Adãm t'aah ta hỹỹj naboh jat do panyyg n'aa hahỹỹh
4
Ti m' Adãm aỹỹh ta ỹỹm sii. Tii bä kä m' etaa däk mäh. Ti m' tabenỹỹ däg kän aj'yy m'. “Kaĩh’’a mä ta häd. Ti m' Ewa ky hadoo:—Ỹ gadoo däk Tak'ëp Hyb N'aa Jawyk Do ky gabuuj aj'yy tah ỹỹ —näng mä ta kyyh.
2 Ta jawén buuj kä m' ta seeh Abéw. Aj'yy né m' tii. Abéw mä b'éé hagã. Kaĩh mä joom jóm.
Genesis 4:1-7
3 Ta see pé noo gó kä m' Kaĩh mana kän ta joom s'ëëb. Tajuu mä Tak'ëp Hyb N'aa Jawyk Do tah'yyb n'yym hyb n'aa. 4 Ti hadoo né m' Abéw. Tamanaa né m' tii ẽnh ta mas'ããh hesyynh do seeh, pooj nä doo. Tanaboh jat mäh, tajuu mä hesyynh doo, Tak'ëp Hyb N'aa Jawyk Doo ta h'yyb n'yym hyb n'aa. Ti m' Tak'ëp Hyb N'aa Jawyk Do h'yy kadajang Abéw moo haj'aa hã. 5 Kaĩh moo haj'aa hã Tak'ëp Hyb N'aa Jawyk Do dooh tagadoo bä. Ti hyb n'aa m' tak'ëp Kaĩh kawajããn wät. H'yy katón wät.
6 Ti m' Tak'ëp Hyb N'aa Jawyk Do beaanh Kaĩh hã:
—Hëd n'aa makawajããn? Hëd n'aa mah'yy katón? 7 Baad hadoo do mamoo wäd bä, õm ỹ gadoo baad up. Baad hadoo do mamoo nawäd bä, nesa do awad hadoo a wë da takarẽn tabadäng. Õm da tano n'aa masooh. Dooh da man'oo nesa do a hã taj'aa ketsëë. Õm da kehej'oonh nesa do hã —näng mä Tak'ëp Hyb N'aa Jawyk Do kyyh.
8 Tii kä m' Kaĩh bets'yyt ta hỹỹj rabahõm hyb n'aa gëëw gó. Gëëw bä kä m' tanaboh jat mä ta hỹỹj.
Genesis 4:8-16
9 Ti m' Tak'ëp Hyb N'aa Jawyk Do ky hadoo Kaĩh hã:
—N'yy hẽnh a hỹỹj Abéw? —näng mäh.
Ti m' taky hadoo:
—Napäh. Ỹ nadó ti tahagã! —näng mäh.
10 Ti m' Tak'ëp Hyb N'aa Jawyk Do ky hadoo:
—H'ëëd ti mamoo hadoo? K'ããts gó naa a hỹỹj majyyw eëënh hã ỹỹh. 11 Kawasee däk õm hỹỹ kä. Kahabëë hõm õm hỹỹ kä hahỹ hëëj, a wakããn majyyw garëëb jëng do mahä̃nh. 12 Hỹỹ kä mejoom bä da, newëë da. Õm da kejën had'yyt hẽ mawäd bä.
13 Ti m' Kaĩh ky hadoo Tak'ëp Hyb N'aa Jawyk Do hã:
—Ta ti jawyg däk hã ỹỹh. Ti bahä̃nh hëëh. 14 Ta s'ee hẽnh ỹ mabah'eed hõm babä hëëj bä naa. Ỹ kejëën had'yyt hẽ a matym gó kä. Jé pad'yyt hẽ ỹ bawät hed'yyt hỹỹ kä. Ỹ rewyyt bä kä, ỹ d’ ranabooh —näng mä ta kyyh.
15 Ti m' Tak'ëp Hyb N'aa Jawyk Do ky hadoo ta hã:
—Tii d’ nadoo da tii. Õm ranaboh bä da, tak'ëp tabahä̃nh da, 7 nuu me bahä̃nh da, ỹ an'oo bä da ta säm b'aanh a hyb n'aa —näng mäh.
Ti m' P'op Hagä Do heen n'aa ewyg däk ta hã, ta wób Kaĩh raw'yyd bä kä rananabooh hyb n'aa. 16 Ti m' Kaĩh dawuh Tak'ëp Hyb N'aa Jawyk Do mahä̃nh. Hëëj Nodb häd näng doo bä tabawäd kän, jé paỹỹj hana hẽnh, Edẽnh karawaa me.
Kaĩh panaa paa panyyg n'aa hahỹỹh
17 Tii kä m' Kaĩh kä aỹỹh ta ỹỹm sii kä, ti m' ta ỹỹm etaa däk. Ti m' ta t'aah benyy däk. Enók mäh. Ti m' Kaĩh moo wät mä sa panang. Enók mä tamaneëënh panang häd. Ta t'aah häd mä tamaneëënh. 18 Ti m' Enók t'aah kä, Jirad. Ti m' Jirad t'aah, Mahujĩw. Mahujĩw t'aah mäh, Metusĩw. Metusĩw t'aah, Ramék.
19 Ramék kä m' pawóp hẽ m' ta ỹỹm. Pooj jé ta ỹỹm häd mä Adah, ta seeh häd mä Sirah. 20 Adah t'aah m' Jabaw. Jabaw mä du na do b'éé heg'ããs doo, jé pad'yyt hẽ keh'ỹỹt doo. 21 Jabaw hỹỹj häd mä Jubaw. Jubaw mä manaarapéw du na doo, ji gamehỹỹh do na-ããj mäh. 22 Sirah mä Ramék ỹỹm seeh, ta t'aah häd mä Tubaw-Kaĩh. Sapaar tema do du na do tii. Tubaw-Kaĩh ä̃nh häd mä Namäh. 23 Tii kä m' Ramék er'oot kän ta ä̃j sii kä:
—Bë ỹ maher'oot Adah, Sirah. Ỹ d’ bë maa newë —näng mäh. —Aj'yy ỹ naboh jat, tamo haj'aa adäg däk hã ỹỹh. Pahëëw na-ããj hẽ ỹ naboh jat, hã ỹ tamo haj'aa badäg däk hyb n'aa. 24 Tak'ëp, 7 nuu me, ta säm b'aanh P'op Hagä Do an'oo bä Kaĩh naboh doo hã, hỹỹ kä ranaboh bä ỹỹh, 77 nuu me da tagadoo nesaa do ta säm, hã ỹ nabooh doo —näng mä Ramék.
Jããm hẽ hãhỹ Kaĩh panaa panyyg n'aa.
Abéw jawén buuj panyyg n'aa hahỹỹh
25 Tii kä m' Adãm, ta see pé noo gó ta ỹỹm sii tabaỹỹh. Etaa däk mä p'aa hẽnh ta ỹỹm. Enyy däg kän mä ta t'aah. Tabenäng noo gó Ewa ky hadoo:
—P'op Hagä Do anoo Abéw, Kaĩh naboh jat do jawén buuj —näng mäh.
Ti hyb n'aa tahäd noo däk Seet.
26 Seet t'aah kä m' ta häd n'oo däk Enós. Ti noo gó paa m' radu doo P'op Hagä Do raweh'ëëh doo.