Aɓoro mala Bangŋo
12
Adyan ngga wun amǝ'eamrǝarǝu,
ǝn eare nǝma ɓǝ̀ wu dum nǝ ɗwanyi sǝlǝe amur aɓoro mala Bangŋo Mǝfele mǝnana à pà sǝm ngga ɗang.
2 Wun ngga,
wu sǝlǝna ama ɗiɗyal mǝnana wu nda ka aɓwana aɓa do ɗwanyi surǝ Ɓakuli ka,
à ɓosǝki kusǝ wun aban peri ata ankúl mǝnana à kǝ na cau raka.
3 Ace mani ka,
ǝn nggǝ earce nǝma ɓǝ̀ wu sǝlǝ ama,
kǝɓwa pà kàm nǝ́ Bangŋo mala Ɓakuli a rǝì,
sǝ nǝ̀ pur a kuni ama,
“Suban na amur Yesu” ɗang.
Sǝ kǝɓwa pà nǝ̀ na gbal ama,
“Yesu ka Mǝtalabangŋo na” ɗang she nǝ Bangŋo Mǝfele.
4 aAɓoro mala bangŋo na kam ɗàngɗáng,
sǝa ma tǝria ka pur nǝban Bangŋo Mǝfele.
5 Aturo nakam ɗàngɗáng,
sǝ Mǝtalabangŋo amuria ka nda mwashat.
6 Anjargula turo nakam ɗàngɗáng,
sǝa ma kǝ Ɓakuli mǝ'mwashati na kǝ pak turo nǝ sǝm kat ka.
7 Sǝ koyana ka à pàni wi ɓoro mala bangŋo,
ace bwali acilia aɓwana kam.
8 Ɓe ɓwa ka,
Bangŋo pe wi cau mǝnana lumsǝ nǝ sǝlǝe ka,
sǝ ɓǝ̀ ɓwa ka,
Bangŋo pe wi cau mǝnana lumsǝ nǝ surǝe ka.
9 Kǝ Bangŋo mǝ'mwashati mǝnia ka,
pe ɓeɓwa guli arǝ Ɓakuli,
sǝ ɓeɓwa ka,
pe wi ɓoro mala twalban rǝkwana.
10 Ɓe ɓwa ka,
Bangŋo pe wi rǝcandǝa mala pakki agir-ndǝlǝki;
ɓeɓwa ka,
pe wi na gi Ɓakuli.
Ɓe ɓwa ka,
pe wi sǝlǝe mala gau nre bangŋo mǝɓafoe andǝ mǝ'nyirì.
Ɓe ɓwa ka,
pe wi nacau nǝ aɓea a kun,
sǝ ɓeɓwa ka,
pe wi sǝlǝ mala mǝnggi ɓalǝ acau mǝnana à ne nǝ aɓea a kun ngga.
11 Rǝcandǝa mala amǝnia yì aɓoro ka kǝ pur nǝ ban Bangŋo mǝnia mwashat ka,
sǝ kǝ Bangŋo mǝ'mwashati na kǝ gaki amǝnia yì aɓoro ka kǝla mǝnana ɓabumi kànì ka,
ace mǝnana koyana ka,
ɓǝ̀ kum ɓoro mǝnana kum ngga.
Nggūrǝu mwashat sǝ abare pas
12 Nggurǝ ɓwapǝndǝa ka ndanǝ abare pas,
sǝ amǝnia yì abare pas ka,
à yì dapi à duk nggūrǝu mǝ'mwashati.
Anggo gbal sǝ Kǝrǝsti pa.b
13 Sǝm kat ka,
à pakka sǝm batisǝma nǝ Bangŋo mǝ'mwashati ɓǝ̀ sǝm duk nggūrǝu mwashat,
amǝ Yahudi andǝ aɓwana mǝnana amǝ Yahudi na raka,
aguro sǝ aɓwana mǝnana aguro na raka.
Sǝ sǝm kat ka,
à tsǝa sǝm nu aɓa Bangŋo mǝ'mwashati.
14 Sǝ nggūrǝu ka,
bare mwashat na ɗáng,
abare na pas.
15 Sǝ ɓǝ̀ kusǝu nǝ bangŋa ama,
“Mǝ nda bu ɗang,
ace mani ka ǝn pa aɓa nggūrǝu ɗang,”
mǝno ka,
pà nǝ̀ ci nǝ̀ puriɓa nggūrǝu ɗang.
16 Sǝ ɓǝ̀ kiru nǝ̀ na ama,
“Acemǝnana mǝ nda mǝsǝu raka,
ǝn pa gbal aɓa nggūrǝu ɗang,”
mǝno ka nǝ̀ ci nǝ̀ puri ɓa nggūrǝu le?
17 Ɓǝà na ama nggūrǝu kat ka mǝsǝu na ka,
ɓwa nǝ̀ okban nǝ mana?
Ko a na raka,
ɓǝ̀ nggūrǝu kat ka kiru na ka,
ɓwa nǝ̀ ok rǝmban nǝ mana?
18 Sǝ Ɓakuli ka nǝ eare male sǝ tsǝk koya bare ɓwa aɓa nggūrǝu,
aban mǝnana bumi earce ka.
19 Sǝ ɓǝ̀ yia kat ka,
barǝu mwashat na ka,
nggūrǝu ka nǝ̀ pa ake?
20 Abarǝu nakam pas,
sǝa ma nggūrǝu ka,
nda mwashat ɓǝrɓǝr.
21 Mǝsǝu pa nǝ̀ banggi bu ama,
“Kǝgir oasǝam a rǝo ɗang!”
Sǝ ɓamuru pa nǝ̀ ne kusǝu gbal ama,
“Kǝgir oasǝam a rǝo ɗang!”
22 Ɓafo ka,
aɓea abarǝu mala nggūrǝu mǝnana à twalia kǝla à pa a kun kǝgir raka,
ɓǝa pà kàm raka nggūrǝu pa nǝ̀ lumsǝ turo male ɗàng.
23 Abare nggūrǝu mǝnana à twalia ama à karǝ kǝgir raka,
sǝm nggǝ tsǝk kiria kǝrkǝr.
Sǝ abarǝu mǝnana à ɓoarsǝna raka,
sǝm nggǝ ɗenyi nǝia pepe.
24 Sǝ abarǝu mǝnana amǝ ɓoarsǝne na ka,
sǝm nggǝ tsǝk kiria pepe ɗang.
Ɓakuli ka,
tsǝk nggūrǝu abanɓwáná,
acemǝnana ɓǝa tsǝk kir abarǝu mǝnana à gatti ka.
25 Pè anggo ace mǝnana gakya ɓǝ̀ kǝa pa aɓa nggūrǝu ɗang,
sǝ abare yì nggūrǝu ka à nǝ̀ nggǝ ɗenyi nǝ rǝarǝia.
26 Ɓǝ̀ ɓe barǝu mwashat nanǝ tanni ka,
acili abarǝu ka,
à kutina aɓa tanni gbal kat ate.
Sǝ ɓǝ̀ ɓe mwashat kum gulo ka,
abarǝu kat ka,
ban nǝ ɓoaria wia ate.
27 A dyan ngga,
wun kat ka,
wu nda ka nggurǝ Kǝrǝsti,
sǝ koyana ata wun ngga,
bare na.
28 Aɓa ikǝlisiya ka Ɓakuli tsǝngŋǝna aɓwana arǝ abancame.
A bancame mǝdǝmbe ka amǝ'mishan na.
A ɓaria bancame ka,
amǝ'ɓangna mala Ɓakuli na.
A tāruia bancame ka,
amǝkanigir na.
Acilia mǝnana à kpatea ka à nda ka
amǝ'pakki agir-ndǝlǝki,
andǝ
amǝnana à pea wia rǝcandǝa mala twalban rǝkwana ka.
Aɓea ɓwana ka,
gandǝrǝu mala bwali aɓwana na,
andǝ amǝnana malea ka
yal aɓwana na ka,
sǝ aɓea ɓwana ka,
amǝ na akún-takuli ɗàngɗáng na.c
29 Yia kat ka,
amǝ'mishan na le?
Yia kat ka,
amǝ'ɓangna mala Ɓakuli na le?
Yia kat ka,
amǝkanigir na le?
Sǝ yia kat ka,
à ndanǝ rǝcandǝa mala pakki agir-ndǝlǝki le?
30 Yia kat sǝ à ndanǝ ɓoro mala twalban rǝkwana le?
Yia kat sǝ à kǝ na cau nǝ akún-takuli le?
Sǝ yia kat sǝ à ndanǝ ɓoro mala bǝlki ɓalǝ akún-takuli le?
À nda kat ɗang!
31 Ɓǝ̀ rǝ wun ɓǝla arǝ kum aɓoro mǝnana à nda dǝmbǝa nǝ acilia ka.
Sǝ ado ka mǝ nǝ lǝmndǝa wun njar mǝnana ɓoaro kutibanì kat ka.