Aɓoro bangcau mala Ɓakuli andǝ nacau nǝ aɓea akún
14
Ɓǝ̀ earcearǝu duk gir mǝnana nda wu nǝ̀ ɓangŋa ate amur acili agir ka,
sǝ ɓǝ̀ rǝ wun ɓǝla arǝ kum aɓoro mala Bangŋo,
nggeamurǝmi ka ɓoro mala na gì Ɓakuli.
2 Ɓǝ̀ ɓwa na arǝ na cau nǝ aɓea akún ngga,
cau male ka nda andǝ Ɓakuli.
Kǝ ɓwapǝndǝa pa nǝ̀ ok ɓālǝi ɗang;
yì ka,
nda aban na cau mala agir-sǝmbǝrǝa nǝ rǝcandǝa mala Bangŋo.
3 Sǝ ɓwa mǝnana kat kǝ na gi Ɓakuli ka,
nda ban ne aɓwana ɓǝa kum ɓakban andǝ rǝcandǝa andǝ girikiban.
4 Ɓwa mǝnana kǝ na cau nǝ akún-takuli ka,
nda ban ɓak ɓamuri,
sǝ ɓwa mǝnana kǝ na gi Ɓakuli ka,
nda ban ɓak ikǝlisiya kat.
5 Eare mem ngga,
koyan ata wun ngga ɓǝ̀ na cau nǝ akún-takuli;
sǝ gir mana ǝn earce kutibanì ka,
nda mǝnana ama koyan ata wun ngga ɓǝ̀ na gi Ɓakuli.
Acemǝnana na gi Ɓakuli ka,
kuti nacau nǝ akún-takuli,
she ko ɓǝ̀ do ama ɓeɓwa na abanì,
mǝnana nǝ̀ bǝl ɓa cau mǝno à ne nǝ kún-takuli ka,
ace ɓak ikǝlisiya.
6 Wun amǝ'eamrǝarǝu,
ɓǝ̀ ǝn yiu aban wun,
sǝ ǝn nggǝ na wun cau nǝ akún-takuli ka,
mana wu nǝ̀ kumo a ɓalǝi?
Sǝ ɓǝ̀ ǝn yiu nǝ sǝne mala Bangŋo,
ko surǝgir,
ko na gi Ɓakuli,
ko kanigir ka,
amǝnia ka à nǝ̀ bwala wun nggam.
7 Ko nggearǝ agir-nggwam mǝnana à pànǝ yilǝmu raka,
kǝla antetu ko zangŋan,
sǝ ɓǝa walia ko à twangŋia,
sǝ gia waria rǝia ɗàngɗáng raka,
kǝɓwa pà nǝ̀ bwalta ɓoaro mala gia ɗang.
8 Sǝ ɓǝ̀ mǝtwang njawe-lwa twangŋi a nzongŋi raka,
palang sǝ à nǝ̀ sǝlǝ ama njawe-lwa na à twang ngga?
9 Anggo gbal,
ɓǝ̀ ɓwa ne aɓwana cau nǝ kún mǝnana à bwalte raka,
palang sǝ à nǝ̀ surǝ cau mǝnana nakiyi ka?
Cau mǝno ne ka umna andǝ gung.
10 Akún na kam ɗàngɗáng a ɓanza,
sǝ ko mǝyani ka ɓālǝi na kam.
11 Sǝ ɓǝ̀ ǝn bwalta kún mǝnana à kǝ ne raka,
ǝn dumǝna ɓwa-kúnɗangna aban ɓwa mǝno nakiyi cau ka,
sǝ yì gbal ka dumǝna ɓwa-kúnɗangna abanam.
12 Anggo gbal sǝ pa aban wun.
Acemǝnana rǝ wun kǝ ɓǝla arǝ kum aɓoro mǝnana Bangŋo nǝ̀ pākiyi ka,
wu ɓariki wu kwaro aɓalǝ amǝnana à nǝ̀ ɓak ikǝlisiya kat ka.
13 Ace mani ka,
ɓwa mǝnana kat kǝ na cau nǝ aɓea akún-takuli ka,
ɓǝ̀ pak hiwi gbal ama ɓǝ̀ kum bǝl ɓacau mǝnana ne ka.
14 Sǝ ɓǝ̀ ǝn pak hiwi nǝ ɓe kún mǝnana ǝn surǝì raka,
bangŋo mem na pakkiyi hiwi ka,
ɗenyicau pà aɓa gir mǝnana ǝn nakiyi ka ɗang.
15 Sǝ ado ka,
mana mǝ nǝ pa?
Mǝ nǝ pak hiwi nǝ bangŋo mem,
sǝ mǝ nǝ pak hiwi nǝ ɗenyicau mem gbal.
Mǝ nǝ tu'nggyal nǝ bangŋo mem,
sǝ mǝ nǝ tu'nggyal gbal nǝ acau mǝnana ǝn bwalta ɓalǝia ka.
16 Sǝ ɓǝa kǝ ɓwangsǝ Ɓakuli nǝ bangŋo nǝmurǝì ka,
lang sǝ aɓwana mǝnana à oeo sǝ à bwalta cau mo raka à nǝ̀ ear ama ɓǝ̀ do anggo?
Palang sǝ à nǝ̀ bwalo kam arǝ pak yàwá yi mǝnana yia ka à surǝ cau mǝnana a nakiyi raka?
17 Ɓafo ka,
hiwi ɓwangsǝban mo aban Ɓakuli ka ndanǝ ɓoaro,
sǝ aɓwana mǝnana à kǝ oeo ka,
à kum ɓakban ɗang.
18 Ən pakki Ɓakuli yàwá,
acemǝnana ǝn kuti koyana ata wun ngga nǝ nacau nǝ akún-takuli.
19 Sǝa ama aban rambǝa mala ikǝlisiya ka,
kǝpǝna mǝ na cau tongno mǝnana aɓwana nǝ̀ bwalte,
à nǝ̀ kani kǝgir kam ngga,
amur mǝnana mǝ nǝ nakia acau á-lum nǝ akún-takuli ka.
20 Wun amǝ'eamrǝarǝu,
wu kǝa pǝlǝ amuntulo aɓa ɗenyicau ma'wun amur surǝ amǝnia yì agir ka ɗang.
Wu duk amuntulo arǝ ɓealɓikea,
sǝ wu gul aɓa ɗenyicau ma'wun.
21 Aɓa Nggurcau mala Musa ka Mǝtalabangŋo bangŋa ama:
“Mǝ nǝ ne aɓwana
mem cau
nǝ amǝ'kunɗangna.
Mǝ nǝ na cau nǝ
mburkun abǝri.
Kat andǝ amani ka,
à pà nǝ̀ okam ɗang.”a
22 Kǝ ndo ka,
nacau nǝ akún-takuli ka gir'lǝmndǝa na ace aɓwana mǝnana amǝkwaɗi na raka,
pà nǝ̀ duk gir'lǝmndǝa aban amǝkwaɗi ɗang.
Ɓoaro mala na gi Ɓakuli ka,
nda ace amǝkwaɗi,
pa ace aɓwana mǝnana amǝkwaɗi na raka ɗang.
23 Ɓǝ̀ yi do ama ikǝlisiya yi ramǝna kat,
sǝ koyana ka lo aban na cau nǝ akún-takuli.
Ɓǝ̀ aɓwana mǝnana à bwalta ce ɗang,
ko amǝkwaɗi na raka,
à yiu ata wun,
à yì ok koyana aban na cau nǝ akún-takuli ka,
à pà nǝ̀ twali ama múr wun pǝlǝ nǝ pǝlǝa re?
24 Ɓǝa na ama koyan ngga nda rǝ na gi Ɓakuli,
sǝ aɓwana mǝnana amǝkwaɗi na ɗang,
ko à bwalta ce raka,
à yiu ata wun ngga,
cau mala Ɓakuli mǝnana à ok ka,
nǝ̀ soea a ɓabumia,
nǝ̀ lǝmndǝia wia acauɓikea malea.
25 Ɓǝ̀ à ndarǝ oe ka,
aɗenyicau ɓa-sǝmbǝrǝa malea ka,
à nǝ̀ pusǝrǝia a banfana.
Sǝ à nǝ̀ ɓun amur ankunia,
à nǝ̀ peri aban Ɓakuli,
à nǝ̀ nggǝ na ama,
“Ɓafo na,
Ɓakuli ka ndakani aɓalǝ wun!”
Nzongcau mala peri
26 Wun amǝ'eamrǝarǝu,
ɓa cau mǝnana ǝn nakiyi ka ndya ka.
Ɓǝ̀ wu yi dapina abanɓwáná aban peri ka,
aɓea ɓwana ka nggyal na à nǝ̀ tù ka.
Aɓea ka gir na à ndanǝi à nǝ̀ kani ikǝlisiya ka.
Aɓea ɓwana man ngga causǝna na Ɓakuli lǝmndǝia wia aɓa bangŋo à nǝ̀ ne ikǝlisiya ka.
Aɓea aɓwana ka à nǝ̀ bangcau nǝ akún-takuli.
Aɓea ɓwana ka à nǝ̀ bǝlki ɓalǝ acau mǝnana à nea nǝ akún-takuli ka.
Sǝa ma koya gir à pe kat ka,
ɓǝa pe ace ɓak ikǝlisiya.
27 Ɓǝ̀ aɓwana ɓǝa kǝa kútì ɓari ko tārú,
mǝnana à nǝ̀ na cau nǝ akún-takuli ka ɗang.
À nǝ̀ na gbal ka,
à nǝ̀ nggǝ oasǝki a rǝia,
sǝ dumǝna púp ama ɓeɓwa nakam mǝnana nǝ̀ bǝlki ɓalǝ ace ka.
28 Sǝ ɓǝ̀ kǝɓwa pà kàm mǝnana nǝ̀ bǝl ɓa cau raka,
yì mǝ'nacau nǝ kún-takuli ka ɓǝ̀ duk kuni ɗǝong aban kpapi mala ikǝlisiya,
nacau male ɓǝ̀ do a nre andǝ Ɓakuli.
29 Aɓwana ɓari ko tārú mǝnana Ɓakuli pea wia cau male ka,
ɓǝa na cau,
sǝ acili ɓwapǝndǝa ka ɓǝa pelǝki ɓa cau mǝnana à bangŋi ka.
30 Ɓǝ̀ kǝ ɓwa aban do,
kum bǝsa causǝna mǝnana Ɓakuli lǝmndǝì wi aɓa bangŋo,
sǝ ɓeɓwa na ban na cau ka,
ɓwa mǝno kǝ na cau ka ɓǝ̀ tamsǝ nacau male.
31 Aɓa oasǝke a rǝarǝia ka aɓwana mǝnana à ndanǝ cau mala Ɓakuli à nǝ̀ bang ngga,
à nǝ̀ gandǝ na cau kat,
ace mǝnana koyan ngga ɓǝ̀ kum gir kania,
ɓǝa kum ɓakban.
32 Abangŋo mala na gi Ɓakuli mǝnana amǝ'ɓangna nani ka à nda aɓata yalban mala amǝ'ɓangna.
33 Acemǝnana Ɓakuli ka,
Ɓakuli mala zuriki gir na ɗang,
mala nongsǝ cau a tarǝia na andǝ dorǝpwala.
Kǝla mǝnana ndakam arǝ abankpapi mala aɓwana mala Ɓakuli ka,
34 amamǝna ɓǝa do kunia ɗǝong aban koya dapi mala ikǝlisiya,
acemǝnana à earia wia ɓǝà na cau ɗangb.
Akuni ka ɓǝà do aɓa nyesǝmuru kǝla mǝnana Nggurcau mala Musa kànì ka.c
35 Ɓǝ̀ ɓe kǝgir nakam à kǝ earce surǝì ka,
ɓǝa ɗi ka aburria a ɓala,
acemǝnana gir kǝsǝkya na ɓǝ̀ mɓwama na cau aɓa ndahiwi.
36 Nggearǝì ka,
wu kǝ sǝni kǝla cau mala Ɓakuli tite aban wun le?
Ko ana raka,
wu kǝ nda mǝnana bwal ban wun nǝmurǝ wun ngga le?
37 Ɓǝ̀ kǝ ɓwa kǝ sǝni kǝla yì ka,
mǝ na gì Ɓakuli na,
ko ndanǝ ɓe kǝ ɓoro mala Bangŋo ka,
ɓǝ̀ sǝlǝ ama cau mǝnia ǝn gilǝa wun ngga,
nzongcau na,
pur nǝ ban Mǝtalabangŋo nǝ nggearǝì.
38 Ɓǝ̀ ɓwa burice mǝnia ka,
yì nǝ nggearǝì ka à nǝ̀ burice.