Hahỹỹh Esito hẽnh Jakóh bahõm do panyyg n'aa
46
Ti m' Isaraéw bahõm kän Esito hẽnh. Sahõnh mä ta ma tamahũũm kän. Takajaa bä Beseeba bä, tajuu mä b'éé P'op Hagä Doo, ta yb h'yy kaha'eeh doo paah, h'yy gadajang hyb n'aa. 2 Ti m' atsëm P'op Hagä Doo ber'oot ta sii ta s'ëëh hadoo doo gó.—Jakóh! Jakóh!— tanaëënh.
—Bä agëët ỹỹh —näng mä Jakóh kyyh.
Genesis 46:1-47:12
3 Ti m' P'op Hagä Do ky hadoo ta hã:
—Ỹ né hẽ P'op Hagä Doo a yb h'yy kaha'eeh doo —näng mäh. —Eỹỹm manäh Esito hẽnh hahõm doo õm. T'ĩĩh hẽnh da ỹ an'oo bä hajõng da a panaa. 4 A sii da ỹ bahõm Esito hẽnh. Tii b’ naa p'aa hẽnh da ỹ manaa né hẽ a panaa mahana paa bä. Juséh né da õm heg'ããs madajëp bä— näng mä P'op Hagä Do kyyh Jakóh hã.
5 Ti m' Jakóh ahõm kän Beseeba bä naa. Ta taah ramahũũm mä sa yb, sa taah ned'ëëd is doo, sa ä̃j na-ããj hẽ Paraó mejõ hõm doo gó, sa yb ramanaa hyb n'aa. 6 Ramahũũm mä na-ããj hẽ sa masããh, sa ma Kanaãh häj n'aa bä naa. Ti hadoo né kä m' Jakóh, ta panaa, sahõnh hẽ rabahõm kän Esito hẽnh. 7 Jakóh mahũm mä ta sii ta taah, ta tataah, ta toog, ta tatoog; sahõnh hẽ ta panaa.
8 Hahỹỹh Isaraéw buuj sa häd Esito hẽnh hah'ũũm doo. Jakóh ta panaa sii hẽ né tii:
Rubẽnh pooj jé henäng doo Jakóh t'aah.
9 Rubẽnh taah: Hanok, Paru, Eserõn, Karami.
10 Simijãw taah: Jamuéw, Jamin, Ohad, Jakĩn, Sohah, Sauur. Kanaãh buuj mä Sauur ỹỹn.
11 Lewi taah: Geresõn, Kohat, Merarih.
12 Judah taah: Perés, Serah, Seer. Judah taah wób Eer, Onan häd näng doo Kanaãh häj n'aa bä m' radejëp.
Perés taah: Haserõn, Hamuur.
13 Isakah taah: Towa, Puah, Jasub, Simerõn.
14 Seburũn taah: Sered, Erõn, Jareew.
15 Hahỹỹh Jakóh taah, ta tataah Leja sii Padãn Arãm henäng do paah. Ta toog Leja sii Dina häd näng doo. T'ĩĩ hẽnh mä na-ããj hẽ tabenäng. Sahõnh hẽ hahỹỹh ta taah, ta toog, Leja sii 33 däg.
16 Hỹỹ kä hahỹỹh Jakóh taah wób:
Gad taah: Sepõn, Hagi, Suni, Esebõn, Erih, Arodi, Arewi.
17 Aser taah: Imanah, Isawah, Isawi, Berijah. Sa ä̃nh Sewa.
Berijah taah: Heber, Mawakiéw daheeh.
18 Hahỹỹh Jakóh taah, ta tataah Siw-pah sii. Siw-pah häd näng doo Labãn an'oo däk do paa ta toog Leja sii moo wät doo. Hahỹỹh Jakóh taah Siw-pah sii 16.
19 Hỹỹ kä hahỹỹh Jakóh taah wób:
Jakóh taah Rakéw, ta ỹỹm sii: Juséh, Bejamih daheeh.
20 Juséh taah Asenat sii: Manaséh, Eparajĩm daheeh. Esito hëj n'aa bä rabenäng. Asenat, Juséh ỹỹm, Potipeer toog. Potipeer, õn panang häd näng doo bä tamoo wät.
21 Bejamih taah: Bera, Bekeer, Asabéw, Kera, Naaman, Ehi, Ros, Mupĩm, Hupĩm, Arad.
22 Sahõnh hẽ m' hahỹỹh Jakóh taah, ta tataah Rakéw sii 14.
23 Hỹỹ kä hahỹỹh Jakóh taah wób:
Dãn t'aah: Husĩm.
24 Napatawi taah: Jasiéw, Kuni, Jeseer, Silẽm.
25 Hahỹỹh Jakóh taah, ta tataah Biwa sii. Biwa häd näng doo Labãn an'oo däk do paa ta toog Rakéw sii moo wät doo. Hahỹỹh Jakóh taah Biwa sii 7.
26 Sahõnh hẽ Esito hẽnh hah'ũũm doo Jakóh sii ta panaa heh'äät up getsén doo 66. Dooh tagetsén bä Jakóh taah sa ä̃j. 27 Juséh taah Esito bä henäng doo, pawóp hẽ. Tii bä kä sahõnh hẽ kä Jakóh panaa Esito hẽnh raka'ỹỹt hẽnh 70.
28 Ti m' Jakóh mejũũ ta pooj jé ta t'aah Judah bahõm Juséh wë, tabaher'oot hyb n'aa sa tyw n'aa Gosẽnh rabahõm hyb n'aa. Ti m' rakaja hõm bä Gosẽnh bä, 29 Juséh mejũũ ramanaa ta hood cavalo takyyk doo tabahõm hyb n'aa, takataa hyb n'aa ta yb Isaraéw hã. Tabahapäh bä ta yb, nayyw hẽ m' tanu waké däk. Tabahapäh bä kä m' ta yb, aód wät mäh. Hajõõ nuu me m' tabaoot.
30 Tii bä kä m' Isaraéw ky hadoo ta t'aah Juséh ha:
—Hỹỹ kä ỹ h'yy gadajang ỹ dajëb bä, õm ỹ hapëë wät do hyb n'aa matym ỹỹ me —näng mä ta kyyh.
31 Ti m' Juséh ky hadoo ta wakããn sa hã, ta yb sii hana do sa hã:
—Ỹ ahõm Paraó wë, ỹ ber'oot hyb n'aa ta sii. Hahỹỹ da d’ ỹ ber'oot ta hã: “Wakããn haa, ee sii habok do na-ããj hẽ kaja nä ỹ hagä hẽnh Kanaãh häj n'aa hẽnh naa. 32 Sahõnh hẽ ajyy b'éé hagã. Ramanaa sa masããh, sa ma had'yyt hẽ.’’ 33 Bë tanaëëj bä, teaaj bä bë hã h'ëëd bë moo bok, 34 baad bë taweh'ëëh ta hã. Hahỹỹ da d’ bë kyyh ta hã: “ãã sa masããh hagã ãã ned'ëëd is noo gó ãã du doo, ãã hana do makũũh rabadoo doo da.’’ Tii d’ bë her'ood bä ta hã, tii bä da tan'oo bä bë babong Gosẽnh häj n'aa bä. Esito buuj sa hã b'éé, booj yb hag'ããs doo nasaa, ti hyb n'aa da bë tamejũũ Gosẽnh hẽnh —näng mä Juséh kyyh ta wakããn sa hã.