Rut 1

Rut

Hỹ hadoo mä ỹỹnh Rut häd näng do panyyg n'aa

Ti m' p'ooj ub, Israéw buuj sa mo n'aa jesuu n'aa rabag'ããs noo gó, ti awät mä sah. Ti hyb n'aa kä Israéw buuj seeh, panang Berẽnh häd näng do buuj, taberéd däk mä ta panang. Judah häj n'aa bä ti Berẽnh. Ti m Moab häj n'aa hẽnh mä tabahõm. T'ĩĩnh mä ta baa wät sah mahä̃nh. Tamahũũm ta ỹỹm, ta taah ta sii. 2 Aj'yy häd mä Erimerek. Ta ỹỹm häd mä Naõmi. Ta taah sa häd mä Marõn Kirõn daheeh. Eparata makũh panaa né tii, panang Berẽnh häd näng do Judah häj n'aa bä naa. Ti m' Moab häj n'aa hẽnh rabahõm kän. T'ĩĩnh hẽnh mä rababoo däk 3 Ti m' ta see pé noo gó kä Erimerek, Naõmi patug, dajëp. Ta mab hẽ Naõmi bawäd hõm ta taah sa sii. 4 Ti m' Naõmi taah raket'ëë hõm ỹỹj Moab buuj sa hã. Kirõn ỹỹm häd mä Or-Pah, Marõn ỹỹm häd mä Rut. Ti m' ji moo sahõnh hẽ ta hyb n'aa pé ta baab n'aa ta tii bä rababok do jawén paa bä, 5 Marõn Kirõn daheeh dejëp. Ta mab hẽ Naõmi bawäd hõm is. Maa badoo wät ta patug. Maa bedo bong ta taah.

Hahỹ panang Berẽnh hẽnh Naõmi babaaj nä do ky n'aa

6 Ti m' ta see pé noo gó, Moab häj n'aa bä tabawät nä bä, Naõmi ky n'aa napäh Tak'ëp Hyb N'aa Jawyk Do ky n'aa edëng ta karapee, Israéw buuj. P'aah hẽnh mä ta tii bä ta wakããn rajoom enäh hõm, waa enäh hõm mä P'op Hagä Do an'oo bä. Ti hyb n'aa ta h'ëëd Naõmi benyyw hõm ta häj n'aa hẽnh tababaaj hõm hyb n'aa ta takaanh sa daheeh. 7 Ti m' ratsyym kasog kän Moab bä naa. Ta tyw n'aa Judah häj n'aa hẽnh hahõm doo me rabah'ũũm. 8 Ramahõm me m' Naõmi ky hadoo ta taanh sa hã:

—Bë abaaj hõm bë ỹỹn tób hẽnh. Bë ky enyym do paa da bë patug makũh sa hã, hã ỹ na-ããj hẽ, tii da né hẽ ỹ karẽn paawä Tak'ëp Hyb N'aa Jawyk Do ky enyym bë hã ẽnh —näng mäh. 9 —Ỹ karẽn paawä bë patug seeh Tak'ëp Hyb N'aa Jawyk Do banoo bë hã, baad bë babok hyb n'aa —näng mä Naõmi kyyh sa hã. Ti m' Naõmi tapa tsanetsup bong ta takaanh takedëë wät do hyb n'aa. Ti m' tak'ëp mä rabaoot . 10 Ti m' raky hadoo ta hã: Dooh. Ãã ah'ũũm a sii, a wakããn rahabok hẽnh —näk mä sa kyyh sa mayyn hã.

11 Ti m' Naõmi ky hadoo sa hã:

—Bë abaaj hõm, takanh haa. H'ëëd hyb n'aa bë karẽn bë bah'ũũm si ỹỹ?

—Bë hã pé g'eeh ỹ etaah näh p'aah hẽnh, bë ketëë hyb n'aa sa hã rabewäh hũm jawén paa bä? —näng mäh. 12 Taw'ããts hẽ bë abaaj hõm né hẽ. Ỹ wah'ëë däg ỹ kat'ëë bä p'aah hẽnh. 13 Nayyw hẽ ỹ kat'ëë bä paawä, nayyw hẽ ỹ eta bä paawä bë gada g'eeh rabewä hõm? Bë gada g'eeh hajõõ ta baab bë kanetëë doo? Dooh, takanh haa. Tak'ëp ỹ bahob wät nesaa do bë ahob bong do bahä̃nh. Tak'ëp Hyb N'aa Jawyk Do ỹ tahyb n'aa wareem —näng mä Naõmi kyyh. 14 Ti m' p'aah hẽnh mä rabaoot ẽnh. Ti m' Or-Pah tapa tsanetsup wät mä ta mayyn takedëë hõm do hyb n'aa. Rut mäh, ky kah'ũũm Naõmi hã. Takarẽn ta pa tabaym. 15 Ti hyb n'aa Naõmi ky hadoo ta hã:

—Rut —näng mäh. —Mamaa newë —näng mäh. —Or-Pah abaaj hõm ta wakããn, Moab buuj sa wë ta kabarii wë na-ããj hẽ. Abaaj hõm ta sii —näng mä Naõmi kyyh. 16 Ti m' Rut ky hadoo:

—Na mahũũm ỹ a sii. Mamejõ manäh ỹ babaaj hõm —näng mäh. Mahahõm hẽnh né hẽ ỹ bahõm. Mabaym bä né hẽ ỹ baym —näng mäh. —Israéw buuj, a wakããn, wakãn haa däg. P'op Hagä Do mah'yy kaha'eeh Doo, ta hã na-ããj da ỹ h'yy ka'eeh näng mäh. 17 —Madajëp hẽnh ỹ dajëp. T'ĩĩh hẽnh da ỹ rajeh'aa këë ỹ dajëp bä —näng mäh. —Ỹ abaaj hõm bä paawä a mahä̃nh, taw'ããts hẽ P'op Hagä Do banoo hã ỹ tak'ëp nesaa do ỹ bahoop hyb n'aa. Jããm hẽ ër ketyn bong ỹ dajëb bä —näng mä Rut kyy Naõmi hã. 18 Ti m' dooh Rut ahỹỹd bä ta h'yyb, Naõmi bahapäh bä, ta sii né hẽ takarẽn tabahõm, tabahapäh bä, tii kä m' dooh taky kahũũm wäd bä ta hã. 19 Ti m' rabahõm kän. Panang Berẽnh hẽnh rakaja hõm bä, tak'ëp mä panang buuj ratsebé sa hyb n'aa. Ti m' ỹỹj, panang buuj, raky hadoo:

—Bë hegãã! Naõmi. Naõmi né hẽ! —näk mäh. 20 Ti m' Naõmi ky hadoo sa hã:

—Bë maneëëj manä ỹ Naõmi. Bë maneëëj ỹ Mara. Sahõnh Hẽ Sa Bahä̃nh Kabaj'aa Do an'oo däk hã ỹ tak'ëp ỹ ahoop doo, ti hyb n'aa tak'ëp ỹ h'yy katón —näng mäh. 21 —Babä naa ỹ bahõm noo gó sahõnh hẽ wë ỹ tabanäng, ỹ patug näng, ỹ taah näng. Map ỹỹ hẽ ỹ hỹỹ kä, ỹ kasuud is na-ããj hẽ ỹ babaaj nä bä, Tak'ëp Hyb N'aa Jawyk Do an'oo bä näng —mäh. H'ëëd hyb n'aa ỹ bë maneëënh Naõmi, tsebé doo? Tak'ëp Hyb N'aa Jawyk Do ỹ tahyb n'aa wareem. Sahõnh Hẽ Sabahä̃nh Kabaj'aa Do an'oo däk hã ỹỹ, tak'ëp ỹ ahoop doo —näng mä Naõmi kyy ỹỹj sa hã. 22 Tii d’ né paa m' Naõmi babaaj hõm Moab bä naa ta häj n'aa hẽnh. Rut, ta takaanh, hada mäh.