Hahỹỹh Juséh takeher'ood däk do panyyg n'aa hahỹỹh
45
Ti m' Juséh dooh m' ta h'yyb ebaa wäd bä ta sii moo bok do sa matym gó. Ti hyb n'aa m' tamejũũ raban'yyh ta tób bä naa. Ti m' sahõnh hẽ raban'yyh Esito buuj Juséh mahä̃nh. Dooh Esito buuj ta pa habëëh takeher'ood däk bä sa hã, ta wakããn sa hã. 2 Ti m' tak'ëp Juséh baód wät kän. Esito buuj ramaa napäh ta kyyh tabaoot doo. Paraó na-ããj ky n'aa napäh ta ky n'aa haód wät doo.
Genesis 45:1-28
3 Ti m' Juséh ber'ood däg kän ta wakããn sa sii sa kyy me:
—Ỹ né hẽ Juséh! —näng mäh. —Ee ti awäd nä? —näng ta kyyh ta wakããn sa hã.
Dooh ta wakããn sa kyy péh. H'yyb panadoo booh tii bä, h'yyb eỹỹm bong do hyb n'aa ta hã.
4 Ti m' Juséh ky hadoo ta wakããn sa hã:
—B'ëëp bë ana! P'eets hẽ bë abë däk! —näng mä ta kyyh.
Ah'ũũm kän mä ta pa. Ti m' tabaher'oot sa hã:
—Ỹ né hẽ bë hỹỹj Juséh bë esëëm hõm do paa Esito hẽnh hah'ũũm do sa hã.
5 Ti m' taky hadoo ẽnh:
—Bë hyb n'aa tón manäh! Bë kawajããn manäh bë daaj hẽ bë wë, ỹ bë es'ëëm hõm do hyb n'aa. P'op Hagä Doo ti né hẽ ti mejũũ wawẽẽ hẽ ỹ bë pooj jé, ỹ anoo hyb n'aa sa waa, bë waa, sahõnh hẽ ranadejëp hyb n'aa sah mahỹỹj. 6 Hahỹỹh ji hasaah doo pawóp däk ta baab. Ji moo sét me nä ti hawät nä ta baab ji basaah nä. 7 P'op Hagä Do mejũũ ỹ bë pooj jé bë nadejëp hyb n'aa, tabanäng hyb n'aa bë panaa pan'aa badäk hahỹỹh häj n'aa bä. P'op Hagä Doo ti baad bë hed'ëëp. 8 P'op Hagä Doo ti ỹ tamanaa wawẽẽ hẽ. Dooh bë mo haj'aa tadoo bä. P'op Hagä Doo an'oo bä né ti ỹ Paraó yb hadoo. Ti né hanoo Paraó tób bä wahë n'aa ỹ bahadoo hyb n'aa, sahõnh hẽ hagã n'aa Esito bä hanäng doo ỹ bahadoo hyb n'aa —näng mä Juséh kyyh ta wakããn sa hã.
9 Ti m' taky hadoo ẽnh:
—Bë abaaj hõm nayyw hẽ ee hawät hẽnh ta tób hẽnh. Bë her'ood ta hã: “Hahỹỹ d’ a t'aah Juséh kyyh: ‘P'op Hagä Doo ti hanoo sahõnh hẽ hagã n'aa Esito bä ỹ bahadoo hyb n'aa. Nayyw hẽ da ỹ karẽn mabana. Matyw n'aa badoo manä da! 10 Gosẽnh panang bä awad däk da pa ỹỹ, õm, a taah, a tataah, a masããh, sahõnh hẽ a ma. 11 Tii bä ỹ anoo bë waa. Ti awäd nä ta baab ji moo sét me nä ji hasaah do pan'aa. Ỹ anoo bë hã bë waa, bë nasaah hyb n'aa, bë nahänh hyb n'aa sahõnh hẽ bë ma.’’’ Hahỹỹ da ỹ her'oot doo da, tii da da bë kyyh ee hã —näng mä Juséh kyyh ta wakããn sa hã.
12 Ti m' p'aa hẽnh taky hadoo ta wakããn sa hã:
—Bë hapäh ỹ hỹỹh. Bejamih, hä̃j ỹỹ, na-ããj hapäh ỹ né hỹỹh bë sii her'oot doo. 13 Bë her'ood da ee hã baad up ỹ raweh'ëëh Esito häj n'aa bä. Baad up sahõnh hẽ sa mo haj'aa hã ỹỹh. Bë her'ood na-ããj hẽ sahõnh hẽ bë hapäh doo ta hã. Tii bä nayyw hẽ da bë mana ee wawẽẽ hẽ wë ỹỹ —näng mä Juséh kyyh ta wakããn sa hã.
14 Ti m' tawaké däk ta hỹỹj Bejamih, aód wät mä tii bä Juséh. Bejamih na-ããj hẽ tawaké däk mä tii bä Juséh, aód wät na-ããj hẽ ta hỹỹj hyb n'aa. 15 Tii bä kä m' tatsanetsup bonga sahõnh hẽ ta wakããn, aód wät sa hyb n'aa. Ta jawén paa bä ta wakããn raber'ood kän ta sii.
16 Ti m' Paraó heen n'aa nyy däk bä tii Juséh wakããn kajaa nä, h'yy gadajang mä tii bä. Paraó karapee sa wahëh, ta sii moo bok doo na-ããj hẽ h'yy gadejah raky n'aa napäh bä. 17 Ti m' Paraó ky hadoo Juséh hã:
—Er'ood a wakããn sa sii. Hahỹỹ da d’ a kyyh sa hã: “Bë enyyw hõm bë masããh jó bë waa. Bë abaaj hõm tii bä Kanaãh hëj n'aa hẽnh. 18 Tii bä bë mana da bë yb, bë taah wë ỹỹh. Ỹ anoo da bë hã tak'ëp baad hadoo do Esito häj n'aa uuh, baad tabanäng hyb n'aa bë waa, bë awëh do pan'aa’’ —näng mä Paraó Juséh hã.
19 P'aa hẽnh Paraó ky hadoo Juséh hã:
—Mamaher'ood na-ããj hẽ sa hã babä naa ramahũũm hyb n'aa sa taah, sa ä̃j hood. Mamaher'ood ramanaa sa yb. 20 Mamaher'ood sa hã rahyb n'aa natón hyb n'aa sa ma tii b’ hanäng doo. Ti bahä̃nh ỹ anoo babä sa hã sa ma —näng mä Paraó kyyh Juséh hã.
21 Ti da né hẽ m' Isaraéw taah rabadoo kän. Ti m' Juséh an'oo däk sa taah, sa ỹỹm hood pan'aa Paraó mejũũ doo da. Tan'oo däk na-ããj hẽ sa waa ramahõm me rawa péh. 22 Tii bä kä m' sahõnh hẽ Juséh bets'ëëh hõm ta wakããn sa saroor, sa kawäj papuuj. Bejamih hã tanoo mä hajõng k'ããts tëg hewak doo. Tets'ëë däk na-ããj hẽ ta saroor, ta kawäj 5 nuu me tapadedëëk do pan'aa. 23 Tamejõ hõm ta yb matym n'aa pan'aa 10 jumeto ramahũũm sa jó tak'ëp henyym doo Esito bä naa. Tamejõ hõm na-ããj hẽ 10 jumeto ỹỹnh ramahũũm sa jó joom s'ëëb, pãw, ta waa wób tamanaa me ta yb awa do pan'aa. 24 Ti m' tamejõ kän ta wakããn rabahõm kän. Ti m' ratsyym kasok bä Juséh ky hadoo sa hã:
—Bë kahejẽẽw manä da bë mahõm me! —näng mä Juséh kyyh.
25 Ti m' ah'ũũm kän Esito bä naa Kanaãh hẽnh. Kaja hõm kän mä sa yb hagä hẽnh. 26 Rakaja hõm bä kä m' raky hadoo sa yb hã kä:
—Ti awät nä paa Juséh! Dooh daap tadoo bä, ti d’ né paa sahõnh hẽ hagã n'aa Esito bä —näk mä sa kyyh sa yb hã.
Jakóh mä h'yy gah'ood hyng tii bä ta t'aah ky n'aa hyb n'aa. Dooh m' taky dahé bä rabaher'oot bä ta hã. 27 Rabaher'oot bä sahõnh hẽ Juséh kyyh ta hã, tabahapäh bä kä Juséh mejõ hõm do ta hood pan'aa rehëën doo ta gó, tii bä kä tak'ëp tah'yy gadajäng, h'yyb kabawaad wät mä tii bä kä. 28 Ti m' Isaraéw ky hadoo:
—Hỹỹ kä ỹ ky daheeh bëëh! Tah ỹỹ Juséh ti awät né paah! Hỹỹ kä ỹ ahõm ta wë ỹ hegãã wät ỹ dajëp pooj jé —näng mä ta kyyh.