Pooj jé Jakóh taah rahah'ũũm noo gó Esito hẽnh panyyg n'aa hahỹỹh
42
Ti m' Jakóh ky n'aa napäh bä ti anäng joom s'ëëb Esito hẽnh, taky hadoo ta taah sa hã:—H'ëëd né ti bë h'yy kanapeet. Dooh bë h'yyb kes'ee bä? 2 ỹ ky n'aa napäh joob s'ëëb banang Esito hẽnh. Bë ahõm nä t'ĩĩ hẽnh, bë ets'ẽẽ ër waa ër nadejëp hyb n'aa —näng mä Jakóh kyyh.
Genesis 42:1-38
3 Ti m' ji moo sahõnh hẽ rabahõm Juséh wakããn Esito hẽnh rabets'ẽẽ hyb n'aa triig Esito hẽnh naa. 4 Dooh m' Jakóh an'oo bä Juséh hỹỹj heh'äät up Bejamih ahõm bä ta wakããn sa sii. H'yy ganäng baad tanadoo bä ta hã rahahõm hẽnh. 5 Jakóh awät mä ti noo gó Kanaãh buuj sa häj n'aa bä. Kanaãh buuj na-ããj hẽ m' as'aah. Ti hyb n'aa kä m' Isaraéw taah rabahõm kän ta wób sa mahang triig hets'ẽẽ doo.
6 Ti noo gó kä m' Juséh Esito bä sahõnh hẽ hagã n'aa. Ti d’ né hẽ m' paa hes'ëëm joom s'ëëb Esito buuj sa hã. Ti hyb n'aa m' ta wakããn rakajaa nä bä, tũũ ranu ehyy bëëh mä tabasooh bä. 7 Ti m' Juséh hapëëh sii hẽ m', tamepäh mä sa hã. Tas'eeh hẽnh naa ged'oo mä sa hã. Tak'ëp mä ta kyyh sa hã. Ti m' Juséh ky hadoo:
—N'yyh hẽnh bë hana? —näng mäh.
Ti m' raky gadoo:
—Kanaãh hẽnh naa ããh. Triig ãã ets'ẽẽ paawä ãã wén na— näk mäh.
8 Juséh ty gahapäh mä sa hã. Ta wakããn dooh m' rahapëë bä sa hỹỹj tadoo bä.
9 Ti m' Juséh hyb n'aa esee p'ooj ub ta s'ëëh ta wakããn sa hã. Ti m' Juséh ky hadoo:
—ãã noo n'aa bëëh. Bë beg'ããs ãã panang nyy d’ bë bad'oo— näng mäh.
10 Ti m' raky hadoo:
—Dooh ãã wahë n'aa. Dooh tii d’ tahadoo bä. Ããh, a koróm hedoo doo, ãã wén na triig ãã etsẽẽ ãã waa pan'aa —näk mä sa kyyh. 11 —Sét up né hẽ ãã yb. Noo ganesa doo nado ããh. Ãã noo gehup. Dooh beg'ããs doo tadoo bä ããh —näk mäh Juséh hã.
12 —Dooh. Beg'ããs doo né bëëh! Bë wén na bë beg'ããs hyb n'aa nyy da bë bad'oo —näng mä Juséh kyyh.
13 Ti m' raky hadoo:
—Sét up né hẽ ãã yb. Kanaãh häj n'aa bä tabagä tii. 12 paa ããh. Tagad'ooh hadoo doo ayyw gëët ãã yb pa, ta seeh badoo wät— näk mä sa kyyh Juséh hã.
14 —Kyh ỹỹ né bë hã. Tabegã n'aa né bëëh. 15 Bë ỹ metyy bë ehub up tadoo bä tii bë her'oot do hã ỹỹh. Hahỹỹ da d’ bë ỹ metyy: Dooh bë abaaj hõm bä ỹ an'oo bä bë hỹỹj tagad'ooh hadoo do nanaa bä wawẽẽ hẽ. Né hup ỹ ti bë hã. 16 Sét hẽ bë hỹỹj bë mejõ hõm tamanaa hyb n'aa bë hỹỹj tagad'ooh hadoo doo. Bë wób sahõnh hẽ ỹ dewäts bëëh, ỹ metyy hyb n'aa bë ehub up tadoo bä tii bë her'oot do hã ỹỹh. Daap bë menä bä, bë hỹỹj tagad'ooh hadoo doo ky n'aa hã, tananaa bä, tii bä kä ỹ heen n'aa näng tii tabegã n'aa né bëëh! —näng mä Juséh kyyh sa hã.
17 Tii bä kä m' sahõnh hẽ tadawäts bëëh mä tamawob hẽ sa ä̃h.
18 Tamawoob hẽ tabadoo däk bä m' sa ä̃h, Juséh ky hadoo sa hã:
—Ỹ P'op Hagä Doo hã ỹ h'yy ka'eeh, ti hyb n'aa hahỹỹ da d’ bë bad'oo bë bedëp hyb n'aa: 19 Bë ehub up tadoo bä, namagëd bë seeh ỹ gadahew'ëës doo gó. Ta wób ti hah'ũũm. Bë mahũũm joom s'ëëb bë taah waa has'aah doo. 20 Taw'ããts né hẽ bë mana bë hỹỹj tagad'ooh hadoo doo ỹ bahapäh hyb n'aa bë ehub up tadoo bä ti bë her'oot do hã ỹỹh, bë nadejëp hyb n'aa —näng mä Juséh kyyh sa hã.
Tii d’ né kä m' rabadoo kän.
21 Kaner'ood b'ëëh mä tii bä:
—Hahỹỹ ër ep'aak ër hỹỹj paa hyb n'aa. Ti noo gó ër hapëëh né paawä ti ër hỹỹj h'yyb panadoo wäd, nadaa takad'oo péh, tak'ëp ta kyyh ër hã. Dooh ër karẽn bä ër maa newëë bä ta kyyh ti noo gó. Ti hyb n'aa kä ër wén h'yyb panadoo bong tii da ër ad'oo do hyb n'aa hỹỹ kä ëër hã —näk mä sa kyyh rakaner'ood b'ëëh bä.
22 Ti m' sa hỹỹj wah'ëëh hadoo doo, Rubẽnh häd näng doo, ky hadoo sa hã:
—Ỹ her'ood wät né paawä bë hã, ‘dooh ër rejã bä ër hỹỹj’ noo paawä kyh ỹỹ bë hã. Dooh bë karẽn bä bë maa newë. Hỹỹ kä ër ep'aak ta majyyw hyb n'aa —näng mä Rubẽnh kyyh ta wakããn sa hã.
23 [Ta wakããn rer'ood bä, rer'oot mä sa kyy hẽ. Juséh ber'ood bä sa sii, ter'oot mä Esito sa kyy hẽ.] Ta seeh ta r'ood n'aa her'oot mä sa hã Juséh kyyh. Taher'oot na-ããj hẽ Juséh hã ta wakããn raher'oot doo. Ti hyb n'aa m' dooh ta wakããn rah'yy genä bä Juséh maa napëë bä sahõnh hẽ raher'oot doo.
24 Ti m' Juséh ahõm wät ta wakããn sa mahä̃nh, aód wät mä sa hyb n'aa. Tabana bä p'aa hẽnh mä ta wakããn sa wë, er'oot p'aa hẽnh sa sii. Ti m' tamejũũ ramasoo däk Simijãw. Tamejũũ mä ramoo mew'yyd däk sa matym gó.
25 Ti m' Juséh mejũũ ta sii moo heb'ooh doo reh'aa hõm ta hỹỹj sa waa hood gó ramahũũm do pan'aa. Tamejũũ mä ta säm na-ããj mä radapä jëng p'aa hẽnh sa hood gó. Tamejũũ rets'ëë däk mä ramahõm me rawa péh. Tii bä kä m' Juséh sii moo heb'ooh doo sahõnh hẽ rabahajaa bä Juséh mejũũ doo, 26 ti ta wakããn at'ëëg tooj kän sa masããh jó. Ah'ũũm mä tii bä kä. [Simijãw ayyw gëët mäh.]
27 Ti m' tug bä kä m' rabayyw b'ëëh rabaä̃ b'ëëh hyb n'aa. Ta seeh gas'ëës ta waa ta hood gó hadäk doo, tamas'ããh waa tabanoo hyb n'aa ta uuh. Tii bä m' tabahegãã däk ta säm, j'ooj hẽ tabasooh. 28 Ti m' taky hadoo ta wakããn sa hã:
—Hät ỹỹ säm p'aah radasuun hahỹỹh, bë hegãã! —näng mä ta kyyh.
H'yyb panadoo booh mä tii bä rabahapäh bä ta säm. Raky n'aa hajẽẽw bëëh tii bä:
—H'ëëd hado tii, tii da P'op Hagä Doo ad'oo ër hã?— näk mä sa kyyh.
29 Rakaja hõm bä Kanaãh häj n'aa bä m', sa yb wë, raher'oot mä sahõnh hẽ ta hã h'ëëd hado jé raheboo nä hẽnh. 30 Ti m' raky hadoo, hahỹỹ d’ mä sa kyyh:
—Esito bä wahë n'aa tak'ëp ta kyyh ãã hã. Ky nes'aa ãã hã. Ta panang beg'ããs ted'oo ããh. 31 Ti m' ãã her'oot ta hã, “dooh ãã noo ganesa doo tadoo bä, ãã noo gehup. Dooh beg'ããs doo tadoo bä ããh. 32 Sép up né hẽ ãã yb. 12 paa ããh. Sét hẽ dooh wäd. Tagad'ooh hadoo doo ãã yb pa tabayyw gëët Kanaãh bä’’, näk ãã kyyh ta hã. 33 Tii bä Esito bä wahë n'aa ky gadoo ããh: “Hahỹỹ da d’ ỹ heen n'aa näng bë ehub tadoo bä. Bë eréd gëët bë hỹỹj seeh pa ỹỹh. Ta wób abaaj h'ũũm. Bë mahũũm joom s'ëëb bë taah waa pan'aa has'aah doo. 34 Bë mana ỹ karẽn bë hỹỹj tagad'ooh hadoo doo wë ỹỹ, ỹ bahapäh hyb n'aa tii bä da ti bë noo gehup bëëh, ỹ bahapäh hyb n'aa ti bë dooh beg'ããs doo tadoo bä. Tii d’ bë ad'oo bä, ỹ abaj hõm tii bä bë hỹỹj seeh bë hã. Tii bä da baad bë babok, bë betsẽẽ wawẽẽ hẽ’’, näng ta kyyh ãã hã —näk mä sa kyyh sa yb ramaher'oot bä.
35 Ti m' rabeh'ook bä joom s'ëëb, raw'yyt sahõnh taganang doo gó tabanäng ta säm! Sahõnh hẽ rabahapäh bä, sa yb na-ããj hẽ joom s'ëëb säm, h'yyb panadoo booh mä tii bä.
36 Ti m' Jakóh ky hadoo ta taah sa hã:
—Bë asog hõm mahä̃nh ỹỹ tah ỹỹ. Juséh, Simijãw daheeh bedoo bong. Hỹỹ kä bë karẽn bë ado hõm mahä̃nh ỹỹ Bejamih. Sahõnh hẽ dooh baad tadoo bä hã ỹỹh! —näng mä ta kyyh sa hã.
37 Ti m' Rubẽnh ky hadoo ta yb hã:
—Ỹ hag'ããs Bejamih. Mahaëëj hã ỹỹh. P'aa hẽnh né hẽ ỹ manaa a wë. Ỹ manana bä Bejamih p'aa hẽnh a wë, maneboh bëh makarẽn bä tah haa pawóp hẽ tii bä —näng mä Rubẽnh kyyh ta yb hã.
38 Ti m' Jakóh ky hadoo ta taah sa hã:
—Dooh tah ỹỹ ahõm bä bë sii. Ta hỹỹj dajëp. Jããm né hẽ ti mad'aag gëët doo. Tah ỹỹ ahõm bä bë sii, baad tanadoo bä ta hã bë mahõm me, tii bä da ỹ h'yyb kamatón me ỹỹ dajëp bë an'oo bä— näng mä ta kyyh ta taah sa hã.