka kǝ pak
mɓali ɗang,
kǝ nggori,
ko gusǝlǝ-muru ɗang.
5 Earcearǝu kǝ pa
arkikun ɗang,
panǝ earce-ɓamuru ɗang,
sǝ kǝ kaurǝa arǝ pak
bumlulla ɗang.
Earcearǝu kǝ bwal ɓwa
a bum ɗang.b
6 Ban kǝ ɓoari wi arǝ
ɓealɓikea ɗang,
ban kǝ ɓoari wi arǝ mǝsǝcau.
7 Earcearǝu kǝ bwaki bui
arǝ ɓwa ɗang.
Earnǝɓwa male,
andǝ tsǝkɓalǝu male,
andǝ gandǝrǝu male
aɓalǝ agir kat ka
kǝ kpa ɗang.
8 Earcearǝu ka masǝlǝate
pà kàm ɗang,
kǝ makban ɗang.
Na ɓabum Ɓakuli ka
nǝ̀ ngga came.
Anakiacau nǝ
akún-takuli ka
à nǝ̀ ngga came.
Ko sǝlǝe ka nǝ̀ ngga kutio.
9 Surǝe ma'sǝm ngga
lumsǝ ɗang,
sǝ sǝm surǝ ɓabum
Ɓakuli kat ɗang.
10 Sǝa ma ɓǝ̀ gir
mana lumsǝ ka,
yina ka,
amǝnana à lumsǝ raka,
à nǝ̀ ndǝrmi.
11 Mǝnana mǝ nda muna ka,
ǝn nggǝ na cau,
ǝn nggǝ ɗenyicau sǝ
ǝn nggǝ sǝngir
a sǝne mala amuna.
Lang adyan ǝn
karǝna-ɓwa ka,
ǝn bwaki buam
arǝ pakkia agir
mala amuntulo.
12 Adyan ngga,
sǝm nggǝ
sǝnban mbǝrǝm-mbǝrǝm,
kǝla yilǝmi gir aɓa
tapwari mǝpǝndǝke,
sǝ a dǝmbǝa ka,
sǝm ne sǝnban
ɓamǝsǝu andǝ ɓamǝsǝu.
Ado ka,
surǝe mem ngga
lumsǝ ɗang,
sǝ a dǝmbǝa ka,
mǝ nǝ surǝ koman ngga,
kǝla mǝnana Ɓakuli
surǝam ɗǝɗak ka.
13 Ado ka,
amǝnia yì
agir tārú,
à nda à ue ka:
paɓamuru,
andǝ tsǝkɓalǝu,
andǝ earcearǝu;
sǝ mǝgule malea kat ka,
nda earcearǝu.