Bejamih ahõm ta wakããn sa sii Esito hẽnh panyyg n'aa hahỹỹh
43
Tak'ëp né paa m' rabas'aah Kanaãh häj n'aa bä. 2 Ti hyb n'aa m' sa waa bahëëj jën bä Esito hẽnh naa, sa yb ky hadoo mä ta taah hã:—Bë ahõm p'aa hẽnh Esito hẽnh bë betsẽẽ hyb n'aa ër waa— näng mä ta kyyh.
Genesis 43:1-34
3 Ti m' ta taah seeh Judah häd näng doo ky hadoo:
—Ta tii aj'yy hadoo doo, tak'ëp paa da ta kyyh ãã hã. Baad taky n'aa her'ood däk ãã hã. Hahỹỹ d’ ta kyyh: “Dooh da ỹ bë ty gepëë wäd bä, bë mananaa bä bë hỹỹj bë sii’’, näng ta kyyh ãã hã —näng mä Judah. 4 —Mamejõ bä Bejamih, ahõm bä ãã sii, tii bä ãã ah'ũũm ãã etsẽẽ a waa. 5 Mamanejõ bä ãã sii ãã hỹỹj tagad'ooh hadoo doo, dooh da ãã ahõm bä, baad up aj'yy ky n'aa her'oot do hyb n'aa. Hahỹỹ d’ ta kyyh ãã hã: “Dooh da ỹ bë ty gepëë wäd bä bë mananaa bä bë hỹỹj bë sii’’, näng ta kyyh —näng mä Judah kyyh ta yb hã.
6 Ti m' Isaraéw ky hadoo ta taah sa hã:
—Hëd n'aa paa bë baher'oot ta hã bë hỹỹj tagad'ooh hadoo do ky n'aa? Bë her'oot do hyb n'aa ỹ h'yy katón bë an'oo bä —näng mä Isaraéw kyyh ta taah sa hã.
7 Ti m' raky hado kän mä sa yb hã:
—Ta tii aj'yy baad up tabeaanh ãã hã ãã wakããn ky n'aa. Hahỹỹ d’ ta kyyh: “akä, tedëb nä bä bë yb bë hana doo?’’, näng. Na-ããj hẽ teaanh ãã hỹỹj seeh tanyy nä bä. Teaanh do ãã hã, ti d’ né ãã her'oot. Nyy da paawä tii ji heen n'aa näng taky hadoo bä ãã hã, ‘ỹ karẽn bë manaa bë hỹỹj wawẽẽ hẽ’ tanoo bä ãã hã?— näk mä Isaraéw taah sa kyyh ta hã.
8 Ti m' Judah ky hadoo ta yb hã, Isaraéw häd näng do hã:
—Mamejõ Bejamih sii ỹỹh. Nayyw hẽ ãã bahõm joom s'ëëb hetsẽẽ doo ër nadejëp hyb n'aa ër taah na-ããj hẽ. 9 ỹ né hẽ hag'ããs ta hã. Ỹ gadoo tamoo n'aa baad tanadoo bä ta hã. Ỹ mananaa bä paa me a wë, ỹ moo hahoop tii bä ta hyb n'aa a moo gó. 10 Nayyw hẽ ãã ahõm bä paawä, pawóp nuu me né paawä ãã baboo däk t'ĩĩh hẽnh —näng mä Judah kyh ta yb hã.
11 Ti m' Isaraéw, sa yb, ky hadoo sa hã:
—Ti bä haa! Hahỹỹ da bë adoo: bë ata hõm bë h'ëëd hood gó tak'ëp baad hadoo doo ër panang bä naa, bë anoo do pan'aa Esito bä sahõnh hẽ hag'ããs doo hã. Bë mahũũm mabaah, ji tä ty gamabuuj, joom ag, ta syyj ta ts'ooh s'ëëb, ji hawuuk buu benyym do sii hẽ, bë ets'ëëh péh ta hã. 12 Bë mahũũm na-ããj hẽ tabahä̃nh ta säm bë babaaj hõm hyb n'aa p'aa hẽnh radapä jëng doo bë manaa doo gó. Nepäh rah'yy gatamaa wäd bä ta säm hã. 13 Bë mahũũm bë hỹỹj bë sii. Bë hyb n'aa bawaad! Nayyw hẽ bë ahõm ti aj'yy hadoo do wë! —näng mä ta kyyh sa hã.
14 Ti m' Jakóh ky hadoo ẽnh ta taah sa hã:
—Ỹ karẽn P'op Hagä Doo, Sahõnh hẽ Haj'aap Doo, an'oo bä sahõnh hẽ baad up bë hã aj'yy matym gó bëëh. Ỹ karẽn na-ããj hẽ P'op Hagä Doo manaa bë hỹỹj seeh Bejamih daheeh. Tah haa bedo boo na h'yy kamatoon ỹỹh —näng mä Isaraéw kyyh ta taah sa hã.
15 Ti m' ranoo do pan'aa sa waa säm tabahä̃nh ramahũũm. Bejamih mä ahõm kän sa sii kä. Nayyw hẽ m' rabahõm Esito hẽnh. Rakajaa bä m' rabahõm Juséh wë. 16 Ti m' p'eets hẽ rababok bä m' Juséh hapäh Bejamih sa sii. Ti hyb n'aa m' taky hadoo ta tób yt moo wät do hã:
—Mamahũũm bok hanäng ajyy tób ỹỹ hẽnh. Manaboh jat masãh ỹỹ wób, mamoo wäd sa tä rabawëh hyb n'aa si ỹỹ bada wasyk —näng mä ta kyyh ta sii moo wät do hã.
17 Ti m' Juséh sii moo wät doo tamejũũ doo da tabad'oo. Tamahũũm kän mä ta tób hẽnh. 18 Eỹỹm bok mä aj'yy mahũũm bä Juséh tób hẽnh. Rawén eỹỹm bok mä sa h'yyb gó raky hadoo:
—Ër rawén manaa wawẽẽ hẽ ta säm hyb n'aa radapä jëng do pooj jé ër hana noo gó. ër tanoo n'aa masooh ta sii ër moo bok doo ta sii n'aa hẽ pan'aa hyb n'aa. ër masããh na-ããj hẽ ër moo hata n'aa —näk mä sa kyyh sa h'yyb gó.
19 Rabajëë pëë pooj jé m' tób yt hẽ raher'oot mä Juséh sii moo wät do hã heỹỹm bok do hyb n'aa. 20-21 Ti m' raky hadoo:
—Mamaa newë ãã her'oot doo! Pooj jé ãã hana noo gó hetsẽẽ do joom s'ëëb, ãã babaaj hõm bä, ãã baỹỹh bä, tii bä ãã gas'ëës ãã waa ganäng do ta hood gó. Tii bä ãã mepaag hõm doo ãã aw'yyt ta gó. Hỹỹ kä ãã manaa p'aa hẽnh ãã sii. 22 Tabahä̃nh ãã manaa ta säm ãã betsẽẽ hyb n'aa ãã waa. Dooh ãã heen n'aa enä bä jaa mo haj'aa —näk mä h.
23 Ti m' Juséh sii moo wät doo ky hadoo:
—Tow'ããts hẽ. Namanäh tii. Bë eỹỹm manänh. P'op Hagä Doo bë yb h'yy kaha'eeh doo, bë na-ããj h'yy kaha'eeh doo mo haj'aa ti bë hã. Hã ỹỹ né hẽ tagepaak ta säm —näng mä ta kyyh.
Ti m' tamanaa Simijãw takataa däk hyb n'aa ta wakããn sa hã.
24 Ti m' Juséh sii moo wät doo mahũũm, majëë pä kän Juséh tób yt hã. Tanoo naëng sa hã sa tsyym rabahets'yyt hyb n'aa. Tanoo mä na-ããj hẽ sa masããh waa. 25 Tii kä m' raky n'aa napäh tii t'ĩĩh hẽnh rabawëh. Ti hyb n'aa rabenyyw hõm ranoo do pan'aa Juséh hã tabana bä wasyk ta tä hawëh doo.
26 Ti m' Juséh bana bä ta tób hẽnh, ran'oo kän tii bä ta matym n'aa ta tób yt hã ramanaa do paah. Ti m' tũũ ranu ehyy b'ëëh ta matym gó. 27 Tii bä Juséh eaanh mä sa hã baad raboo bä. Ti m' taky hadoo sa hã:
—äkä, h'ëëd hado bë yb säg bë hanäng doo? Edëp nä? —näng mä ta kyyh.
28 —ãã yb, dooh tanahëë nyy bä. Baad tabawät. Edëp nä— näk mä sa kyyh.
Ti m' tũũ ranu ehyy b'ëëh. Rametëëh ta hã tii raweh'ëëh.
29 Ti m' Juséh baheg'ããs bä sahõnh hẽ, tahapäh ta hỹỹj heh'äät up Bejamih häd näng doo. Sét up mä sa ỹỹn. Ti m' take'aanh:
—Hahỹỹ né bë hỹỹj tagad'ooh hadoo doo bë her'oot do paah? —näng mäh.
Ti m' taky hadoo Bejamih hã:
—P'op Hagä Doo ky enyyw da a hã tah ỹỹ —näng mä Juséh kyyh ta hã.
30 Ta hỹỹj heh'äät up tahapäh do hyb n'aa h'yyb heot mä tii bä. Ti hyb n'aa m' nayyw hẽ tabahõm sa sii her'oot do paa ta kawagó gó tabaoot hyb n'aa.
31 Tabaoot jawén paa bä m' tamatym tanetsyyd hõm, p'aa hẽnh tabana sa wë. H'yy geb'aah tanaoot hyb n'aa. Ti m' taky hadoo ta sii moo bok do sa hã:
—Bë mana ãã tä —näng mäh.
32 Ti m' ramana kän sa tä. Juséh tam'aa hẽnh tabawëh, ta wakããn sa m'aa hẽnh, Esito buuj sa m'aa hẽnh. Esito buuj dooh rakarẽn rawëë bä Eber buuja sa sii. Nas'aa Esito buuj sa hã, ti hyb n'aa m' sa m'aa hẽnh rabawëh. 33 Juséh kyy gó rabat'oonh. Pooj jé henäng doo pooh hẽnh tahasooh. Ta jawén näh ta jawén. Ti hado hed'yyt hẽ. Sa gad'ooh tagadëëg up tabasooh. Ty kegãã toonh mä tii bä kä baad up tamejũũ rabat'oonh. Rahyb n'aa meuuj bong mäh. 34 Ti m' Juséh banoo bä ta tä uuh sa tä, ti bahä̃nh Bejamih tä tabanoo. Tii bä kä m' awëë bok ta pa, eëëg bok mäh.