Hahỹỹh Jakóh ky n'aa edëng do ta taah panyyg n'aa
49
Ti m' ti noo gó m' Jakóh naëënh ta taah wób. Ti m' taky hadoo sa hã:—Bë kata däg pa ỹỹ, ỹ bë nu haw'õõd g'ëëd. Ỹ her'oot da bë hã bë pooj jé pan'aa —näng mäh.
2 Ti m' taky hadoo:
—Bë kata däg, bë maa newë bë yb Isaraéw kyyh —näng mäh.
Genesis 49:1-50:1
3 Ti m' pooj jé Rubẽnh tamaher'oot:
—Rubẽnh, õm pooj jé henäng do tah ỹỹ. Õm henäng noo gó ỹ hejoonh. Õm tak'ëp ky n'aa etsëëh. Õm tak'ëp haj'aa ta wób sa mahä̃nh.
4 Gawakaa hadoo õm. Dooh wäd da õm ta wób sa mahä̃nh jag ỹỹ gó mabas'ëëk gä do hyb n'aa. ‰m ỹỹ seeh sii mabaỹỹh. Ỹ mah'yyb rejãã —näng mä Rubẽnh hã.
5 Simijãw Lewi daheeh ta hỹỹj heh'äät up. Sa kumããn me raneboh jëng ta wób rah'yy kejäk doo da.
6 Raneboh jëg doo ajyy rakawajããn noo gó. Rakarẽn doo da rabad'oo. Rarejãã bong masããh booj yb ajyy. Ti hyb n'aa dooh ỹ karẽn bä ỹ maa newëë rametëëk doo. Dooh ỹ ajëë suun bä rakahetaa doo bä rabaherot doo bä.
7 Rah'yy kawajããn doo ỹ ky n'aa wasee da. Tak'ëp rah'yy kawajããn paah. Sa h'yy góẽẽj ỹ ky n'aa wasee da. Tak'ëp paa sa h'yy góẽẽj. Ỹ etyn bong, ỹ mekuuj bong panaa ỹỹ sa mahang.
8 Judah, a wakããn baad up da a ky n'aa ran'oo bä. A majĩĩ da manes'ëëm. Tũũ da a wakããn ranu ehyy b'ëëh a wë.
9 Judah, õm da awad t'aah har'ëëng hawëë wät do hadoo p'aa hẽnh tabajëng ta tób hẽnh. Õm awad jad doo da õm. Awad ỹỹn hadoo da õm. Dooh d’ hajaa péh tamebëë bä.
10 Tanyyh had'yyt da Judah panaa mahang Isaraéw buuj sa wahëh pan'aa. Tanyyh had'yyt hẽ sa wahëh. Ti awät da sa wahëh pan'aa heh'äät up. Sahõnh badäk hahỹỹ hã habong doo raky daheeh da ta tii.
11 Judah maw'yyd däk da ta mas'ããh jumeto uwa tyd hã. Tamaw'yyt da ta mas'ããh t'aah uwa tyd tak'ëp heaak up doo hã. Ta saroor tahetsyyt da uwa bëëh matsii däk doo me. Ta saroor jooj hadäk doo tahetsyyt da uwa bëëh me.
12 A matym da uwa bëëh tyk adoo da, tak'ëp da ty ketsëëh, uwa bëëh mahä̃nh. A tëg tak'ëp da tabesẽnh bii gamỹỹj mahä̃nh.
13 Ti m' Seburũn ky n'aa taher'oot:
Seburũn akajaar nabyy me da ta panang. Ti anang da t'ĩĩ hẽnh detyyw wapoor kehej'ëëk do pan'aa. Ta häj n'aa kajaa da Sidõn hëj n'aa hẽnh.
14 Ti m' Isakah ky n'aa taher'oot:
Isakah mas'ããh jumeto karejaan do hadoo, tabajat tasëët doo kanahang gó.
15 Tabahapäh bä takameh'aak do pan'aa baad tabadoo bä ta hã, tabahapäh bä na-ããj hẽ banäm doo ta häj n'aa pan'aa, tii bä da tak'ëp tamoo wät ta hyb n'aa. Tii b’ na-ããj hẽ ta hyb n'aa gadoo takëp tamoo wät doo.
16 Ti m' Dãn ky n'aa taher'oot:
Dãn ta wakããn wahë n'aa da. Ta wakããn hadoo d’ né hẽ tii.
17 Dãn aw'yy hadoo tatyw n'aa hahããd hã, hegës doo cavalo tsyym sug hã. Cavalo jó hasooh doo aw'yy egëëj bä tasagããd hyng da —näng mä Jakóh kyyh ta t'aah ky n'aa.
18 Ti m' Jakóh ky hadoo Tak'ëp Hyb N'aa Jawyk Do hã:
—A hã naa né hẽ ỹ gada ỹ mabed'ëëp doo —näng mä ta kyyh.
19 Ti m' Gad ky n'aa taher'oot:
Gad da hets'ëëk doo rarejãã. Gad abaaj näh ta säm.
20 Ti m' Aser ky n'aa taher'oot:
Aser häj n'aa bä hajõng da awäng joom. Tak'ëp han'aak doo ti anäng da sa wahëh wë hanäng do hadoo ta wë.
21 Ti m' Napatawi ky n'aa taher'oot:
Napatawi kawajaad wäd doo. Ta taah enyyw is da.
22 Ti m' Juséh ky n'aa taher'oot:
Juséh uwa tyd tamiih takëën hasooh do hadoo da. Baad tabeaak. P'op da ta tyd sëëk wajatu nuu hã, pä s'ëëb jó.
23 Ta majĩĩ da ta noo n'aa masooh paawä kumãn, katoj me.
24 Hejoonh da Juséh karaba P'op Hagä Doo an'oo bä. Hejoonh da ta mooh, dooh d’ teréd ta kumãn. Sahõnh Hajaa Doo, Jakóh h'yy ka'eeh doo, Isaraéw Hagã, Isaraéw mejoj n'aa kyy gó né tii.
25 Ti m' Jakóh ky hadoo Juséh hã:
—P'op Hagä Doo a yb h'yy kaha'eeh doo õm tamasa. Sahõnh hẽ Hajaa Doo, baad õm taky n'aa edëng. Õm da taky n'aa edëng wë hã hanäng doo me. Õm da taky n'aa edëng tũũ hanäng doo me. Õm taky n'aa edëng hajõng da a panaa, hajõng da a masããh.
26 —Ỹ P'op Hagä Doo ky n'aa edëng wahëh ỹỹ makũũh sa bahä̃nh. Baad ỹ P'op Hagä Doo ky n'aa edëë wät. Waëë pooj jé nä doo dooh tahëëj bä. Ti hadoo tamo haj'aa, tanoo doo, dooh tahëëj bä na-ããj hẽ. Ỹ gadoo doo ỹ karẽn da a wë tabaym. Õm da ky n'aa etsëëh a wakããn mahang —näng mä Jakóh kyyh Juséh hã.
27 Ti m' Bejamih ky n'aa taher'oot:
Tabanas'aa Lobo häd näng do hadoo Bejamih. Bäp paa da ta tä tabawëë wät tamo haj'aa. Tug bä da tabetyn hõm ta tä tamo haj'aa —näng mä taky n'aa her'oot bä.
28 Tii d’ paa m' tii 12 Isaraéw taah sa panaa sii. Tii d’ paa m' sa yb kyyh taky n'aa edëë bong bä ta taah.
Hahỹỹh Jakóh maa badoo wät do panyyg n'aa hahỹỹh
29-30 Tii kä m' Jakóh ky hadoo ta taah sa hã:
—Edah da ỹ dajëp. Ỹ karẽn ỹ bë dakëë ee makũũh pa, pä gó Mak-Pewa häd näng doo gó, Eperõn, Hit buuj gëëw paa bä. Mak-Pewa häd näng doo, Mameré pa tii, Kanaãh häj n'aa bä. P'ooj ub Abraãm ets'ẽẽ hõm paa m' tii Eperõn, Hit buuj hã, tadabong hyb n'aa dejëp doo. 31 Ti b’ né paa radabong Abraãm makũũh, ta ỹỹm Sarah makũũh, yp ỹỹ makũũh Isaki, ta ỹỹm Rebéka daheeh. Tii b’ né ỹ dakëë Leja makũũh. 32 Ta tii kamag babong do panang, gëëw sii hẽ ti kesëëm hõm doo Hit buuj sa hã —näng mä Jakóh kyyh ta taah sa hã.
33 Jakóh her'oot paa m' ta taah sii, tii bä takadasõ sooh. Tii bä m' h'yy kakog hõm kän mäh.