Manaséh Eparajĩm panyyg n'aa hahỹỹh
48
Ta see pé noo gó kä m' Juséh rapanäk:—A yb nahëë näng —näk mä h.
Ti m' tamahũũm ta taah Manaséh, Eparajĩm daheeh ta yb wë. 2 Rakajaa bä m' Juséh hã, harë tanyy panäk Jakóh hã ti Juséh kaja nä. Ti m' Isaraéw kahejoj wät tanu gasëëg gahäng tajasooh do jó naa.
3 Ti m' Jakóh ky hadoo ta t'aah Juséh hã:
—P'op Hagä Doo kasee hã ỹỹ Rus panang bä Kanaãh häj n'aa bä. T'ĩĩ hẽnh baad up ta ky n'aa edëng hã ỹỹh. 4 Hahỹỹ d’ paa ta kyyh hã ỹỹ: “ỹ anoo da a hã hajõõ a panaa. Ka'oot da ỹ an'oo bä a panaa. Hajõk da a hã hanaa doo. Ỹ an'oo a hã, a panaa hã na-ããj hẽ hahỹỹh hëëj. Bë né da ta danäh had'yyt hẽ’’, näng P'op Hagä Do kyyh hã ỹỹ —näng mä Jakóh Juséh hã.
5 Ti m' taky hadoo ẽnh Juséh hã:
—Hỹỹ kä a taah Esito bä henäng doo, ỹ ana pooj jé wawẽẽ hẽ, tah haa hadoo padëëk hỹỹ kä. Manaséh, Eparajĩm daheeh tah haa däk Rubẽnh, Simijãw hadoo. 6 A taah wób, sa jawén henäng doo, ti da tii a taah pan'aa. Tah haa sa matym n'aa ỹ an'oo bä, Manaséh, Eparajĩm daheeh ragadoo sa sii. A taah wób ragadoo Manaséh Eparajĩm sa matym n'aa uuh wób. 7 ỹ babaaj nä bä Padãm hẽnh naa, ta tyw n'aa me ỹ mawät me, Eparat nedaa bä, Rakéw dajëp mahä̃nh ỹỹh. Tak'ëp ỹ h'yy katón wät ta hyb n'aa. Tii bä ỹ dakä jëng ta tyw n'aa hahããd hã Eparat hẽnh hahõm doo. (Eparat häd näng doo ta häd seeh Belẽnh).
8 Ti m' Juséh taah Isaraéw bahapäh bä, teaanh:
—Ny hadoo do ta tii? —näng mäh.
9 Ti m' Juséh ky hadoo ta yb hã:
—Hahỹỹh tah haah P'op Hagä Doo anoo do hã ỹỹ babä —näng mä Juséh kyyh.
Ti m' Isaraéw ky hadoo:
—Mamana p'eets hẽ wë ỹỹ, ỹ ky n'aa edëng hyb n'aa —näng mäh.
10 Isaraéw ty tamaa wät mäh, dooh tabahapëë wäd bä baad up tawah'ëë däk do hyb n'aa paah. Ti m' Juséh manaa p'eets hẽ ta yb wë ta taah. Ti m' ta yb wakẽ bong, tatsanetsup bong tii bä Juséh taah.
11 Ti m' Isaraéw ky hadoo Juséh hã:
—Dooh ỹ h'yy ganyy bä ỹ hapëë nä bä õm. P'op Hagä Doo an'oo bä ỹ hapäh nä a taah na-ããj hẽ —näng mä Isaraéw kyyh Juséh hã.
12 Ti m' Juséh moo kadoo ta taah ta yb kóm hã kasadä doo. Ti m' tabahyy häng tũũ ta tarón nu paa me, ta yb taty gadäk hẽnh. 13 Ti m' ta t'aah Eparajĩm ta hub hẽnh tadagëët, Isaraéw s'yy hadäk hẽnh. Manaséh ta s'yy me tadagëët, Isaraéw hub hadäk hẽnh. Tii bä m' tamanaa p'eets hẽ ta yb pa. 14 Ti m' Isaraéw moo kajatsëg däk. Ta hub tagad'ooh hadoo do nuu hã, ta s'yy wah'ëëh hadoo do nuu hã tamoo sooh.
15 Ti m' taky n'aa edëng Juséh. Ti m' taky hadoo:
—P'op Hagä Do hã ow ỹỹ Abraãm, yp ỹỹ Isaki rah'yy ka'eeh rababok noo gó. P'op Hagä Doo ti d’ né paa hagã ỹỹ ỹ bawät bä babä, da hẽ na-ããj hẽ. 16 Ti d’ né hẽ ti ỹ hed'ëëp baad tanadoo noo gó hã ỹỹh. Ti d’ né hẽ da P'op Hagä Doo baad hahỹỹh karapé ky n'aa edëng. Ỹ karẽn sahõnh hẽ rahyb n'aa esee ỹỹh, Abraãm, Isaki daheeh sa panaa hyb n'aa. Ỹ karẽn na-ããj hẽ da raka'oot badäk hahỹỹh hëëj hã —näng mä Isaraéw kyyh.
17 Ti m' taky n'aa edëng do pooj jé Juséh bahapäh bä ta yb moo ta hub tagad'oo hadoo do nuu hã, dooh takarẽn bä. Ti hyb n'aa m' ta yb tamoo hỹỹd paawä ta hub Eparajĩm nuu gó moo däk do paah. Manaséh nuu gó takarẽn paawä. 18 Ti m' Juséh ky hadoo:
—Dooh ee. Ti nado. Hahỹỹh wah'ëëh hadoo doo. Ỹ karẽn hub me mamoo sooh wah'ëëh hadoo do nuu hã —näng mäh.
19 Ta yb Isaraéw dooh takarẽn tii da.
—Ỹ hapäh né hẽ tah ỹỹ. Ỹ hapäh né hẽ. Wah'ëëh hadoo doo ti na-ããj hẽ da panaa näng, ky n'aa etsëëh na-ããj hẽ. Ta jawén wäd né paawä Eparajĩm ti d’ né hẽ tabahä̃nh hadoo tamahä̃nh. Eparajĩm panaa tak'ëp hajõng doo da —näng mä Jakóh kyyh Juséh hã.
20 Ti m' ti noo gó Isaraéw baad ky n'aa edëng Juséh taah. Taky n'aa edëng bä taky hadoo:
—Isaraéw buuj sa taah raky n'aa edëë bä, bë häd gó da raky däng. Hahỹỹ da d’ sa kyyh raky n'aa edëng bä: “P'op Hagä Doo an'oo bä da bëëh Eparajĩm Manaséh hadoo’’ —näng mä Isaraéw kyyh.
Ti d’ né m' tabadoo kän Eparajĩm wén ky n'aa etsëëh Manaséh bahä̃nh.
21 Ti m' Isaraéw ky hadoo Juséh hã: