Juséh gaheëk doo rabawyyt suun bä Bejamih h'ëëd gó panyyg n'aa hahỹỹh
44
Ti m' Juséh ky hadoo ta tób yt hã moo wät do hã:—Meh'aa sa waa hood gó sa waa pan'aa tahajaa do ramahũũm doo. Ta säm p'aa hẽnh madapä jëëh sahõnh hẽ sa h'ëëd gó —näng mä ta kyyh.
2 Na-ããj hẽ tamejũũ tadasuun jëng ta waa hood tageheëk doo k'ããts tëg hawak do s'ëëb, tagad'ooh hadoo do h'ëëd gó, ta säm pa. Tii d’ né hẽ m' tabad'oo Juséh mejũũ doo.
Genesis 44:1-33
3 Ti m' jet'iip hadoo bäp paah, badajung nä, rabahõm kän sa tób hẽnh sa masããh sa sii. 4 Ti m' dooh dawyy raboo nä bä Juséh panang bä naa, Juséh ky hadoo ta tób bä moo wät do hã:
—Ỹ karẽn mabahõm nayyw hẽ sa jawén. Makataa bä sa hã, hahỹỹ da d’ a kyyh sa hã: “Baad up kariw ỹ n'aa bë tagadoo. Hëd n'aa tii da bë ad'oo ta hã baad nadoo doo? 5 Ti d’ né paa kariw ỹỹ n'aa waa hood tagaheëk doo. Ta tii hã né hẽ tahapäh ta jawén hawät doo. Ti da bë ad'oo doo, dooh baad tadoo bä’’ —näng mä Juséh kyyh ta tób bä moo wät do hã taher'ood do pan'aa.
6 Ahõm kän mä tii bä kä Juséh mejũũ doo sa jawén. Takataa bä m' sa hã taher'oot Juséh mejũũ doo. 7 Ti m' raky gado kän Juséh mejũũ doo:
—Hëd n'aa tii d’ a kyyh ãã hã? Baad up ãã ky däng. Dooh tii da ãã adoo bä nasaa doo. 8 Mahapäh né hẽ ti ãã manaa p'aa hẽnh ta säm ãã aw'yyt do paa ãã h'ëëd gó. Hëd n'aa ta tii da a kyyh ãã hã? Ti ãã ets'ëëk mahanäng ãã hã. H'ëëd hyb n'aa ãã bets'ëëk k'ããts tëg hawak doo gabarëëh doo a kariw n'aa tób bä hanäng doo?
9 Ti m' raky hadoo ẽnh:
—Mawyyd bä ta wë däk doo, dajëp da tii bä. Ãã tii bä ta wób sahõnh hẽ a kariw n'aa sii moo bok do pan'aa ta sii n'aa hẽ— näk mä sa kyyh Juséh mejũũ do hã.
10 Ti m' Juséh mejũũ doo ky hadoo:
—Taw'ããts hẽ —näng mäh. —Hỹỹ kä jé ta wë däk doo, ti né da ta sii n'aa hẽ tamoo wät si ỹỹh. Namahũũm tii bä ta wób— näng mä ta kyyh sa hã.
11 Ti m' sahõnh hẽ sa h'ëëd rehyy bëëh sa masããh mehũũm doo. Ragasëëts kän mä tii bä tabaheg'ããs hyb n'aa. 12 Ti m' Juséh mejũũ doo taheg'ããs pooj jé wah'ëëh hadoo do h'ëëd gó. Sét genyyh tabaheg'ããs. Tagad'ooh hadoo do h'ëëd tagadëëg up tabaheg'ããs mäh. Tii bä kä m' tabaw'yyt Juséh waa hood Bejamih h'ëëd gó kä. 13 Rabahapäh bä sahõnh hẽ Bejamih wakããn sa saroor raweh'oob bong mäh. Ti m' p'aa hẽnh rabat'ëëg toonh sa h'ëëd sa masããh jó. P'aa hẽnh rahahũũm Juséh panang hẽnh.
14 Ti m' Judah, ta wakããn rakaja hõm bä Juséh tób hẽnh, ta tób bä tabagä nä. Tũũ rabehyy bëëh Juséh pooj jé. 15 Ti m' Juséh ky hadoo sa hã:
—Hëd n'aa tii d’ bë wén d'oo? Aj'yy ỹ hadoo péh tahajaa tahapëë bä ji ejëën bä ranahapäh doo —näng mä Juséh kyyh sa hã.
16 Ti m' Judah ky hadoo ta hã:
—Dooh ãã her'oot pé a hã, kariw n'aa ỹỹ. Dooh ãã kyy péh. Nyy da ji baher'oot ji h'yyb haj'aa hẽ nado doo? P'op Hagä Doo metëëh ji bahapäh hyb n'aa nyy da ãã bad'oo, ãã moo bok do paa nasaa doo. Hỹỹ kä ãã na-ããj hẽ, a waa hood wë kaw'yyt do na-ããj, ta sii n'aa hẽ ãã moo bok hỹỹ kä a sii —näng mä Judah kyyh Juséh hã.
17 Ti m' Juséh ky hadoo:
—P'op Hagä Do hã ỹ ky däng. Dooh tii da ỹ adoo bä bë hã. Jããm up né hẽ wa ỹỹ hood wë däk doo ti d’ né ta sii n'aa hẽ moo wät do pan'aa si ỹỹh. Ta wakããn namahũũm tii bä bë yb tób hẽnh— näng mä Juséh kyyh sa hã.
18 Ti m' Judah ahõm ta wë p'eets hẽ taher'oot hyb n'aa ta sii.
—Ỹ karẽn paawä ỹ er'oot a sii, kariw ỹỹ n'aa. Kawajããn manäh wë ỹỹh. Paraó hadoo õm. 19 Pooj jé ãã hana noo gó meaanh ãã hã. Hahỹỹ d’ paa a kyyh: “Ti anyyh nä bë yb? Ti anyyh na-ããj hẽ bë hỹỹj seeh?’’ 20 Tii bä ãã her'oot a hã. Hahỹỹ d’ paa ãã kyyh: “Ti awät nä ãã yb säg. Wah'ëë däk. Ti anäng nä ãã yb t'aah tagad'ooh hadoo doo tawah'ëëh t'aah n'aa. Ta hỹỹj dajëp. Jããm up né tii ta ỹỹn t'aah mad'aag gëët doo. Tak'ëp ãã yb takamahä̃n.’’
21 —Tii d’ a kyyh ãã hã: “bë mana wawẽẽ hẽ ỹ bahapäh hyb n'aa’’ näng õm. 22 Tii ãã ky hadoo a hã: “Dooh ta yb karẽn bä dawyy tawäd bä tamahä̃nh. Dawyy tawäd bä, dajëp ãã yb tii bä.’’ 23 õm ti ky hadoo ãã hã, “Bë hỹỹj tagad'ooh hadoo do nanaa bä bë sii, dooh da ỹ bë ty gepëë wäd bä tii bä.’’ 24 ãã babaaj hõm bä ãã yb wë, ãã her'oot tii bä a kyyh ta hã —näng mä Judah kyyh.
25 Ti m' Judah ky hadoo ẽnh ta hã:
—Ti m' ta see pé noo gó ãã yb ky hadoo: “Bë ahõm nä bë betsẽẽ hyb n'aa ër waa p'aa hẽnh’’, näng ta kyyh ãã hã. 26 Ti ãã ky hadoo ta hã: “Dooh ãã hajaa bä ãã ahõm bä tagad'ooh hadoo do nahõm bä ãã sii. Dooh da ãã ty gepëë bä aj'yy hadoo doo ãã hỹỹj nahõm bä ãã sii’’, näk ãã kyyh ãã yb hã.
27 Ti m' Judah ky hadoo ẽnh Juséh hã ta yb kyyh:
—Ti ãã yb ky hadoo ãã hã: “Bë hapäh né hẽ ti ä̃m ỹỹ pawóp up tah ỹỹ ta sii. 28 Ta seeh badoo wät mahä̃nh ỹỹh. Ta hyb n'aa pé tabanas'aa ekog wät. Dooh ỹ ty gepëë wäd bä tii bä. 29 Hỹỹ kä bë ado hõm bä mahä̃nh ỹỹ hahỹỹh na-ããj hẽ, baad tanadoo bä ta hã, tii bä da bë an'oo bä ỹ h'yy kamatón me ỹ wah'ëëh hẽnh ỹ dajëp’’, näng mä ãã yb kyyh ãã hã —näng mä Judah kyyh Juséh hã.
30-31 Ti m' taky hadoo ẽnh:
—ãã hỹỹj tagad'ooh hadoo doo tabadoo bä si ỹỹ ãã babaaj hõm bä ãã yb wë, taty ganepëë wäd bä, dajëp da tii bä tak'ëp takamahä̃n do hyb n'aa. Tii bä da ãã an'oo bä ãã yb da dajëp tii bä ta h'yy kamatón me ta wah'ëëh hẽnh, hahỹỹh ta t'aah hyb n'aa. 32 ỹ né hẽ ỹ ky däng yp ỹỹ hã ỹ hag'ããs ta hã. Hahỹỹ d’ paa kyh ỹỹ ta hã: “ỹ gadoo tamoo n'aa baad tanadoo bä ta hã. Ỹ mananaa bä paa me a wë, ỹ moo hahoop tii bä ta hyb n'aa a moo gó!’’, näng ỹ ta hã.
33-34 —Nyy da ỹ babaaj hõm ee wë wakããn ỹỹ tagad'ooh hadoo doo tabadoo wäd bä si ỹỹ hawät do paah? Man'oo manäh ỹ heg'ããs yp ỹỹ ta h'yy kamatón me ta hã ta hyb n'aa. Ti hyb n'aa ỹ karẽn paawä ỹ ta sii n'aa hẽ ỹ moo wät ta jawén buuj. Namahũũm Bejamih ta wakããn sa sii —näng mä Judah kyyh Juséh hã.