2
Ti d’ né kä m' tabahaja däg kän badäk hahỹỹh.2 7 m' ta ä̃h kä tamoo kawatsik. Dooh m' tapahuuj wäd bä kä. 7 kä m' ta ä̃h kä, P'op Hagä Do kamehaak tapahuunh do hyb n'aa. 3 Ti m' baad hadoo doo me 7 däk do ta ä̃h P'op Hagä Do ky n'aa edëë däk. Tsyt hẽ tabetyn hõm tii, ta wób ä̃h mahä̃nh. Tii d’ tawén d'oo, takameh'aak noo gó do hyb n'aa.
Hỹỹ kä aj'yy, ỹỹnh panyyg n'aa tatama doo
4 Tii kä, badäk hahỹỹh, wë sii hẽ kapahuuj däk noo gó panyyg n'aa taher'oot hahỹỹh. Badäk hahỹỹh, wë sii hẽ P'op Hagä Doo, Tak'ëp Hyb N'aa Jawyk Do pahuunh noo gó,
Genesis 2:4-25
5 dooh tawëë nä bä joom. Dooh P'op Hagä Doo, Tak'ëp Hyb N'aa Jawyk Do tamejõ nä bä tedots naëng. Ti hyb n'aa tanawäng nä joom. Dooh nä paa m' nadëb tamoo wëëd n'aa. 6 Ti noo gó m' wanakud tabatsahë n'aa k'ããts gó m' tabana. 7 Tii noo gó m' P'op Hagä Doo, Tak'ëp Hyb N'aa Jawyk Do bado däk tsäng uuh, tetäg däk nadëb. Ti m' tapooh gapahuunh. Ti hyb n'aa ah'yyb g'ëëd kän mäh, edëb g'ëëd kän mä nadëb.
8-9 Tii bä kä m' P'op Hagä Doo, Tak'ëp Hyb N'aa Jawyk Do bejoom däk panang banäm doo, badäk hahỹỹ hëëj uu bä. Hajõng mä ta gó joom hanäm do ji matym gó, han'aak doo na-ããj mäh. Panang häd mä Edẽnh. Papỹỹj hana hẽnh mä tabajat. Ta ti panang hoo gad'oo bä m' tabahäng joom ji hed'ëëp doo. Ta pa m' tabahäng joom seeh, ji tah'yy gan'yyh hanäm do hã, ji tah'yy gan'yyh nesa do hã.
10 Edẽnh gó m' tamana tamiih ta naëng n'aa. Ta w'oo hã m' takamanebäh hõm ji meheet péh tamiih. 11 Häd enäh hõm mäh. Sét mä ta häd Pisõn. Tamewõ hõm mä hëëj Awirah häd näng doo, tajetsëk doo. Ti anäng mä t'ĩĩ hẽnh k'ããts tëg gabarëëh doo. 12 Heh'äät mä tii. Ti anäng mä b'aah täg buu benyym doo, pä taah gaberëëh do Onis häd näng do sii hẽ m'. 13 Ta mabäh seeh häd mä Kijõn. Tamewõ hõm mä hëëj Kus häd näng doo, tajetsëk doo. 14 Ta mabäh seeh häd mä Tsig. Hëëj Asirija häd näng do karawaa me m' tamahyng. Ta mabäh gadëëg häd mä Ew-parates.
15 Tii bä kä m' nadëb P'op Hagä Doo, Tak'ëp Hyb N'aa Jawyk Do mahõm kän joom banäng bä, Edẽnh häd doo hẽnh, ta tii bä tamoo wät hyb n'aa, tabag'ããs hyb n'aa. 16 Ti m' P'op Hagä Doo, Tak'ëp Hyb N'aa Jawyk Do ky hadoo aj'yy hã:
—Sahõnh da mabepóh babä hanäng do hahỹỹh gó panang gó. 17 Häng ta ti ji h'yyb ganyyh do hanäm do hã, nesaa do hã. Mepoo manäh da! Ta ti mepoo bä, õm da dajëp! —näng mä P'op Hagä Do kyyh.
18 Tii kä m' P'op Hagä Doo, Tak'ëp Hyb N'aa Jawyk Do ber'oot:
—Taw'ããts nadó ti ta maab hẽ aj'yy. Ti hyb n'aa ỹ moo wät ta hata ta da hadoo doo, ta moo hata pan'aa.
19 Ti m' pooj jé tatema nä har'ëëng, kepuuh do sii hẽ m' tsäng uuh me m'. Ti m' P'op Hagä Doo, Tak'ëp Hyb N'aa Jawyk Doo menaa aj'yy wë, aj'yy sa häd noo hyb n'aa. Ti m' sa häd noo doo, ti d’ né m' sa häd däk. 20 Ti d’ né paa m' aj'yy häd ets'ëë hõm ji ew'ëëh doo, kepuuh doo, har'ëëng sii hẽ m'.
Dooh m' kaw'yyd péh aj'yy Adão häd näng do hata ta da hadoo doo, ta ti sa mahang. 21 Ti m' P'op Hagä Doo, Tak'ëp Hyb N'aa Jawyk Do eỹỹ jëng aj'yy. Tak'ëp mä tabaä̃ jëng. Ta ä̃h nuujé m' P'op Hagä Do adó nyyh ta karapa k'yy seeh. Ti m' p'aa hẽnh takatsëë däk ta tyw n'aa. 22 Ti m' P'op Hagä Doo, Tak'ëp Hyb N'aa Jawyk Do badoo däk mä aj'yy karapa k'yy, tamoo wäd däk mä ỹỹnh kä. Ti m' P'op Hagä Do mahũũm aj'yy wë, tametëëh ta hã.
23 Ti m' aj'yy ky hadoo:
—Hahỹ tii kä k'yy ỹ uuh, dap ỹ uuh. Ỹ naëënh da “ỹỹnh’’, aj'yy dab uuh kadó hõm do hyb n'aa —näng mä aj'yy kyyh P'op Hagä Do hã.
24 Ti hyb n'aa kä m' ajyy kä sa yb, sa ỹỹn mahä̃nh kä sa m'aa hẽnh kä, takatëë hyb n'aa ta ỹỹm kä. Takatëë jawén paa bä, sét rabahadoo däk ta ỹỹm daheeh.
25 Aj'yy, ỹỹnh ti noo gó hehót paa m'. Dooh paa m' rahebyy bä.