Han'yyh doo kahỹỹd bong doo
Esito häj n'aa bä naa han'yyh do sa panyyg n'aa hahỹỹh
P'ooj up Esito häj n'aa bä kaj'aa do sa häd hahỹỹh
1
Ti m' hahỹỹh Isaraéwa taah sa häd, sa yb Jakó häd näng do sii Esito häj n'aa bä kaj'aa do paah, sa ä̃j, sa taah sii hẽ kajaa doo: 2 Rubẽnh, Simijãw, Lewi, Judah, 3 Isakah, Seburũn, Bejamih, 4 Dãn, Napatawi, Gad, Aser. 5 Jusé tii b’ wëëd däk né tii. Sa pooj jé takajaa Esito häj n'aa bä. Sahõnh hẽ Jakó panaa ajyy 70.b6 Ti m' ta see pé noo gó, rawehëh däk bä kä, Jusé, Jusé hỹỹj, sahõnh hẽ sa sii Esito bä kajaa do paah dejëb kän. 7 Sa panaa, Isaraéw buuj, taah enäh hõm mäh. Tak'ëp mäh raka'oot. Tak'ëp mäh rakanekan. Jé pad'yyt hẽ Esito häj n'aa bä rakanekan däk, rabahajõõ däk.
8 Ti m', hajõõ ta baab jawén paa bä m' Esito häj n'aa wahë n'aa seeh tadu doo tabag'ããs doo. Dooh m' ta ti ky n'aa napëë bä Jusé makũũh, Jusé makũũh moo wät do paah ky n'aa. 9 Ti m' taky hadoo ta karapee hã:
—Bë hyb n'aa matakä! —näng mäh. —Ä̃m n'aa nyy däk, tak'ëp Isaraéw buuj raka'oot doo, tak'ëp rabahejooj däk do hyb n'aa na-ããj hẽ —näng mäh. 10 —Kaneb'ooh doo du do bä, kamaj'ĩĩ da ër wë, ër majĩĩ da ramasa, tii bä raberéd däk da ër häj n'aa. Ti hyb n'aa, taw'ããts hẽ ër matakëë sa hã, rakanaood wät hyb n'aa —näng mäh sa wahëh kyyh.
11 Ti hyb n'aa kä rasëëw hõm ajyy tak'ëp Isaraéw buuj mejũũ doo, tak'ëp ramoo bok hyb n'aa, Isaraéw buuj rahyb n'aa ton hyb n'aa rakanaood wät hyb n'aa. Ramejũũ sa hã panang Pitõn häd näng doo, Rameses häd näng do panang daheeh ratama. Esito buuj sa waa rabenäm do panang n'aa ta tii. Kep'aak do nado ta tii ramoo bok doo. 12 Ti hadoo né paawä m', tak'ëp Isaraéw buuj rarahejãã né paawä m', tak'ëp mä Isaraéw buuj raka'oot. Tabahä̃nh rarahejã né paawä tak'ëp raka'oot tii bä. Ti hyb n'aa Esito buuj rajeỹỹm kän mäh Isaraéw buuj. 13 Ti hyb n'aa kä m' tak'ëp tabahä̃nh ramejũũ sa hã sa wë ramoo bok doo hã. 14 Tak'ëp mä rarahejãã. Rahyb n'aa ton ran'oo bä. Tsäng s'ëëb, ta tsa n'aa sii hẽ ramejũũ ramoo bok. Sa joom hã hajõng doo ramoo bok ran'oo bä na-ããj hẽ. Tak'ëp né hẽ rarahejãã Isaraéw buuj. Dooh m' rat'yyd mehĩĩn bä sa hã.
15 Ti m' Paraóh, Esito sa wahë n'aa, maher'oot ỹỹj hã, Sipara Puah häd enäh doo hã, Heberc buuj ỹỹj ajãn benäng doo hagã n'aa sa hã. Hahỹỹ da tamejũũ sa hã:
16 —Heber buuj sa ỹỹj bë masa bä sa taah benäng bä, aj'yy tado bä bë hegãã bä, bë dejëëb ta tii. Ỹỹnh tado bä, dooh bë dejëëb bä —näng mäh Paraóh kyyh.
17 Tii da Paraóh mejũũ né paawä rabad'oo, dooh m' Sipara Puah, ajãn hagã n'aa, radejëëb bä Heber buuj ajãn ajyy, P'op Hagä Doo rajeỹỹm, raweh'ëëh do hyb n'aa. 18 Ti m' Paraóh mejũũ ranaëënh ta wë Sipara Puah daheeh. Rakajaa bä m' taky hadoo sa hã:
—Hëd n'aa tii da bë wén d'oo? Hëd n'aa bë nadejëëb sa taah? —näng mäh.
19 Ti m' ajãn hagã n'aa raky hadoo:
—Hej'oonh Heber buuj sa ä̃j. Dooh Esito buuj rahado bä. Ãã kajaa pooj jé, ãã masa hyb n'aa sa hã paawä, paa enä däk sa taah ãã pooj jé —näk mä sa kyyh Paraóh hã.
20 Ti m' baad P'op Hagä Doo ky enyym Sipara Puah sa wë, tii d’ rabad'oo do hyb n'aa. Tabahä̃nh mäh raka'ood kän mä tii bä Isaraéw buuj. 21 Ta hã Sipara Puah daheeh raweh'ëëh do hyb n'aa, P'op Hagä Doo banoo sa hã rataah enä hõm hyb n'aa.
22 Ti m' sahõnh hẽ ta karapee hã kä Paraóh mejũũ hahỹỹ da:
—Rabenäng bä, bë dawäts tamé sahõnh hẽ Heber buuj sa taah ajyy. Bë dejëëb manäh ỹỹj rado bä —näng mä Paraóh kyyh ta karapee hã.