50
Juséh nu hyyh sooh mä ta yb jó, tatsanetsup wät mäh, ta p'ãã ód wät mäh. 2 Ti m' Juséh mejũũ ta bin n'aa ramoo bok hyb n'aa ta yb s'ëëb kanarejãã hyb n'aa. Ti d’ né hẽ m' rabad'oo rebiin doo.
Genesis 50:2-26
3 Ramoo bok do hebiin doo 40 m' ta ä̃h. Tii hã m' ta ä̃h ramoo bok doo. Ti m' Esito buuj rabaoot ta hyb n'aa 70 ta ä̃h.
4-5 Ti m' tatabëëj hõm bä ha'oot doo, Juséh ky hadoo Paraó karapee sa wahëh hã:
—Ỹ karẽn paawä ỹ bë ky n'aa her'oot Paraó hã. Hahỹỹ da d’ bë kyyh ta hã: “Ee makũũh ỹ tamejũũ ỹ ky däng. Hahỹỹ d’ paa ta kyyh hã ỹỹ: ‘Edah ỹ dajëp. Ỹ karẽn ỹ madakä jëng pä gó ỹ gagój däk doo gó Kanaãh häj n'aa bä’, näng ta kyyh hã ỹỹh. Hỹỹ kä ỹ karẽn paawä man'oo bä t'ĩĩ hẽnh ỹ bahõm ỹ dakëë hyb n'aa ee makũũh. Tii bä ỹ abaaj nä p'aa hẽnh wawẽẽ hẽ’’— Näng mä Juséh kyyh ta sii er'oot doo raher'oot hyb n'aa Paraó hã.
6 Ti m' Paraó ky hadoo:
—Ahõm nä t'ĩĩ hẽnh, madakä jëëh a yb makũũh tamejũũ doo da, maky däng doo da —näng mä Paraó kyyh.
7 Ahõm kän mä tii bä Juséh ta yb makũũh dakëë doo. Ta sii hah'ũũm sahõnh hẽ Paraó karapee sa wahëh. Paraó sii moo bok doo had'yyt hẽ. Sahõnh hẽ ky n'aa etsëëh doo Esito bä. 8 Sahõnh hẽ rabahõm Juséh sii moo bok doo, sahõnh hẽ ta wakããn, sahõnh hẽ ta yb makũũh sii habok doo. Jããm né haym karapé, sa masããh Gosẽnh bä. 9 Ta wób rabahõm sa hood gó cavalo takyyk doo gó. Hajõk mä ta sii hah'ũũm.
10 Rakaja hõm bä m' triig gamyyj aj'yy Atad häd näng doo behemaan bä, rabaym mäh. Tamiih Joradãn häd näng doo nedaa bä m' tii. Tii bä m' tak'ëp raba'oot. Tii bä 7 ta ä̃h Juséh bagä, tabaoot ta yb makũũh hyb n'aa. 11 Ti m' Kanaãh buuj, tii bä habong doo, rabahapäh bä Juséh ha'oot doo Atad moo hew'ëët bä, raky hadoo:
—Esito buuj kamag en'ỹỹh, tak'ëp rawén ‘oot. Baad up ti sa h'yyb ta hyb n'aa.
Ti hyb n'aa rawén häd n'oo däg kän tii panang Joradãn nedaa bä hadäk doo Abéw Misarajĩma.
12 Tii d’ né m' rabadoo kän Jakóh taah tamejũũ do paa da. 13 Ramahũũm né hẽ Kanaãh häj n'aa hẽnh, radakëë doo kä m' Mak-Pewa pä gó Mameréh nedaa bä. P'ooj ub Abraãm epaag hõm do paa m' ta gëëw sii hẽ Eperõn, Hit buuj hã, radabong hyb n'aa dejëp doo. 14 Ti m' Juséh, ta wakããn, sahõnh hẽ ta sii han'aa doo, radakä jëng jawén paa bä ta yb makũũh, abaaj hõm mä sahõnh hẽ Esito hẽnh.
15 Sa yb makũũh dajëp jawén paa bä m', Juséh wakããn raky hadoo rakaner'oot bä:
—Nyyd g'e d’ Juséh bad'oo ër hã dooh d’ tamabaan bä ër rahejãã do paah? Tamabaanh g'e da? —näk mä sa kyyh.
16-17 Ti hyb n'aa ramejũũ sa ky n'aa Juséh hã. Hahỹỹ d’ sa kyyh:
—Ër yb makũũh dajëp pooj jé, hahỹỹ d’ ta kyyh a hã: “ỹ karẽn mahyb n'aa eréd hõm õm a wakããn tak'ëp rarejãã do paah’’, näng ta kyyh a hã. Ti hyb n'aa mahyb n'aa mabaan hõm ãã mooh. P'op Hagä Doo a yb h'yy kaha'eeh do karom ããh —näk mä ta wakããn sa kyyh panäk do hã, tabaher'oot hyb n'aa Juséh hã.
Ti m' Juséh ky n'aa napäh bä sa kyyh, aód wät mä tii bä.
18 Ti m' ta wakããn rabana kän ta wë. Tũũ rababë däk mä ta pooj jé. Ti m' raky hadoo:
—ãã bä ab'ëëh, a karom däk ããh —näk mä h.
19 Ti m' Juséh ky hadoo sa hã:
—Bë eỹỹm manäh. Ỹ né apäh P'op Hagä Do jawén buuj däk? 20 Bë h'yyb baad nadoo do paa hã ỹỹ, ti d’ né hẽ ti P'op Hagä Doo an'oo bä baad hadoo däk doo. Tii da tabad'oo tabed'ëëp hyb n'aa hajõõh sah mahä̃nh. 21 Bë eỹỹm manäh. Ỹ anoo né hẽ bë hã bë karẽn doo, bë taah na-ããj hẽ.
Ti m' Juséh her'oot sa hã baad up. Baad up ta kyyh sa hã raneỹỹm hyb n'aa. Ky enyym mä sa hã.
Hahỹỹh Juséh dajëp do panyyg n'aa
22 Ti m' Juséh bawäd wät ta wakããn sa sii Esito häj n'aa bä. Juséh bawäd wät mä 110 ãn. 23 Tahapëë wät mä Eparajĩm taah sa tataah. Tahapëë wät mä na-ããj hẽ Manaséh t'aah Makiir taah. Rahenäng noo gó m' Juséh kóm jó tadatooj bok mäh.
24 Tasee pé noo gó m' Juséh ky hadoo ta wakããn sa hã:
—Edah hỹỹ kä ỹ dajëp. P'op Hagä Doo né d’ ti masa bëëh. Ti né da mahũũm bë p'aa hẽnh hëëj baad taky n'aa edëng doo hã Abraãm, Isaki, Jakóh hã —näng mä Juséh kyyh.
25 Ti m' Juséh mejũũ ta wakããn raky däng P'op Hagä Do hã. Ti m' taky hadoo:
—Ta see pé noo gó P'op Hagä Doo bë mahũũm né hẽ babä naa. Bë mahũũm da k'yy ỹỹ paa t'ĩĩ hẽnh —näng mä Juséh kyyh ta wakããn sa hã.
26 Tii bä kä Juséh 110 ãn tabadoo bä kä m' tadajëb kän. Rebiin däk jawén paa bä m' ta hood gó rabenyyw däg kän mäh.