— Taw'ããts hẽ ỹ bahõm sa joo banäng hẽnh, ỹ bataa hyb n'aa sa joom ranu gekãã do ag tũũ kajäk doo. Jé ky enyym doo, ta joom banäng doo bä ỹ bataa —näng mäh. Ti m' Naõmi ky hadoo:

— Taw'ããts hẽ. Ahõm nä. Tii d’ né mabad'oo —näng mäh. 3 Ti m' Rut mä ahõm kän, tabataa hyb n'aa sewada ag kajäk doo, joom nu gek'ãã do sa jawén. Tabataa doo bä né hẽ, Boas, Erimerek makũh wakããn, joom banäng do danäh. 4 Ti m' bada peej mä Boas kajaa Berẽnh bä naa. Kedëng mä takajaa bä ta joom nu gek'ãã do sa hã:

— Bë mahang Tak'ëp Hyb N'aa Jawyk Do bawät ỹ karẽn —näng mäh. Ti m' moo b'ook do raky hadoo:

— Taw'ããts hẽ Tak'ëp Hyb N'aa Jawyk Do õm taky n'aa edëng —näk mäh. 5 Ti m' Boas beaanh joom nu gek'ãã do sa wahë n'aa hadoo do hã:

— Jaa toog ta ti maruus? —näng mäh. 6 Ti m' sa wahë n'aa hedoo do ky hadoo:

— Moab buuj, Naõmi sii Moab häj n'aa naa hana do tii. 7 Tetsẽẽ hã tabataa hyb n'aa joom nu gek'ãã do sa jawén, sewada ag kajäk doo. Mooh hahũũnh. Takajaa bä né hẽ m' tadu doo tamoo wät doo. Mooh wäd had'yyt hẽ. Jããm né hẽ kanahën d'os hẽ tamoo kameh'ããk tabadahẽẽm doo bä —näng mäh. 8 Ti m' Boas ky hadoo Rut hã:

— Ỹ mamaa newë —näng mäh. — Ahõm manäh tawób sa joom banäng hẽnh t'ĩìh hẽnh manataa hyb n'aa joom ag. Babä ayyw ỹỹj karom haa sa pa —näng mäh. 9 — Baad mahegãã nyy bä joom ranu gekãã. Tii bä ỹỹj ta natuuh hã mew'yyt do sa jawén mabataa —näng mäh. Ỹ mejũũ da ajyy õm raky n'aa narejãã hyb n'aa —näng mäh. — Mahoo kaaj bä, meëng naëng jajé ajyy ragóp do manajuu yb gó habëëh do uuh —näng mä Boas kyy Rut hã. 10 Ti m' tũũ Rut nu hyy wät ta pooj jé. Ti m' taky hadoo ta hã:

—H'ëëd hyb n'aa mabetsëëh hã ỹỹ? —näng mäh. Ỹ ta s'eeh hẽnh naa né paawä, baad ỹ magadoo —näng mäh. 11 Ti m' Boas ky hadoo:

— Ỹ ky n'aa napäh sahõnh hẽ baad hadoo do a mayyn hã mamoo wät doo, a patug dajëp jawén paa bä. Ỹ ky n'aa napäh meréd boos a yb a ỹỹn daheeh, a häj n'aa na-ããj hẽ, wawẽẽ hẽ Isaraéw buuj manahapäh do paa sa mahang mabawäd däk hyb n'aa. 12 Ỹ karẽn paawä baad hadoo do mamoo wät do säm Tak'ëp Hyb N'aa Jawyk Do anoo a hã. Ỹ karẽn paawä baad Tak'ëp Hyb N'aa Jawyk Doo, P'op Hagä Do Israéw buuj rah'yy kaha'eeh do banoo mamoo wät do säm. Ti né ti mawë na doo, õm tamo n'aa jesuu hyb n'aa —näng mä Boas kyyh. 13 Ti m' Rut ky hadoo Boas hã:

— Baad had'yyt hẽ ỹ karẽn ỹ moo wät a matym gó wahëh ỹỹ, hỹ jawén hã ỹ maky enyyw had'yyt hyb n'aa. Ỹ h'yyb nyyw däk man'oo bä. Baad hadoo doo me ỹ mamaher'ood wät, a karom ỹỹj sa yd jé hadoo do né paawä ỹỹh —näng mä Rut. 14 Ti m' sa waa rabawa bä, Boas naëënh Rut. Ti m' taky hadoo ta hã:

— B'ëëp ana —näng mäh. — Mawa ãã sii. Mahehoonh hahỹ a waa, pãw bäh, uwa bëë me matsing doo me —näng mäh. Ti m' Rut bahyy sooh Boas karom ỹỹj sa mahang. Ti m' Boas bets'ëë däk ta hã sewada ag kejä doo. Ti m' tabawa wät ta waa. Ta wog nyy däk bä m', mad'aak nä ta waa uuh. 15 Ti m' tamoo wät doo hẽnh Rut bahõm jawén paa bä, Boas ky hadoo ajyy sa hã:

— Bë an'oo Rut bataa hyb n'aa joom natuu mahang. Bë moo geä̃m manäh —näng mäh. 16 — Bë asog ta natuuh hã kataa do ag wób tũũ takajäk hyb n'aa Rut bataa hyb n'aa. Bë moo geä̃m manäh —näng mä Boas kyy ta sii moo b'ook do sa hã. 17 Ti m' Rut mä moo wäd had'yyt hẽ. Jããm hẽ tamoo yyw däk, tũũh däg bä kä papỹỹj. Ti m' joom ag tataa doo tahes'ooj hõm mäh. Hajõng mä tataa do s'ëëb. Sét hẽ tetyy n'aa epah häd näng do gadẽẽ tamo haj'aa. 18 Ti m' tamajëëh ta s'ëëb. Takaja jëng bä m' ta metëëh mä Naõmi hã. Tan'oo däk mä Boas mo haj'aa ta waa mad'aak do Naõmi hã. 19 Ti m' Naõmi beaanh ta hã:

— Nyy bä mabataa naga hẽ? Nyy bä mamoo wäd wät? —näng mäh. — Taw'ããts hẽ P'op Hagä Do ky n'aa edëng joom danäh hã, õm masa doo —näng mäh. Ti m' Rut maher'oot ta mayyn hã joom banäng do danä ky n'aa. Ti taky hadoo:

— Joom mahang naga hẽ ỹ moo wäd wät do danäh häd Boas —näng mäh. 20 Ti m' Naõmi ky hadoo:

— Baad ub Tak'ëp Hyb N'aa Jawyk Do ky n'aa edëng ti ỹ karẽn —näng mäh. — Dooh Tak'ëp Hyb N'aa Jawyk Do h'yy kahỹỹd bä. Ër patug makũh sa hã taky enyym paah. Ër, hedëp doo hã taky enyym na-ããj hẽ —näng ta kyyh. Ti m' p'aah hẽnh Naõmi ky hadoo:

— Patuk ỹ makũũh wakããn né ti Boas. Ër wakããn né tii. Ji tamasa do wakããn n'aa né tii, ër ky n'aa jaw'yyk do mejũũ doo da —näng mäh. 21 Ti m' Rut ky hadoo:

— Boas ỹ tamaher'oot, ta wë moo bok do sa pa ỹ baym hyb n'aa, tabahëëj jëng bä kä ranu gekãã doo —näng mäh. 22 Ti m' Naõmi ky hadoo ta takaanh hã:

— Taw'ããts né hẽ ti mamoo wät Boas karom ỹỹj sa sii. Ji hapäh mä ti tawób sa joom banäng bä õm raejã bä —näng ta kyyh. 23 Ti m' Boas karom ỹỹj sa pa had'yyt hẽ Rut bataa rabahajaa bä kä sewada, triig na-ããj hẽ rnu gekãã doo. Naõmi pa had'yyt hẽ Rut bagëë wät.