Genesis
Sahõnh du doo do panyyg n'aa hahỹỹh
P'op Hagä Do pahuuj noo gó panyyg n'aa hahỹỹh
1
P'ooj ub, sahõnh hẽ ta du dahäng noo gó m', sahõnh badäk hahỹỹh P'op Hagä Do pahunh.2 Badäk hahỹỹh pooj jé dooh paa m' ti hanäng nä péh. Sahõnh hẽ paa m' tabag'yyp. Naëng pong jé m' badagyp. P'op Hagä Do Sahee tamii pong jé tabadäk.
Genesis 1:1-2:3
3 Ti kä m', ti m' P'op Hagä Do ky hadoo:
—Tanyy däg ta bag!
Ti m' taganäh ta bag. 4 Taw'ããts ta hã ta bag. Ti m' tabetyn ta bag. Tsyt hẽ ta badajuuh, tsyt hẽ tabawag. 5 Ti ta häd n'oo däk ta bawag “adëëb bä’’. Ta badajuuh häd “atsëm'’. Sét däk mä ta ä̃h.
6 Ti m' P'op Hagä Do ky hadoo:
—P'op ta gadë hadoo anỹỹ däg naëng gadë n'aa!
Tii bä kä m', ti hadoo né kä m'. 7 Ti hadoo mä P'op Hagä Doo ta gadë hadoo mä tan'oo bä. Tetyn hõm mä naëng, ta pong jé ta seeh, ta yd jé ta seeh. Bag'yyp paa m' k'ããts ti noo gó. 8 P'op Hagä Do manaëënh mä ta gadë “wë’’. Pawóp däk mä ta ä̃h.
9 Ti m' P'op Hagä Do ky hadoo ẽnh:
—Bawooj däg k'ããts, tamaa hẽnh tamiih!
Ti hadoo né kä m'. 10 Ti m' bawooj däk do häd tamaneënh “hëëj’’. Tamiih tamaa hẽnh däk do tamaneënh “akajaar’’. Ti m' tabaheg'ããs, taw'ããts hẽ ta hã tamo haj'aa. 11 Ti m' ta ky hadoo ẽnh:
—Tagenäh tabawä n'aa k'ããts jó, heaak doo, tym enäh doo!
Ti hadoo paa m'. 12 Awäng kä m' ag enäh doo, tym enäh doo. Ti m' tabaheg'ããs, taw'ããts hẽ ta hã tamo haj'aa. 13 Tamawoob däg mä ta ä̃h.
14-15 Ti m' P'op Hagä Do ky hadoo ẽnh:
—Tanyy däg ta bag wë hã, tũũ ta bag däk hyb n'aa da! Ta heen n'aa bag da. Ta ä̃h heen n'aa, kamarab heen n'aa, ta maeeh, ta baab heen n'aa. Ti bag pan'aa da!
Tii d’ paa m'. 16 Ti m' P'op Hagä Do pahuuj kän ty ewëëh do ta bag. Ty eh doo, adëëb bä bag; dooh denaa hẽ m', atsëm bag. Sakõõh na-ããj hẽ tapahuunh. 17-18 Ti m' tadabong ta bag wë hã, tũũ ta bag däk hyb n'aa, adëëb bä bag, atsëm bag. Ti d’ tabahadoo, ta bawag ta badakyp tabetyn hyb n'aa. Ti m' P'op Hagä Do baheg'ããs, taw'ããts hẽ m' ta hã. 19 Ji meheet pé däg mä ta ä̃h.
20 Ti m' P'op Hagä Do ky hadoo ẽnh:
—Tanyy tame ta bar'ëëng tame habong doo, wë yt habong doo, kepuuh do sii hẽ da!
Ti hado kän mäh. 21 Ti hadoo né kä m' tapahuunh doo kä akajaar me habong doo kä, hewëëh doo kä. Tapahuunh sahõnh hẽ tame habong doo, wë yt habong doo, kepuuh do sii hẽ m'. Ti m' tabaheg'ããs, taw'ããts hẽ tapahuunh doo. 22 Ti m' baad P'op Hagä Do h'yyb däng, baad taky däng sa hã. Ti m' tabaher'oot sa hã:
—Bë kahũũm da tame. Bë kanekan da tame.
Ti m' taber'oot ẽnh kepuuh do sa hã:
—Bë kahũũm da, bë kanekan da.
23 Ji moo poo oow pé kä ta ä̃h kä.
24 Ti m' P'op Hagä Do ky hadoo ẽnh, ahõm nä m' ta kyyh:
—Genä booh k'ããts jó ta baboo n'aa sahõnh hẽ ji aw'ëëh doo, ji naw'ëëh doo na-ããj ta wób!
Ti d’ né kä m' ta ky haj'aa. 25 Ti d’ né kä m' ta baboo n'aa sahõnh hẽ tabad'oo. Ti m' tabaheg'ããs sa hã, taw'ããts hẽ ta hã. 26 Ti m' P'op Hagä Do ky hadoo ẽnh:
—Nadëb ãã pahuunh hỹỹ kä, ããa da hadoo doo. Tah'ỹỹb, kepuuh doo, har'ëëng sahõnh hẽ wahë da.
27 Ti d’ paa m' P'op Hagä Do bad'oo, nadëb ta da hadoo däk. Nadëb tapahuunh aj'yy, ỹỹnh. 28 Ti m' baad P'op Hagä Do ky däng nadëb hã. Ti m' taber'oot sa sii: