Nadëb ky nadaheeh do panyyg n'aa hahỹỹh
3
Ti m' P'op Hagä Doo, Tak'ëp Hyb N'aa Jawyk Do pahuunh do sa mahang mäh, aw'yy h'yy kamep'ëëh ta wób sa mahä̃nh. Ti m' aw'yy beaanh ỹỹnh hã:—P'op Hagä Do er'oot né g'ee bë nepóh hyb n'aa joom ag sahõnh hẽ? —näng mä aw'yy kyyh.
2 Ti m' ỹỹnh ky hadoo:
—Ãã epóh mä sahõnh hẽ.
Genesis 3:1-24
3 Sét hẽ m', ta hoo gad'oo bä hahäng doo, ãã nepóh, tanooh. Dooh m' ta hã ãã moo kajäk, tanooh. Ti ãã epoo bä m', ãã dejëp tii bä, P'op Hagä Do nooh.
4 Ti m' aw'yy ky hadoo:
—Dooh. Dooh bë dajëb bä. Daap tii. 5 P'op Hagä Do hapäh ti bë epoo bä, ta dahadoo däk bë tii bä. Bë hepëë däk tii bä sahõnh hẽ, henỹỹm doo, nesaa doo. Ti hyb n'aa tii d’ tabedoo bë hã —näng mä aw'yy kyyh tawadii bä.
6 Ti m' ỹỹnh baheg'ããs ti joom. Nu näm ta hã ta ag, taw'ããts hẽ ji epoo bä ta ag. Ti m' ta h'yyb gó tabedoo:
—Ti d’ taw'ããts hẽ ji h'yy ganäng hyb n'aa.
Ti hyb n'aa m' tabatóh däk ta ag seeh. Tepóh mäh. Tanoo däk mä ta patug hã. Tepóh né hẽ m' tii. 7 Repóh jawén paa bä m', rah'yy genä padëëk. Ti m' ta seeh hadoo däk mä sa h'yyb. Hebyyh b'ëëh mäh. Hehót mä sa h'yyb. Ti m' figo g'aad mä rasung däk sa saroor. Tii me m' rakasapog b'ëëh.
8 Tii kä m' P'op Hagä Doo, Tak'ëp Hyb N'aa Jawyk Doo, tug bä kä m' tabadahẽẽw däk bä, tamaa ena nä kän joom mahang hawät doo kä. Tii b’ ramaa newëë däg kän. Ti bä m' b'aah mahang rakejëën b'ëëh Tak'ëp Hyb N'aa Jawyk Do mahä̃nh.
9 Ti m' P'op Hagä Doo, Tak'ëp Hyb N'aa Jawyk Do naëënh:
—N'yy hẽnh õm?
10 Ti m' aj'yy ky hadoo:
—Ỹ maa napäh mabana bä joom mahang. Ỹ eỹỹm, ỹ hahót hyp ỹỹ. Ti hyb n'aa ỹ wén gejëën gëët.
11 Ti m' Tak'ëp Hyb N'aa Jawyk Do beaanh:
—Jaa noo ti mabahahót? Mepóh paa ti joom ag “mepoo manäh’’ ỹ hanäng doo?
12 Ti m' aj'yy ky hadoo:
—Ỹỹj manoo do hã ỹỹ, ti hanoo däk hã ỹ ta tii joom ag, ỹ wén epóh.
13 Ti m' P'op Hagä Doo, Tak'ëp Hyb N'aa Jawyk Do ky hadoo, teaanh mä ỹỹj hã:
—Hëd n'aa ti d’ mad'oo?
Ti m' ỹỹnh ky hadoo:
—Ỹ aw'yy wadii, ỹ wén epóh.
14 Ti m' P'op Hagä Doo, Tak'ëp Hyb N'aa Jawyk Do ky hadoo aw'yy hã:
—Tii d’ mad'oo do hyb n'aa, ta see hadoo däk da õm, ji ew'ëëh doo, ta wób har'ëëng mahä̃nh. Õm da ỹ ky n'aa was'ee wät. H'yy katakyyk da õm hỹỹ kä mawäd bä. K'ããts tsyg da a waa hed'yyt hỹỹ kä, a panaa na-ããj da. 15 Ỹỹnh daheeh a majĩĩ da hỹỹ kä, bë panaa na-ããj da. Ỹỹnh panaa nu tsab'eep da õm. Ta tsyym sug da megës —näng mä Tak'ëp Hyb N'aa Jawyk Do kyyh aw'yy hã.
16 Ti tamaher'oot ỹỹnh kä:
—Mabetaa bä da, mahỹỹnh da a hã. Ti bahä̃nh da ỹ anoo ta mahỹỹj a hã. Tak'ëp da ta mahỹỹnh a hã karapee benäng bä. Tak'ëp tamahỹỹnh né hẽ, p'aa hẽnh makarẽn mabawät a patug wë. A patug né da õm mejũũ hỹỹ kä —näng mä ta kyyh ỹỹnh hã.
17 Ti m' ta ky hadoo aj'yy hã:
—A ỹỹm kyy gó mabepóh ta ti joom “mepoo manäh” ỹ hanäng doo. Ti hyb n'aa da nesa do ỹ pahuuj kän hỹỹh k'ããts jó. Hỹỹ kä tak'ëp da mamoo wäd hỹỹ kä, mawaa näng hyb n'aa. Tii d’ hed'yyt da hỹỹ kä mabawät bä. 18 Hỹỹ kä, a gëëw gó, k'ããts jó awäng da ta wä ganas'aa do jawii, tëg enäh do sii hẽ da. Hỹỹ kä a waa da hejoom do s'ëëb. Tii da a waa kä. 19 Hỹỹ kä tak'ëp da mamoo wäd, tak'ëp da mabakaanh, tak'ëp mabahehuut a joom s'ëëb mabawa hyb n'aa. Ti d’ hed'yyt da tii bä, p'aa hẽnh tsäng mabahado däk hyb n'aa p'aa hẽnh. K'ããts s'ëëb né õm. P'aa hẽnh da makawareem k'ããts madajëp jawén paa bä —ti edoo paa m' Tak'ëp Hyb N'aa Jawyk Doo.
20 Ti m' ta ỹỹm Adãm manaëëj Ewaa. Sahõnh hẽ hedëp do ỹỹn du nä doo m'. Ti hyb n'aa m' ti tamaneëënh Ewa. 21 Ti m' P'op Hagä Doo, Tak'ëp Hyb N'aa Jawyk Do moo wäd padëëk b'éé byyh sa saroor. Ti m' sa saroor tapadadäg kän sa hã.
22 Ti m' P'op Hagä Doo, Tak'ëp Hyb N'aa Jawyk Do ky hadoo:
—Hỹỹ kä nadëb ããb h'yyb hadoo doo. Tahapäh hỹỹ kä hanäm doo, nesa doo. Hỹỹ kä dooh ỹ an'oo bä repóh joom ji h'yyb hedëp hanoo doo. Repoo bä, hed'ëëp had'yyt hẽ da. Dooh radajëb tii bä —näng mä ta kyyh.
23 Ti hyb n'aa m' P'op Hagä Doo, Tak'ëp Hyb N'aa Jawyk Do bah'eed n'yyh jejé Edẽnh hẽnh naa, ramoo bok hyb n'aa k'ããts. Ta ti k'ããts hanaa né hẽ tii.
24 Ti m' Tak'ëp Hyb N'aa Jawyk Do dagëët tabagã n'aa papỹỹj hana hẽnh. Ããs mä tii. Ti m' tadahäng ẽnh mä mariij hadoo mä moo gawããn hed'yyt hẽ Edẽnh noo bä, joom ji h'yyb hedëp ag ranepóh hyb n'aa.