47
Ti m' Juséh ahõm kän Paraó wë. Ti m' taky hadoo ta hã:—Ee, wakããn ỹỹ, sa masããh, sahõnh hẽ sa ma ramanaa sa sii Kanaãh häj n'aa hẽnh naa, kaja nä wë ỹỹh. Ragada Gosẽnh bä— näng mä Juséh kyyh Paraó hã.
2 Ti m' tasëëw hõm ta wakããn wób 5, tametëëh Paraó hã.
3 Ti m' Paraó eaanh sa hã:
—H'ëëd bë moo heb'ooh? —näng mäh.
Ti m' raky hadoo:
—ãã masããh hagã, p'ooj up ãã hana do makũũh rabad'oo doo da —näk mä sa kyyh. 4 —ãã baa bok dó wawẽẽ hẽ sah hyb n'aa. Tak'ëp sah Kanaãh häj n'aa bä. Dooh ãã masããh waa péh. Ãã karẽn paawä ãã babok Gosẽnh bä —näk mä sa kyyh Paraó hã.
5 Ti m' Paraó ky hadoo kän Juséh hã:
—Baad tanyy ti a wakããn, a yb rakaja nä a wë. 6 Mabasëëw Esito häj n'aa makarẽn doo rababok do pan'aa. Man'oo bä a yb, a wakããn rababok tak'ëp baad tabadoo bä Esito hëj n'aa. Mamejõ rababok Gosẽnh bä. Sa mahang tanyy bä tak'ëp h'yy ganäng doo, ti man'oo bä masãh ỹỹ hagã —näng mä Paraó kyyh Juséh hã.
7 Ti m' Juséh manaa ta yb, tametëëh Paraó hã. Ti m' Jakóh ky n'aa edëng Paraó. 8 Taky n'aa edëng do jawén paa bä, Paraó eaanh Jakóh hã:
—Nyy hẽ ta baab a heen n'aa?
9 Ti m' Jakóh ky hadoo:
—Ỹ bawät do heen n'aa 130 ãn. Dooh denaa hẽ ãn ỹỹ n'aa. H'yy katón n'aa näng. Ãn ỹỹ n'aa dooh takajaa bä ỹ hana do makũũ sa heen n'aa hã —näng mä Jakóh Paraó hã.
10 Ti m' Jakóh baad taky n'aa edëng Paraó hã. Anyyh mä tii bä kä Paraó tób bä naa.
11 Ti m' Juséh an'oo bä ta yb, ta wakããn rababoo däg kän Esito häj n'aa bä. Tan'oo däk mä sa häj n'aa tak'ëp baad up tabadoo bä, Rameses häj n'aa uuh. Tii d’ né hẽ m' tabad'oo Paraó mejũũ doo da. 12 Ti m' Juséh anoo ta yb, ta wakããn sa hã, ta yb sii habok doo sa waa. Taah kanekan doo tahaad hajõng sa waa, taah pawóp its hadoo doo dooh denaa hẽ sa waa Juséh an'oo bä.
Hahỹỹh Esito buuj resëëm hõm do sahõnh hẽ sa ma rabets'ẽẽ hyb n'aa sa waa panyyg n'aa hahỹỹh
13 Ti m' badäk hahỹỹh haw'ããts hẽ dooh ji awaa pé tak'ëp hadoo do sah hyb n'aa. Esito babuj n'aa, Kanaãh babuj n'aa rah'yyb nehejooj pad'ëëk mä sah haj'aa.
Genesis 47:13-26
14 Ti m' Juséh ataa däk mä sahõnh hẽ hanäng do paa Esito bä, Kanaãh bä na-ããj hẽ, sa ma säm sa waa säm hadoo däk. Ti m' Juséh mahũũm kän mä Paraó wë. 15 Ti m' Esito buuj, Kanaãh buuj na-ããj hẽ, sa ma säm bahëëj jëng bä, Esito buuj rabah'ũũm mä Juséh wë. Ti m' raky hadoo ta hã:
—ãã ma säm ahëëj jëng. Ãã waa man'oo hỹỹ kä. Hëd n'aa ti ãã dejëp a matym gó man'oo bä? —näk mä sa kyyh.
16 Ti m' Juséh ky hadoo sa hã:
—Bë ma säm ahëëj jëng. Hỹỹ kä bë mana bë masããh. Ỹ an'oo tii bä bë waa bë masããh säm —näng mä Juséh kyyh sa hã.
17 Ti m' ramana kän sa masããh cavalo, b'éé, kabara, booj yb, jumeto sa waa säm. Juséh an'oo kän mä sa waa ta säm. Ti hyb n'aa ti noo gó sét ta baab, rabedëp Juséh an'oo bä, sahõnh hẽ sa masããh säm hyb n'aa.
18 Tii bä kä sét ta baab tabëëj hõm bä, rabana ẽnh p'aa hẽnh mä Juséh wë. Ti m' raky hadoo ta hã:
—ãã kariw n'aa, dooh ãã jejëën bä a mahä̃nh ãã ma säm ahëëj jëng. Ãã masããh paah, a masããh däk. Hỹỹ kä haym jããm up né ãã hedëp doo, ãã gëëw. 19 Hëd n'aa ti ãã dejëp a matym gó? Hëd n'aa na-ããj hẽ ãã gëëw bahëëj jëng a matym gó? Mets'ẽẽ ãã gëëw ãã waa säm. Tii bä kä ãã gëëw Paraó gëëw pan'aa. Mets'ẽẽ na-ããj hẽ ããh. Tii bä ãã moo bok ta sii —näk mä sa kyyh.
Ti m' raky hadoo ẽnh:
—Jããm up né ãã karẽn man'oo ãã hã joom tym ãã bejoom hyb n'aa, ãã bedëp hyb n'aa, ãã gëëw enäh hyb n'aa. Ãã nejoom bä nawëë wät tii bä joom —näk mä sa kyyh Juséh hã.
20 Ti hyb n'aa né kä m' sahõnh hẽ Esito buuj sa gëëw Juséh bets'ẽẽ hõm, Paraó ma däg kä. Sahõnh hẽ Esito buuj rabesëëm hõm sa gëëw has'aah do hyb n'aa tak'ëp. Sa gëëw paah, Paraó gëëw däk. 21 Sahõnh hẽ Esito buuj tii bä ramoo bok mä Paraó sii Juséh an'oo bä. 22 Jããm ub né tanetsẽẽ mä Esito sa kabariih moo heb'ooh doo sa gëëw. Paraó an'oo had'yyt hẽ m' sa waa bag hẽnh. Tanoo do sa waa anyy had'yyt hẽ, ti hyb n'aa m' dooh resëëm bä sa gëëw.
23 Ti m' Juséh ky hadoo Esito buuj sã hã:
—Ỹ ets'ẽẽ hõm bë gëëw, bëëh, Paraó ma pan'aa. Hỹỹ kä ỹ an'oo kän bë hã joom tym bë bejoom hyb n'aa bë gëëw. 24 Tabanang bä bë ejoom do ag, 5 hadoo do ta hood, sét hẽ da Paraó h'ëëd. Ta uuh mad'aak doo, bë ejoom do pan'aa, bë waa pan'aa na-ããj hẽ, bë taah sa waa pan'aa na-ããj hẽ. Ti hadoo hed'yyt hẽ bë bad'oo bë joom ag hã —näng mä Juséh kyyh sahõnh hẽ Esito buuj sa hã.
25 Ti m' raky hadoo:
—Õm né hẽ ti ãã hed'ëëp —näk mä h. —Taw'ããts hẽ baad õm ãã wë. Hỹỹ kä ãã moo boo kän Paraó sii —näk mä Esito buuj sa kyyh Juséh hã.
26 Tii bä kä ti noo gó kä m' Juséh moo wät sa gëëw ky n'aa jawyk Esito häj n'aa bä. Da hẽ na-ããj hẽ ti anäng nä sa häj n'aa bä. Hahỹỹ m' gëëw ky n'aa jawyk: 5 hood tadoo bä joom s'ëëb, sét hẽ Paraó h'ëëd. Jããm up né hẽ Esito sa kabariih moo heb'ooh do sa gëëw ti dooh Paraó gëëw tahadoo däk bä m'.
27 Ti m' Isaraéw rabayyw kän rababoo däk do pan'aa Esito hëj n'aa bä, Gosẽnh häd näng doo bä. Gëëw enää däg kän mäh, ka'oot mä sa ma, kanekan bong mä na-ããj hẽ Isaraéw taah paah.
Genesis 47:27-48:21
28 Ti m' Jakóh bawäd wät Esito häj n'aa bä 17 ta baab. 17 an'oo bä ta ãn n'aa 147. 29 Ti m' Jakóh tabedaa däk bä dajëp do pan'aa, tanaëënh ta t'aah Juséh. Ti m' taky hadoo ta hã:
—Õm baad up tadoo bä a h'yyb hã ỹỹh, moo dëë góm ỹỹ yt hã. Ti nuujé maky dëë ti dooh ỹ madakä jëë bä Esito häj n'aa bä. Dooh ỹ mahyb n'aa ehỹỹd bä. 30 ỹ dajëb bä, ỹ basëëk bä ỹ hana do makũũh sa wë, ỹ da mamahũũm, madakä jëëh sa kamag babong bä —näng mä Jakóh kyyh ta t'aah Juséh hã.
—Tii d’ né da ỹ bad'oo maher'ood doo da hã ỹỹ —näng mä Juséh kyyh ta yb hã.
31 —Maky dëë P'op Hagä Do hã! —näng mä Jakóh ta t'aah hã.
Tii bä kä m' Juséh ky däng P'op Hagä Do hã ta yb maa napäh bä. Ti m' Isaraéw nu hyy häng ta tatu hã. Ti m' taj'aa etsë kän P'op Hagä Doo.